An myne herren regierer der statt Lucern

Myne herren alls ich bericht worden, von disem boten, das ir byhenden hand,

myne füstling und ouch myner gsellen, bitte ich uch under dienstlich mir selbig

widerzegeben dissem boten zuostellen, welich diener synd myner gnedigen

frawen von Amigni myner bassen und umb selbiger usrach willen bitte ich uch

gnedig herren harin nit abschlag zethuond, dan ich vermein zu Lucern

niemant ützit schuldig syn, noch selbiger lantschafft, darumb bitte ich

üch abermalen underdienstlich, ir wellent bemellt füstling zeiger diess

brieffs überantworten, mich nimpt vast wunder dess so mir anzeigt

ist zuo Rottenburg beschechen syn, üwer lantsessen, das ir sond urtel

gesprochen han wider den würt zum SChlüssel by üch, von wegen

das er geret vom priester zuo Rottenburg, der do geret, in der eydt-

gnossschafft syg kein edellman, dann allein priester, und so eyner wellte

reden eyner besser syn dan der ander so wurde man in heissen die

kuo hütten, do han ich in gfragt ob Ludwig Pfyffer nit syg ein

edelman, do gab mir antwort sebiger pfaff, nein sonders syg ein

but alls ein andrer eins schnyders son der ein pur gsyn, gab ich im

antwort eins teyls, ich hett ime gsen in Frankrych dohar ich

in bekante für ein edelman, und nit für ein puren, do fragt

ich in von denen von Goldi gab er mir noch gröber antwort, bis das er

rett vom graffen zuo Gryers knechtte er nit besser under andren vil

worten die nit würdig sind zeschryben, sin würdigkeyt nit achtende,

ret wir werent all von ein Adam, und einer den andren glych

und so ich mich wellt besser syn achten dan er und die so warent in fyner

gsellschafft, wellte er gesechen thun mir der kopff wurde zerschlagen,

hub dormit uff ein teller mich darmit zwerffen, gab mir ursach uss

der stuben z gan, ich und myne gsellen, bis dem priester der zorn

ther erlöschen, hiemit ichs euch Gott bittendt under dienstlich üch

ouch mich zhallten, in üwer huott uss tund den 8 september 1567.

Üwer underdienstlichster und ghorsamer

diener Ludwig von Foylly

An myne erenveste herren

den herren zuo Lucern