[erstes Dokument: Urteil vom 30.11.1571, Fleckenstein schuldet noch 4.5 Gulden]

Ich Leodigari Grun burger des grossen raths und der zitt

geschwornner richter zu Lucern thuon kundt und bekenen

offentlich mit disserem brieff, das uff dem tag siner datto

alls ich daselbsten zu Lucern offentlich gricht hielltt ann statt

unnd innamen des gesträngen, edlen fromen vesten fürsichtigen

ersamen und wysen herren Ludwigen Pfyffers ritters

pannerherren und der zitt schulltissen zu Lucern, mines

günstigen lieben herren. Vor mir allda inn offnem gricht

nach form rächtenns verfürsprächett erschinen sindt die

ersamen erbaren Claus Furer, Fridtli Furers sälligen

sun innamen sin unnd siner geschwistergotten, mitt

bystandt Jacob Schulltisser uss dem landt Enntlibuoch

annsprächern eins, so dan der erenvest, houptman

Niclaus Fläckenstein des cleinen raths zu Lucern,

antwurtter annders theils. Und alls Claus Furer

unnd genampter sin bystandt houptman Fläckenstein

noch annsprachen umb ettlich kronen, so er Fridtli Furer

sälligen noch by siner bsolldung iungst gethannert reiss

halb inn Franckrich beschächen schulldig bliben, unnd aber

houptman Fläckenstein, vermeindt durch sinen schriber

und die rödell zubezügen (und so an dem selbigen nitt gnuog)

noch durch ein personen zu erwissen dass er mitt Fridli

Furer abgrächnett unnd daruff ussgericht unnd bsolltt

hetti ouch Fridtli Furer sällig sich der sach nütt beschwärdt

unnd wäre dess gantz woll zufriden gsin. Mitt

mer unnd wengeren wortten durch beyde theill innge-

wenndt, der lenngi noch zuo mellden (nitt von nötten)

Allso uff verhör der kundtschafft geschrifftlichen unnd

mundtlichen gestallt uff ir beyder theillen clag antwurt

redt unnd widerred, unnd nach allem handell,

(2)

so ist nach min obgenampts richters umb frag mitt urtheill

zuo rächt erkenndt, will die kundtschafften inn diesem handell

wider ein anderen, unnd die sach nitt lutter wäre, dass

man die parthien fragen ob sy mine g herren dein

gricht inn ein fründtlichen spruch fy güttigklichen

zuo enttscheiden vertruwen wöllten. Und alls

sy nitt verthruwen, wöllen, sonder houptman Fläcken-

stein der urtheill begert, ist darüber witter mitt

merer urtheill, zuo rächt erkanndth unnd gesprochen,

diewill dan wie erst gemelltt, die kundtschafft so harumb

verhurtt nitt glicher meynung, sonder wider ein-

andren ist, wie dan houptman Fläckensteins schriber

bezügt dass mitt Fridtli Furer olld dem schriber Zämpen

in Furers namen abgrächnett unnd ime daruff

25 kronen schulldig worden unnd bsallt, unnd Fridtli

Furer des zufriden gsin. Dargegen aber inn der andren

kundtschafft sich findt, alls schriber Zämp mitt dem

houptman grächnett, unnd der houptman ime nitt

mer dan 23 sunenkronen ein stüber zwen ellder (?) drier

mindert ime gen, das Fridtli Furer sällig nitt

zuofriden gsin, unnd anzeit der houptman sige ime

noch über selbigs noch siben oder acht kronen schulldig

desshalb siner husfrowen von Troy heimgeschriben

so der houptman si umb selbigs nitt güttigklichen

vermügen werde das sy es mitt rächt von ime bezüchen

söllen, allso das der gespan noch siben kronen

annträffe, derhalben entzweyett inn der

hiemit von ein anderen sin. Disser urtheill begertt

Claus Furer eins urkundt wölliches ime mitt rächt

unnder obgenampts herren schulltissen Pfyffers

eignem innsigerll, von wägen eins grichts (doch ime

herren schulltissen unnd den sinen gentzlichen onne schaden)

zugeben erkenndt wardt uff donnstag sannt Adresen

des heilligen appostels abenndt alls man zallt nach der

geburt Christi unnsers herren, tussendt funffhun-

dertt sibennzig unnd ein iar.

Bezügen warenn hieh die formmen fürsichtigen wissenn

herren Niclaus Schaall, des raths, junkhert Batt Jacob Feer

Niclaus von Will, Jacob Kruss winsticher des grossen

raths unnd der zitt all des grichts geschwornne für-

sprächen unnd Mauritz Kruss burger unnd des

grossen raths zu Lucern.

(4) [zweites Dokument: Kundschaften vom 7.3.1571, andere Hand]

Ich Jost Rängli geschworner weybel zu Entlibuch

thun khundt aller mengklich mit dissem brieff

das uff donntag siness datums, nach dem so die

erbaren meyster Hug Fellmli, unnd Clauss Furer

begertendt, nach vorm des lants Entlibuch rächt, von

Clauss Wicky, unnd Hanns Louber, gägen Hauttman

iuncker Niclauss Fläckenstein khuntschafft, der war-

heytt, von Fridli Furers selligen wegen uff und in-

zuonämen, hatt mich bedücht semliche khunttschafft

innen nit abzuschlachen, wie woll gesagter houtman

nit zu gägen gsin zu zelassen wass si an die khuntt-

schafft zügen wellendt, hatt man innen uff ir

begeren die khuntschafft, in abwäsen, verhört

unnd gschriffliche verfasst unnd beschlossen, langen

lassen. Unnd zügend die obgenannten, zween

getzugen Claus Wicky unnd Hanns Louber gants

einmündig, wie volgt, namllich alls der schryber

woll finden, semlichs habendt si die getzügen, vom

landtschriber ghört und verstanden, unnd nit witters

samliche ir khuntschafft hannd si mit iren harum

gethannen eyden bevestigett, harum so habend wir

den begerenden disser khuntschafft sag, im gschrifft

verfasst unn dmit dem lants insigel, verschlossen über

antwurten lassen, doch gmeinen lantlütten us

Entlibuch in all ander weg anne schaden geben

unnd beschächen uff dem 7 tag mertzen, anno

domini 1571 iare.