Ich Melchior Wursch von Underwalden nid dem Kernwald yetziger

zit khn Mt in Franckrich diensten und obrister richter undren

handen, als underem herrn Cristoffel Schorno, obrister

uber dryzechen vendly. Bekhenn hiemitt das ich

offentlich mitt den ubrigen richteren zu gricht gsessen, in

ein fläckhen mit namen Brunne, und daselbst fur uns

erschinen der erbar Issraell Russ eins deils und erclagt

wie im der houptman urlob gen von wegen des meitlis,

doch bet er ime welli das best thuon, antwortt der edel

erenvest herr hauptman Fläckenstein er habe ursach,

von des meitlis wegen, und von der wacht wegen und dz

wirt halben und knechts wegen der im 19 kronen entlent, und er uff in em-

pfangen hab, und ander artickhel mer, darum er im

gutt ursach urloub zu geben khan, und welli sinen

und eines söllichen under sinem fendly nüt. Und

nach clag, antwort, und verhorung der kundschafft [am Rand: hiemit in der urtl er kent diewill] sich

sovill erfunden, das obgenannter hauptman Fläckenstein

soll dem Ysrael geben und zaln den sechsten manott sold,

und so er hauptman in dem dienst han mög er thuon,

wo nitt, mög er im urloub gen, und den costen yetlichen

an im selbst han. Des er obgmelt Israel Rus

der urtl ein urkhundt begert, beschechen uff den 11 tag

septemper im 70. Das zu urkhundt mit minem

gwenlichen insigel uff trucken lasen.