Gestreng edell vest...
Alls ich uch m g heren von kliner schollun (?) geschriben
han wie wier da hin mit gutter gsunttheitt kon
sindt und da gmustert und zalt sindt worden
und dadannen uff Scharlampuntt zuo klein will von hochen
lageren zogen sindt da mier noch ligendt und da
solls dan 23 tag ougsten gmustert und zalt sendt
worden und handt die gmeinen knecht Gott sig
lob wolpfeyll ein punten wyn um ein sos und en brot
um ein sos ist wye bi uch. In l zwey bloptt (?) wertig
das die gmeine knecht nit dur handt aber die
futterung ist thur danebendt kan ich uch mine
gnedigen heren nit verhaltten das mier gar wendt (?)
ghalten werdendt bi den gloubigen und der kung
und kunginen ein grossi bigirdt handt uns zu
besichtigen das in kurtzen besser wirdt und ir maiestat
gar gut in sehen thut das man uns woll halti
darnabendt an unseren dienen ein gar gut vernugen
hat den mier ir maiestat und ir frow mutter uff 4
tag dis monats gschriben handt das guten vernugens
so sy ob unserem dien heigendt dar nebendt werdendt
mier uff 7 tag dis manetts uff brechen und alle fendli
mit ein andern zien uff Witri gegen Schapangen nitt
wytt von grosen Schollun zu zien da wirdt der kung uff
(2)
Reims zu zuchen und um die selbig gegen wirdt ir
Mt uns besichtigen da werdent wier vernen
ob wier langen oder kurtzen dienst han werdendt
man hat uns hie theiltt ghan 10 fenli gen Schonundt
gleitt damit mier diser los under komendt ist
3 stundt von ein andern und so man uns bhalten wirdt
wirdt man uns thirekt in die een (?) den man noch
nit kan wüsen wo diseren krieg usbricht den
die spanger schon in Flandern sindt und seidt man
der kung von Hispangen soli in eigner person usgendt
dis manets in Flandern kon man seidt das sy in
Flandern die Huginotten [??] henckind (?) und sy al uffs
kunigs zu kunfft in gangen schafft legendt
das sy schon ein grosen schreken und das folck brachten
heigendt gut welte sin gmacht dar zu thun das sy
das folck wider ghorsamendt würdi dem iungen
kung in Frankrich ouch sich gnug bringen sunst kan
ich uch m g h und väteren nütt nuws schriben
dan da mier Got hab lob gar wenig kranker
knechten handt und sindt gar ghorsam, und gantz
forchtig mitt pitt ier min g h welendt mich und
ein gantzy gselschafft für befolchen han uch
min g h Gott und Maria thrülich befelende. Dattum
den 6 tag septtember im 67 iar zu Scharlenpunt min heren die
houptlut und gmein knecht thundt uch m g h frünttlichen
grützen.
Ug underthäniger und ghorsmaner
diener Ludwig Pfyffer oberst uber
zwenzi fenli eidgnosen
(3)
Ich kan ouch u m g h nit verhalten irs grosen flis und
arbeytt so der her von Tawaldtes uns thut in allen dingen so ier
gutti ornung gidt alls ober ein nathurliger eiggnos were
das han ich uch mine g h nitt wellen unbricht lan.