Wir schultthes und ratt zuo Wyllisow, bekennendt

unns offentlich mit dyserem brieff, das uff hütt siness

datthums alls wyer inn rattswyse by ein anderen versampt gsin

vor unns erschinen ist, der erbar Petter Nerach von Münster unnd

hatt uns anzeigtt, wie das er kuntschafftt der warheit gegen

Ysrahell Rusenn zuo Lutzern, nottwendig sye, mitt pitt ime die

durch denn useren geschwornen stattschriber [nach form des rechtenn] uff und inzuonemen

zuo vergennen, welches wyr ime zuo fürderung dem rechtten, gern

zuo glasenn wye volgtt.

Meister Casper Schönn, redtt und bezügtt, by sinem herum gethanen

eydtt. das sich begebenn habe, das er und sin diener, und ander

mer syentt vor der zeltt gstanden, da habe er ghört das man

frydtt grüefftt habe, und alls er umb sich gluogtt habe, habe er

gsechen das Ysraell Rus, und Petter Nerach zamen ghowen habent

und sye hauptman Nicklaus Fleckensteins trabantt darzuo komen

und habe innen mengsmallen fridtt potten aber Ysrael, habe

kein friden haltten wellen, sunderss habe dem Nerach die handtt

ab, und das achsellbein entzwei ghowenn, witter sye ime

nitt zuo wüssen.

Hanns Beiser, meister Caspar Schönnen diener redt und bezügtt

by sinem harum gehtanen eidtt, glicher gstaltt wye sin meister

witter sye ime nitt zu wüssen.

Zuo urkhundt han ich Hans Knewbüeller der zitt schultheis zuo

Wyllisow, ime dysen brieff, mit minem eignen insigell, mier und

minen erben inn alweg onne schaden, verwertt (?) und geben lassen, uff

donstags nach sant gallen tag, von crysti geburtt, gezalt fünffzehn-

hundertt und im sibentzigisten iare.