249r
Ditz ist der arme Heinrich
Got mach uns im gelich
Ein Ritter so geleret was
Daz er an den buchen las
was er dar an geschriben vant
Der was Hartman genant 
und was ein dinsteman von Owe
Der nam im eine schowe
an einem ieslichen buche
Dar an begond er suche
Ob er icht des vunde
Da mit er swere stunde
Senfter mochte machen 
Mit so geweren sachen
Daz zu gotes eren töchte
Da mit er sich möchte
Gelieben den leuten
hie beginnet er uns deuten
Ein rededie er geschriben vant
Dar umbe hat er sich genant
Daz er siner arebeit
Die er an ditz buch hat geleit
ane lon icht belibe
Swer iz nach sinem libe
höre sagen oder lese
Daz er bitende wese
Der sele heiles hin zu gote
Er gichter sei sin selbes bote
und löse sich selber da mite
Swer vor des andern sunde bite
Her las uns ditz mere
wie daz ein herre were
zu Swaben gesezzen
an dem was niht vergezzen
aller der tugent
Der ein Ritter in siner jugent
zu ganzem lobe haben sol
man sprach niman also wol
in allen den richen
Er hatte werlichen
geburt und wisheit
Sin tugentdie was vil breit
Swie gantz sin habe were
So was sin burt unwandelbere
andern vursten gelich
Er was unnahe also rich
Der geburt und des gutes
alse der eren und des mutes
Sin nameder was erkennelich
Er was geheizen Heinrich
und was von Owe geborn
Sin herze daz hatte im versworn
valsch und alle dorpheit
vil wol behielt er den eit
Stet biz an sin ende
an alle missewendesine dvbio
stunt sin geburt und sin leben
Im was der rechter wunsch gegeben
Die werltlichen eren
konde er wol gemeren
Mit mancher hande tugent
Er was ein blume der jugent
249v
Der werlde vreude ein spigel glas
Steter trewe ein adamas
Er was milde des gutes
Ein lewe sines mutes
Ein schilt siner mage
Der milde ein geliche wage
ime wart uber noch gebrast
Er truck die erbeit alse ein last
Die ere uber rucke
Er was des rates brucke
und sanch so wol von minnen
alsust chonde er gewinnen
Der werlde lob und iren pris
Er was schonejunchubsch und wis
Do der herre Heinrich
alsus geniete sich
Eren und gutes
und vroliches mutes
und in der werde lebete
in dirre suze swebete
in der werltlicher wunne
Er was uber allez sin kunne
Gehoet und geeret
Daz wart im schire verkeret
Er wart vil gachs geneiget
an im so wart erzeiget
alse an Absalone
Der die uppige chrone
und ouch der werlde suze
gezuckete under die vüze
von siner hösten werdikeit
an ein smeliches leit
Daz sprichet an einer stat da
Media vita
In morte sumus
Daz bedeutet uns alsus
Daz wir in dem tode sweben
So wir allerbest wenen leben
Dirre werlde veste
Stete unde beste
Die aller höste mancraft
Die stet ane meisterschaft
Das mug wir an der kerzen sehen
Ein warez bilde geschen
Daz si zu einer aschen wirt
vor unsdo si liecht birt
wir sin von broden sachen
wartetwie vnserz lachen
Mit weinen erlischet
unser honic ist gemischet
Mit bitter galle
unser blumedie muz vallen
So wir aller beste wenen sin
Daz wirt an dem herren Heinricheschin
Do er in siner hosten werde
Lebete uf dirre erde
Do begreif in die misselsucht
Do man des waren gotes zucht
Sach an sinem libe
Manne und wibe
wart er widerzeme
wartawie geneme
Er eder werlde were
Er wart ir alse unmere
Daz man in vil ungerne sach
als ouch Yobe geschach
Dem edelen und dem richen
Der also jemerlichen
In sinem besten heile
Dem miste wart zu teile
Daz leit Yobder gute
Mit geduldeclichem mute
waz im zu lidene geschach
Durch der sele gemach
Den sichtum und die smacheit
Die Yob von den leuten leit
Des lobete er got und vrewete sich
Do tet der arme Heinrich
Leider nirgen also
Er wart trurick und unvro
250r
Sin honic wart zuo gallen
Sin blume muste vallen
zu heu wart im sin grunez gras
Der eder werlde  was
Sin swebende vroude im versanc
Sin swimmendez herze daz ertranc
Ein trubes wolken dicke
bedackte siner sunnen blicke
Ein swinde bitter donerslac
Der brach im sinen mittentac
Sin morgen sterne der erlasch
ungerne dulte er daz
und schemte sich vil sere
Daz er so groze ere
hinder im muste lazen
vervluchet und verwazen
wart vil dicke der tac
Da sine geburt ane lac
Ein wenic vrewete er sich doch
von einem troste dennoch
Daz im dicke was geseit
Daz die selbe sicheit
were vil misslich
und etsliche genislich
Do wart sin mut und sin acht
harte manicher slacht
und dachtedaz er were
vil lichte genesebere 
Do vur er also drate
Nach der erzete rate
Gegen Munbasilire
Da vant er also schire
Leider niht wan den untrost
Daz er nimmer wurde erlost
Daz horte er vil ungerne
und vur gegen Salerne
Da hiez er vragen zehant
Nach den besten meisterndi man vant
Der sait im da ein mere
Er were genesebere
und were doch immer ungenesen
Meisterwie mac daz gewesen
Sprach der arme Heinrich
war umbe untrost ir mich
bin ich geneslich
Sehetso genese ich
Mir enwirt niht vor geleit
an gute noch arebeit
ich entrewe iz wol vol bringen
an deheiner slachte dingen
Irn wolt denne ewer recht brechen
und wolt an mir versprechen
Beide min silber und min golt
Ich mach euch mir also holt
Daz ir mich harte gerne nert
Mir were der wille unbewert
Sprach der meister aber do
were der arzedie so
Daz man si veile funde
Oder daz man si konde
Mit ichte erwerben
Ichn liez euch niht verterben
Des mac leider nicht gesin
Des muz euch sin die helfe min
ane mine schulde versait
Ir soldet haben eine mait
vollen vriebere
Die in dem willen were
Daz si den tot gerne lide
Daz man si zwischen iren brusten snite
Nu ist iz niht der werlde site
Daz deheine daz durch euch tu
Dane horet anders niht zu
wan der reinen meide herzen blut
Daz were vor ewer sucht gut
Do sprach der arme Heinrich
Daz were gar unmugelich
Daz ieman den erwurbe
Der gerne vor in sturbe
und gar verturbe
250v
Got der sol der arzet wesen
Oder ich bin immer ungenesen
alsus wart im sin trost benumen
Dar umbe er dar was bekomen
Do enhatte er zu der selben vrist
zu sines libes genist
Gegen in gedinges niht mer
Sin bitter herze wart so ser
und ouch sin jamer also groz
Daz in der zit vil gar verdroz
Daz er icht lenger solde leben
er vur heim und begonde vergeben
allez sin varendez gut
Rechte alse in sin selbez mut
und wiser rat gelerte
So er iz aller best kerte
Er machte bescheidenliche
Sine armen vrunt riche
und beriet ouch vremde armen
Daz sich got liez erbarmen
Genediclichen uber der sele heil
Den clostern gab er daz beste teil
Sinen libesten vreunden ze hant
Den bevalch er burge und lant
alsvs tet er sich abe
aller siner varnden habe
und vloch zu hant die leute
verre uf ein wilde gereute
Do er sich von den leuten zoch
und verre in einen walt gevloch
Der daz selbe gereute
In dem wilden walde buwete
Daz waz ein vrier bouman
Der vil selden ie gewan
Ie dehein ungemach
Daz andern gebouren geschach
Die wirs geherret waren
So si des niht verbaren
Si geben schoz und ouch die bete
waz dirre bouman gerne tete
Daz nam sin herre vor gut
wan er in allez uber truc
Daz er deheine arebeit
von vremedem gewalde nie geleit
Des enwaz in den richen
under allen sinen gelichen
Dehein bouman also rich
zu dem zoch sich der arme Heinrich
Swaz er im vor hatte verspart
wie wol im daz vergolden wart
Got hatte dem meyer gegeben
In allen wis ein reinez leben
Er hatte wol einen erbeiten lip
und ein wol werbendez wip
Dar zu hatte er schone kint
Die gar des mannes vreude sint
under den zoch er eine mait
als uns ditz buch hat gesait
wol von zwelf jaren
Si chonde wol gebaren
So rechte gutlichen
Si wolde nie niht wichen
von irem herren einen vûzvûz vuoz 
umbe sine hulde und sinen gruz
Diente si im alle wege
Mit  gutlichen phlege
Die andern hatten  gesin
Daz si zu rechter maze in
wol gemiden konden
So vloch si zu allen stunden
zu im und nirgen anderswar
Si waz sin kurzewile gar
und waz ouch so geneme
Daz si wol zeme
zu kinde einem riche
Mit schoner wetliche
So hatte si ir gemute 
Mit reiner kindes gute
an iren sichen herren gewant
Daz man si selten irgen vant
250v
Dan zu sinen vuzen
Mit suzer unmuzen
wonte si irme herren bi
Dar zu liebete er si
Swa mite so er mochte
Daz der meide tochte
zu irem kintlichen spil
Des gewan er ir vil
Er koufte irwas man veiles vant
Gurtel und harbant
Spigel und vingerlin
Daz kinden liep solde sin
Mit dinste brachte si iz an die vart
Daz er ir also holt wart
Daz er si niht wan gemale hiez
Owewie selden in do liez
Die gute mait alleine
Er dauchte si vil reine
Swie sere aber iz ir riete
Dise kintliche miete
So quam ir doch aller meist
von gotes gabe ein suzer geist
Ir dinst wart also gutlich
Do der arme Heinrich
Dreu jar daz entwelte
Got vil sere quelte
Mit grozen seren sinen lip
Eines tages saz der meyer und sin wip
und ir tochterdie mait
alse uns diz buch hat gesait
Da bi an einer muzecheit
und weinten ires herren leit
Daz claiten sidaz tet in not
Si vorchtendaz ires herren tot
Sere begonde si letzen
und ouch vil lichte entsetzen
von allem irem gute
und daz ouch von herteren mute
wurde ein ander herre
Si claiten also sere
Daz der selbe bouman
Sinen herren vragen began
Er sprachvil liber herre min
Mocht iz mit ewern hulden sin
So vragte ich euch vil gerne
So vil so zu Salerne
von arzedie meister ist
Daz euh ir deheines list
zu üwerme gesunde
Nie niht gehelfen konde
Lieber herredes wundert mich
Do holte der arme Heinrich
Einen tiefen sunfz von herzen
Den jemerlichen smerzen
Den wiste er mit den ougen
Er sprachvreuntdaz ist ane lougen
Daz ich disen schentlichen spot
habe verdienet umbe got
Du weist woldaz hie bevor
stunt vil offen min tor
Mit mancher hande wunne
Ezn hatte under minem kunne
Sinen willen nieman baz dan ich
Daz waz harte ummugelich
Minen willen hat ich mit vrowen gar
Jo nam ich des vil cleine war
Der mir ditz wunschliches leben
von sinen genaden hat gegeben
Do mir min hof als offen stunt
alse aller werlde toren tunt
Den da retet ir tvmmer mut
Daz si ere und gut
wider got wollen han
also betrouc mich min tummer wan
Do des den hohen got verdroz
Der selden pforten er mir besloz
Dane kume ich leider nimmer hin
Daz verlos mir min tvmmer sin
Nu hat got rache an mich geleit
Die smelichen siecheit
250v
Die nieman mac erlosen
Nu versmahe ich den bosen
Die vrumen gern min niht
wie kranc er istder mich gesiht
Des boser muz ich dannoch sin
alrest nu lesestu werden schin
Die grozen treuwedie du hast
Daz du mich siechen bi dir last
wie wenic du mich vleuhest
wie lutzel du mich scheuhest
wie gerne daz ich si bi dir
wie vil dines dinges stet an mir
So ubersechstu doch wol minen tot
wes unwerde und wes not
wart zur werlde grozer mere
hie vor was ich din herre
Din durftige so bin ich nu
vil liber vreuntnu koufes du
Min gemale und din wip
an mir den ewigen lip
Daz du mich sichen bi dir last
Des du mich gevraget hast
Daz sag ich dir vil gerne
Ich enkonde zu Salerne
Einen meister nirgen vinden
Der sich min underwinden
Torste oder wolde
Mit der genistder ich solde
an miner suche genesen
Daz muz ein sulche sache wesen
Daz sie in der werlde dehein man
Mit keiner habe erwerben kan
Mir wart anders niht gesait
Ich solde haben eine mait
Die in dem willen were
Daz si niht verbere
Daz si den tot gerne lite
Daz man si zwischen iren brustensnite
Nu were daz unmugelich
Daz immer deheine durch mich
Gerne lide den tot
Des muz ich dise schemeliche not
Tragen biz an min ende
Daz mir got schire gesende
Daz er sime mayer hatte gesait
Daz hort ir tochterdie mait
Do hatte die vil suze
Ires sichen herren fuze
Sten uf irme schoze
waz mochte sich genoze
zu irem kintlichem gemüte
wen aller engele güte
Dise rede merkete sie gar
und nam ir in irem herzen war
Daz sie iz uz irem herzen nie gelie
biz si des nachtes slafen gie
zu ires vaters vuzen do si lac
und zu irre muteralse sie pflac
Do si beide sliefen
Manchen sunfz tiefen
holte si von herzen
Den jemerlichen smerzen
wiste sie mit den ougen
Daz waz ane lougen
Ir jamer daz wart also groz
Daz ir der ougen regen vloz
uf der slafenden vuzen
Do erwachten die suzen
Do si der trene entstunden
vragen si begonden
waz ir geschehen were
Oder welcher hande swere
Sie also touge clagete
Owewie ungerne si iz sagete
wan daz ir der vater tet
beide mit trewe und mit bet
Daz si iz in muste sagen
Si sprachir mochtet wol mit mir clagen
was kan uns gewerren mere
wen umb unsern herren
252r
Sul wir den verkisen
und ouch mit im verlisen
Beide gut und ere
Jo gewinne wir nimmer mere
Deheinen herren also gut
Der uns tudaz er uns tut
Si sprachentochterhast war
Nu enist uns niht als umb ein har
unser weinen und unser clage
Liebez kintda von gedage
Iz ist vns alse leit alse dir
Leider nu enkunne wir
Im zu staten niht kumen
Gotder hat in uns benumen
hette iz anders ieman getan
Der muste unsern vluch han
Da mite wart si gesweiget do
Die nacht beleip si unvro
Biz an den andern tack
Swez aber ieman phlack
So quam iz ir uz dem herzen nie
Biz daz si aber slafen gie
Des nahtesnach gewonheit
Si hatte ir aber ein bat bereit
Mit weinenden ougen
Si truc also tougen
Nehest irme gemüte
Die albersten güte
Die ie dehein man ie vernam
wa getet ie kint alsam
wan si sich gar des erwack
Gelebete si den anderen tack
Daz si sanzuhant ir leben
vor iren herren wolde geben
Von dem gedinge wart sie do
Ringes mutes und vro
und hatte deheine swere me
wan eine clagedie tet ir we
Iz waz ir grozste sorge
wan siz an dem morgen
Irme herren sagete
Si vorchtedaz er verzagete
So si iz in allen tete kunt
Daz si an der selben stunt
Der state niht envunde
Des wart an der stunde
also groz ir ungehabe
Daz ir muter dar abe
und ir  wart erwacht
alse an der vordern naht
Si richten sich uf zu ir
Si sprachensewas wirret dir
Du bist vil alwere
Daz du dir so mancher swere
In din clage hast genumen
Der nieman mac zu ende kumen
war umbe lezestu uns niht slafen
Sust begonden si die mait strafen
waz ir die rede tochte
Die nieman enmochte
Ir wenden noch gebüzen
Sust wanten sie die suzen
haben gesweiget an der stunt
Ir wille was in vil unkunt
Des antworte in die schone mait
alse uns min herre hat gesait
Den trawe ich harte wol ernern
Irn wollet mir iz danne wern
Ich bin ein mait und han den mut
zu siner arzedie bin ich gut
Er ich in lize verterben
Ich wolde evor in sterben
von dem gedanken wurden do
beide truric unde unvro
Ir muter und ir vater
Sin tochterdie bat er
Daz sie die rede lieze
und irem herren daz gehieze
Daz sie geleisten mochte
wan ir diz niht entochte
252v
Er sprachtochterdu bist ein kint
Die rewe dinedie sint
zu groz an disen dingen
Dune macht sin niht volbringen
Der tot enist so senfte niht
als dir din tummer wan vergiht
Swen iz kumet an die vrist
Daz sin niht lenger rat ist
Dunen muzest ersterben
Mochtest du dan erwerben
Daz du lebetes dennoch
Du queme nie in leit noch
Tu zu dinen munt
Daz du sin nach dirre stunt
Nimmer mere werdest lut
Oder iz get dir uf dine hut
hie wanete er sie do
beide mit bet und mit dro
Gesweiget handonen mocht er
Des antworte im die tochter
Si sprachvaterwie tump ich si
So wont mir doch die witze bi
Daz ir mir sait von dirre not
Ich weiz woldaz des libes tot
Ist stark unde strenge
Swer aber dan die lenge
Mit ungemache leben sol
Dem ist ouch niht zu wol
Swer so dar niht ringet
Daz er uf den alter bringet
Den lip mit micheler not
So muz er doch ligen tot
und hat er dan die sele verlorn
So were im bezzer ungeborn
Daz trawe ich eine wol bewarn
und als tumme baz gevarn
Iz ist mir kumen uf ein zil
Daz ich sin got loben wil
Daz ich den kurzen lip mac gegeben
umb daz ewige leben
Daz ensvlt ir mir niht leiden
Ich wil mir und euch beiden
harte wol mit varn
Ich traw iz eine wol bewarn
vor schaden und vor leide
als ich euh bescheide
wir haben ere und gut
Daz meinet minez herzen mut
wan er uns nie leit gesprach
und uns daz gut niht abe brach
Die wile er uns leben sol
So stet unser sache wol
Liez wir in ersterben
So muste wir verterben
Den wil ich uns vristen
Mit also guten listen
Da mite wir alle sin genesen
Nu gunnet mirzwan iz muz wesen
Die muter weinende sprach
Do si des kindes ernst sach
Gedenketochterlibes kint
wie groz die erbeite sint
Die ich durch dich erliden han
Laz mich ein bezzer lon enpfan
Dan ich dich hore sprechen
Du wilt min herze brechen
Senfte mir der rede ein teil
Du wilt allez din heil
an mir verwurken hin zu got
Gedenkest du an sin gebot
Jo gebot und bat er
Daz man muter und vater
Ere sulle erbiete
und geheizet daz zu miete
Daz iz der sele genist werde
und ein lanch leben uf der erde
Du gihstdu wolles din leben
umbe unser zweier vreude geben
Do mite wilt tu uns beiden
Daz leben sere leiden
253r
Daz din vater und ich
Gerne lebendaz ist durch dich
Du soltlibe tochter min
unser beider vreude sin
unser libe ane leide
unser lieht der ougen weide
unser herzen wunne
Ein blume under dinem chunne
unsers alders ein stap
Lestu uns uber din grab
Sten von dinen schulden
So bistu von gotes hulden
Immer me gescheiden
Daz verdienstu an uns beiden
wiltu unstochterwesen gut
So solt tu die rede und ouch den mut
Durch unsers herren hulde lan
Die ich von dir vernumen han
Si sprachmuter ich getrauwe dir
und minem vater her zu mir
aller der genaden wol
Der vater und muter sol
Leisten eime kinde
als ich daz wol ervinde
von euch beiden aller tegelich
von gotes genaden habe ich
Sele und einen schonen lip
Mich lobet man und wip
und alledie mich sehende sint
Daz ich si daz schonste kint
Daz sie ie haben gesehen
wem sol ich der genaden jehen
wan euch beidennehst gote
Ich wil uz sinem gebote
Nimmer kumenwil iz got
wan iz ist selber sin gebot
Ich dulde iz ane rewe
Ich wil ouch miner trewe
an mir selben niht vergezzen
Iz ist also gemezzen
Swer einen andern so gevrewet hat
Daz er selbe unvro stat
Daz er einen andern kronet
und sich selben honet
Der treweder sei gar zu vil
Durch recht ich euh des volgen wil
Daz ich euch trewe leiste
und mir selben aller meiste
Mutervil seligez wip
Nu ich sele und lip
von ewer zweier genaden han
Lat mich in gotes hulden stan
Daz ich si muze beide
von dem teufel scheide
und sie zu himele muze geben
Dirre kranken werlde leben
Daz ist der sele verlust
Ja nu hat mich der gelust
Noch niht beruret
der zu der helle vuret
Des wil ich gote genade sagen
Daz er mir in minen jungen tagen
wol die witze hat gegeben
Daz ich uf ditz brode leben
achte harte cleine
Ich wil mich alsvs reine
antworten in gotes gewalt
Ich furchteund wurde ich alt
Daz mich der werlde suze
Gezuckete under die vuze
als sie vil mangen hat gezogen
Der zu der helle wirt betrogen
So wurde ich lichte gote entsait
Den müz ez immer sin geclait
Daz ich biz morgen leben sol
Dise werlt gevellet mir niht wol
Ir gemach ist michel arbeit
Ir meistez liep ein herzenleit
Ir suzez lon ein bitter not
Ir lanch leben ist der gehe tot
253v
Nu enhabe wir niht gewisses me
Dan heute wol und morgen we
und doch zu jungest tot
Muterdaz ist ein groze not
Nu enstet geburt und noch gut
Schonesterkewiser mut
Nu envrumet tugent und ere
vor den tot niht mere
Din ungeburt und untugent
vnser leben und unser jugent
Daz ist ein leben und ist ein stovp
unser stete bibet als ein loup
wir sin ein nebel und ein rouch
Er ist ein verschaffener gouch
Iz sei wip oder man
Der sich des niht versinnen kan
und dirre werlde volgende ist
Jo ist uns uber den vulen mist
Der pfeller gebreitet
Swen der blick verleitet
Der ist zu der helle geborn
und enhat anders niht verlorn
wan die sele und den lip
Mutervil seligez wip
Gedenket an muterliche treuwe
und senftet ewer rewe
Die ir hat umme mich
So versinnet ouch min vater sich
Der ist ein also wiser man
Daz er selden vil wol gan
Nu wizzet ir woldaz ir
Ewer vreude mit mir
Niht lenger muget gehan
Ob ich lebendic bestan
Ein wenic lenger biu
zwei jar oder dreu
So ist min liber herre tot
So kume wir in so groze not
Daz uns besweret wirt der mut
und daz ir dan so groz gut
Mit mir niht muget gegeben
Ichn muze lichte wirs leben
Daz euch liber wer were ich tot
Nu swige wir dirre grozen not
Daz die uns icht werre sere
und uns min liber herre
also lange müze leben
Daz ir mich einem manne mugetgeben
Der mir si rich und wert
So ist geschehendez ir beide gert
So went irmir si wol geschen
anders hat mir min mut verjehen
wirt er mir lipdaz ist ein not
wirt er mir leitdaz ist der tot
So han ich immermere leit
und bin mit mancher arebeit
Gescheiden von gemache
vnd lebe in sulcher sache
Daz mancher vrowen wirret
und sie an vreuden irret
Nu bin ich euh vil traute
vil seligen leute
Daz keret mir zu gûte
und gevart nach minem mûte
Setzet mich in den vollen rat
Der da nimmer zergat
Min gert ein richer bouman
Dem ich mines libes gan
zwar dem sult ir mich geben
So ist wol bestat min leben
Des pluck get eben und wol
Sin hof ist allez ratez vol
Da enmeut ros noch rint
Noch die weinenden kint
Din ist zu heiz noch zu kalt
Da enwirt der jare nieman alt
Der alt istder wirt junger
Do enist weder durst noch hunger
Don ist weder haz noch nit
Niht wan meyen weter ze aller zit
Da enist deheiner slachte arebeit
Niht wan groze libe ane leit
zu dem wil ich mich zihen
und wil den bu vlihen
Den der schure und der hagel sleht
und der wack abe tweht
Swaz der man ie geranc
Daz jardaz ist in so lanc
waz er geerbeiten mac
Daz nimet vil lihte ein halber tac
Den bauden wil ich lazen
Der sei von mir verwazen
Ich wil mich halden
an unsern herren Ihesum Crist
Des genade also stete ist
Daz si nimmer zurgat
und daz er zu mir armen hat
also gute minne
So zu einer richen kuneginne
wold ir erwenden mir min heil
zwarich laz euch ein teil
E nach mir weinen
Ich wil mir bescheinen
Des ich mir selber schuldic bin
zwar ich wil ie dar hin
Da ich volle vreude vinde
Ir habet noch mer kinde 
Die lazet ewer vreude sin
Durch gotgetrostet euch min
Der kurzen vrist und der zit
Die also schire geleit
Morgen hilfet uns min got
uz von allerslachte not
Des todes genese wir
und ich verre baz dan ir
Izn kan mir nieman erwern
Ichn welle wol ernern
Minen herren und mich
Muterich horte dich
Klagen und sprechen e
Iz tete dinem herzen we
Soldestu ob minem grabe stan
Du wirdest sin vil wol erlan
Du stest ob minem grabe niht
Dortdo mir der tot geschiht
Daz enlet dich niman sehen
Iz sol zu Salerne geschen
Do si daz kint sahen
Nach dem tode also gahen
Daz iz so wizlichen sprach
und menschliche recht brach
Si begonden achten under in
Daz den wistum und den sin
Nicht vol brengen konde
Dehein zunge in kindes munde
Si jahendaz der heilige geist
were der rede volleist
Der ouch sente Nycolavs pflac
Do er in siner wigen lac
und in die wisheit larte
Daz er zu gote karte
Sin kintlich gemute
Si bedachten sich in irre gute
Daz si niht enwolden
Noch weren ensolden
Daz si sich hatte an genumen
Ir were der sin von gote kumen
vor jamer erkalte in der lip
Daz der meyer und sin wip
In dem bette sazen
alsodaz si vergazen
Der zungen und der sinne
Durch des kindes minne
an den selben stunden
also daz sie enkunden
Ein wort niht gesprechen
Die giht begonde brechen
Die muter vor leide
Do sazen si beide
und dachtenwaz in tochte
Nu ir niman enmochte
Erwern irn willen und irn mut
Izn were niht also gut
So daz si iz ir gonden
wanne sinen konden
Ir nimmer werden ane baz
Geviengen si der rede haz
Daz mochte in an irem herren
Gewerren harte sere
und gewunnen anders niht da mite
wan mit willeclichem site
Jahen si beide do
Daz sie der rede weren vro
und daz iz sie douchte in irem mut
vil getreulichen gut
Des vreute sich die schone mait
Do iz ein wenic waz betait
Do gienc siedo ir herre slief
Sin gemale im do rief
Liber herreslafet ir
Neingemalewas wirret dir
wie bistu heut also vru
Si sprachda twinget mich dar zu
Daz jamer ewer siecheit
Daz weiz ich woldaz ist dir leit
Daz hastu an mir erzeiget wol
als dir got iz vergelten sol
Nu enmac iz rat niht gesin
Trauwenlieber herre min
Des sol werden vil gut rat
Sint ewer dinch also stat
Daz ich euch gehelfen mac
Ich ensume iz nimmer tac
Ir habet uns also gesait
Ob ir hettet eine mait
Die den tot gerne lite
Da geneset ir mite
Die wil ich selber gerne sin
Ewer leben ist nutzer denne min
Got müz iz sein geclait
Daz ir iz so lange hat verdait
wer iz mir vor drin jaren kunt
Ir weret nu wol gesunt
Do genadet ir der herre
Des willen also sere
Er sprachgemaleja enist der tot
Niht ein also senfte not
als du dir hast erdaht
Du hast mich des wol innen braht
Mochtes dudu hulfes mir
Des genuget mir von dir
Ichn sol an dich niht geren
Du macht michvroweniht erneren
Daz du nu gesprochen hast
Der treweder du an mir begast
Der vergelde dir got
Iz were der lantleute spot
Daz ich mich nach dirre stunde
Der arcedie underwunde
und mich daz niht vervienge
als iz vil lichte ergienge
Du tust als die kint
Die gehes gemütes sint
Swaz in kumet in den mut
Iz sei ubel oder gut
Dar zu wirt in vil gach
und gerewet si dar nach
Gemalealso tus du
Iz were dir zu mute nu
Der iz von dir nemen wolde
als man iz wol enden solde
So gereuwe ez dich doch
Daz sie sich noch
bedechtedes bat er
Din muter und din vater
Die mugen dinvroweniht enpern
Ichn wil ires leides niht gern
Daz si mir ie genaden taten
Daz sie dir beide raten
Liebes kintdes volge du
Do lachte er nu zu
wan er sich wenic des versach
Daz im sint da von geschach
Ir vater und ir muter ie
Die sprachen beidensamt hie
Trewenlieber herre
Ir habet uns vil sere
Geliebet und geeret
Izn were niht wol verkeret
wirn lontens euch mit gute
unser tochter ist des zu mute
Daz si den tot durch euch dole
Nu gunne wir iz euh wole
wir haben si dar umbe her bracht
Sie enhat sich kurze niht bedaht
Is ist heute der dritte tac
Daz si uns allez ane lac
Daz wir iz ir gunden
Nu hat sie iz an uns funden
Got laze euh mit ir genesen
wir wollen ir durch euh entwesen
Do nu sin gemale bot
Vur sinen sichtum iren tot
Do er irn rechten ernst sach
Do wart michel ungemach
Ruweclich gebere
und misliche swere
Do begonde sich heben under in
zwischen dem kinde und den drin
Do begond ouh der herre
zu denkene also sere
an des kindes trewe
In begreif ein sulche rewe
Daz er si druckete an sine bruste
Daz er si niht enkuste
Daz liez er durch sine sicheit
Dar nach begreif in ein suzez leit
Daz er zwivelen began
weder im bezzer were gelazen odergetan
zu jungest do bedachte sich
Ir herreder arme Heinrich
und begonde sagen under in
Groze genade in allen drin
Der trewe und des gutes
Die mait wart riches mutes
Do er ir volgte gerne
Sie bereiten sich gegen Salerne
So sie aller baldest mochten
Daz der meide wol an tochte
Daz waz schire bereit
beide pfert und kleit
Daz sie nie getruc vor der zit
hermel und samit
Den besten zobelden man vant
Der was der meide gewant
Sie schein so schone in swacher wat
Daz si nu gar zu wunsche stat
Nu enkonde euh nieman vollen sagen
Ires herzen rewe und ir clagen
Der muter grimmigez leit
und ouh des vater arbeit
Do si ir libez kint von in
vurten so gesundez hin
In einen so gewislichen tot
wan daz in senfte dise not
Die reine gotes güte
Da von ouch daz gemüte
Dem cleinen kinde bequam
Daz iz den tot gerne nam
Iz was uf iren rat bekumen
hie mite so was in benumen
Mancher hande swere
wande iz anders wunder were
Daz ir herze niht zebrach
zu liebe waz in ungemach
und enhatten keiner slachte not
umbe ires liben kindes tot
Sust vur gegen Salerne
vrolichen und gerne
Die mait mit irem herren
Si cleite niht so sere
wan daz der weck so lanc was
Daz sie so lange 
Do er uf daz velt quam vor die stat
Got er innenclichen bat
Daz sin reise were bewant
Daz er ein so wit lant
hinder im muste lazen
Des bat er got uf der strazen
Oder mit deheinen uneren
ze lande musten keren
Des antwort im die schone mait
Si sprachherreiz ist euh wol gesait
Swer lip hat und gut
Der sal ouch haben steten mut
und sol got vor ougen han
So enkan im nimmer misse gan
Nu tut iz nochdes volget mir
Lat ewer zwifeliche gir
Got gibt euch wider ewern gesunt
Ir gewinnet gutes vollen grunt
Do er si do brachte
Da hinda er gedachte
Do er sinen meister vant
Do wart in alzehant
werlichen gesait
Er hette bracht eine mait
Die er in gewinnen hiez
Dar zu er sie in sehen liez
Iz douchte in gar unbillich
Er sprachkinthast du dich
Dise rede selber an genumen
Oder bistu hie zu bekumen
von dines herren dro
Do antworte sie im so
Daz sie selber die rete
von irem herzen hete
Des nam in michel wunder
Er wiste sie besunder
hin dan also sere
vund vrageteob sie ir herre
Die rede hette uz erdrot
Er sprachkintdir ist not
Daz du dich bedenkes baz
Ich sage dir rechteumme waz
wie du den tot liden must
Ob du daz niht gerne tust
So ist din junger lip tot
und vrumet uns niht umb ein brot
Nu enhil mich dines willen niht
Ich sag dirwie dir geschiht
Ich zie dich uzso stestu bloz
So ist din schame also groz
Die du von schulden dan hast
wan du nacket vor mir stast
Ich binde dir bein und arm
Sichob dich din schoner lip erbarm
Ich sag dir dinen smerzen
Ich snit dich gegen dem herzen
und breche iz lebendic von dir
vrewelinnu sage mir
wie din wille dar umb ste
Izn geschach nie kinde so we
als dir von mir muz geschen
Daz ich iz tun sol und sehen
Da habe ich groze sorge zu
Sichwie iz dime libe tu
Gerewet iz dich harez breit
So habe wir alle unser arbeit
und du dinen lip verlorn
also wart sie teure besworn
Daz sie sich erkente stete
Oder sich sin abe tete
Des antworte im die schone mait
Si sprachich bin ein lutzel verzait
Einen zwifel ich gewunnen han
wizzet irwie der ist getan
Ich vurchtedaz unser arebeit
von ewer grozen zageheit
under wegen belibe
Izn zeme einem wibe
Ir sit eines hasen genoz
wie ist ewer angest so groz
umb daz ich ersterben sol
zwarir handelt niht wol
Ewer kunst und ewer meisterschaft
Ich bin ein mait und han die kraft
Turret ir mich sniden
Ich tar iz wol erliden
Ir sait mir vil von sulcher not
und wenet desdaz ich den tot
Dester vorchtlicher lide
Da habet ir mir gelibet mite
und reitzet mich vaste dar zu
Ich weiz woldurch wen ich iz tu
In des namen iz geschen sol
Der erkennet starken dinst wol
Er let sin ungelonet niht
Ich weiz wolwez got selbe giht
wer sweren dienst leiste
Des lon sie allermeiste
Disen grimmiclichen tot
und dise engestliche not
und dise misliche arebeit
Die ir mir vor hat geseit
Die hatte ich an euch wol vernumen
Ichn were niht anders here kvmen
wan daz ich mich weste
an trewen also veste
Daz ich iz wol dulde
Mir istbi ewere hulde
blode vorchte gar benumen
und ein so vester mut bekumen
Daz ich als engestlichen stan
als ich zu einem tantze sulle gan
Ich bin mir selber also holt
Ich gebe min kupfer umme golt
wie groz daz min angest ist
Der tot sich in einer vrist
an minem libe vol enden mac
Mich duncketdaz der eine tac
Nicht zu ture si gegeben
umbe daz ewige leben
Durch gotendet iz enzit
Lat sehenob ir ein meister sit
Do ervur erdaz sie were
Genuc wandelbereGenvc wandelbere 
Do vur er sie hin dan
wider zu dem sichen man
Er sprachherrehabet vrolichen mut
ewer maitdie ist gut
Ich mache euch schire gesunt
Dannen vurt er sie an der stunt
In sin heimlich gemach
Da in nieman ensach
Einen rigel warf er vor die tur
Der arme Heinrich beleip da vur
Er wolde in niht sehen lan
wie ir ende were getan
In der kemenaten
Die er wol beraten
von guter arzedie vant
Do hiez er si alzehant
ab zihen daz cleit
Des was sie vro und gemeit
Eer daz wort vollen sprach
Iren bussem sie uf brach
und raiz die claider von der nat
alsust beleip sie ane wat
vor im stende also bloz
und enschemte sich niht harez groz
Do er sie so schone sach
In sinem herzen er do jach
Daz sulche creature
Der werlde were teure
So sere erbarmte sie in
Daz im der mut und der sin
an ir vil nach was verzait
Do sach ouch die schone mait
Einen tisch bi ir stan
Da hiez er si uf gan
Der sprunc was ho und lanc
Den die mait uf den tisch spranc
Dar uf er sie vil vaste bant
Do nam er in sin hant
Ein messerdaz da bi lac
Des er zu sulchen dingen pflac
Daz waz scharf und breit
wan daz iz niht so wol ensneit
als im lip were gewesen
Do sie niht lenger solde genesen
Do erbarmte in ir not
Er wolde ir sanfte tun den tot
Do lag ouch da bi ein
also gut wetzstein
Da begonde er an strichen
So rechte muzlichen
Do er daz strichen erhorte
Sine vreude gar verstorte
Der arme Heinrich da fur
Er lac uzen bi der tur
und gedacht an des kindes trewen
Si begonde in sere rewen
und erbarmte in also sere
Daz er sie nimmere
Lebendic solde sehen
Er begonde suchen und spehen
Biz daz er bi im vant
Ein hol gen durch die want
Do sach er sie an den stunden
Nacket und gebunden
Do er sie so schone an sach
wider sich selben er do sprach
Du hast einen alweren 
Din sin ist leider worden kranc
Daz du ditz smelich leben
Daz dir got hat gegeben
Niht geduldiclichen treist
und du doch niht rechte enweist
Ob dich des kindes tot ernert
Swaz dir got hat beschert
Daz laz allez geschen
Dunen macht ires todes niht gesehen
Die rede liez er alzehant
Er begonde cloppfen an die want
und hiez sich lazen dar in
Do sprach der meisterichn bin
Nu niht muzick dar zu
Daz ich euh icht uf tu
Beitetbiz daz ditz erge
Neinameistersprechet mich e
Er gienc und liez in ein
Do gienc der arme Heinrich hin
Do er  gebunden sach
wider den meister er do sprach
Ir sult sie wider uf lan
Daz gutals ich gedinget han
Daz wil ich euch vil gerne geben
Ir svlt die mait lazen leben
Ir lipder ist so minnenclich
weizgotnu enmag ich
Ires todes niht gesehen
Gotes wille müze geschen
Er sprachherrewolt ir der trewepflegen
Daz ir euch der meide wollet erwegen
Liber herredaz tut
Ir willeder ist gar gut
Euch zu buzen ewer not
Darumbe müste sie ligen tot
Der arme Heinrich do sprach
Ewold ich ditz ungemach
Dulden me wan tusent jar
Ich gewere euchmeistervor war
Daz ir mir niht weizzet wan gut
Er gewan einen vrolichen mut
Do er die mait solde lazen leben
Sust wart der lip ir gegeben
Daz sie des todes niht enleit
Die bant der meister uf sneit
und reichte ir die cleider
Da geschach nie h chinde leider
Do die mait do gesach
Daz ir daz sterben niht geschach
Da was sie besweret mite
Si brach ire zucht und ire site
zu der brust sie sich sluc
Si hatte leide genuc
Si roufte und cratzte sich
Ir geberde was so jemerlich
Daz iz niman hette gesehen
Ime were zu weinnen geschen
vil lute sie schrei
Owe mir und owi
Daz ich ie wart geborn
Nu han ich alrest verlorn
Die richen himel chrone
Die were mir zu lone
heute gegeben umme die not
Nu alrest bin ich tot
Owe genediclicher Crist
was eren vns benumen ist
Mime herren und mir
Nu enpirt er und ich enpir
Der erender uns was gedacht
Ob ditz were volbracht
So were im der lip genesen
und ich müst immer heilic wesen
Wie vil sie bete vmme iren tot
Ir waz dar zu so not
Do nieman nah irem willen tete
weder durch drowe noch durch bete
Do hub sich ein schelden
Si sprachich muz engelden
Mines herren zageheit
Mir han die leute war geseit
Ouch han ich iz selber wol gesehen
Ich horte ie die leute jehen
Min herre were biderbe und gut
und trüge vestes mannes mut
Daz weiz got wolsie hant gelogen
Die werlt was ie mit im betrogen
Er waz alle sine tage
und ist noch heute ein werlt zage
Daz im einez kindes tot
hulfe uz aller slachte not
Daz im ane sunde were
und ane laster bere
Des entraut er niht verdvlden
Seherrevon welchen schulden
Erschrachet irdo man mich bant
Nu was doch ein veste want
zwischen euch und mir
Daz weiz gotnu enturret ir
Einen vremden tot niht gesehen
Ich wil euch getreulichen jehen
Daz euch niman niht entut
Izn si euch nutze und gut
Ob ir iz durch ewer trewe lat
Daz ist ein also swacher rat
Des euch got niht danken wil
Der trewender ist gar zu vil
und mines herzen sere
Irn durfet nimmer mere
Mir noch anders nieman clagen
Ich wil iz euch werlichen sagen
versprechet ir daz arzetbuch
Daz weiz got wolich enruch
wie lange euch got den lip quelt
Nu ir mir niht volgen welt
Swaz sie scheltens begienc
Der arme Heinrich iz enphienc
Geduldiclichen und wol
als ein hubsch ritter sol
Dem gantzer tugende nie gebrast
Do der genadeloser gast
Sinen arcet hatte bereit
und sine juncvrowen gecleit
Do vur er heim zu lande
Swie daz er erkande
Daz er da heime funde
Mit einem gemeinem munde
Nicht wan laster und spot
Daz liez er allez hin zu got
Do hatte sich ouch die schone mait
Gar verweinet und verclait
Sere biz uf des libes tot
Do erkante ire trewe und ire not
Cordis spectator
Da deheines herzen tor
Nimmer vor beslozzen ist
Der durch sine suze list
an ir des geruchte
Daz er sie versuchte
also rechte volleclichen
also ouch Iobenden richen
Da gedacht unser herre Crist
wie liep im trewe ist
und schiet sie do beide
von allem irem leide
und machte den herren uf dem wege
von unsers herrengotes pflege
an aller slachte zwifele
Gesunt an sinem libe
Daz er also wol genas
als er vor zweinzick jaren was
Do die zeichen waren geschen
als wir ditz buch horen jehen
Da die warheit stet geschriben
Izn wart niht lenger verswigen
Iz wurden lantmere
Daz genesen were
Der gute herre Heinrich
Des vreweten alle die leute sich
Izn e neme denne eteswen der nit
Der sider Adames zit
In der werlde nie gelac
Noch geleit biz an den sunestac
Sine vreuntdie besten
Die sine kunft westen
Die riten und giengen
Do sie in enpfiengen
Gegen im wol dri tage
Sie geloubeten anders deheiner sage
wan irre selbes ougen
Sie kuren die gotes tougen
an sinem schonem libe
Dem meier und sinem wibe
Man enwolde sie rechtes rouben
Ir sult  wol gelouben
Daz sie da heime niht beliben
Die vreude ist immer ungeschriben
Die sie beide hatten
Do sie got hatte beraten
Daz gesunt waren bede
Ir tochter und ir herre
Do si dar solden gahen
Da si sie musten enphahen
Der gruz waz under sniten
Mit seltzenen siten
Mit drivalder vreude groz
Daz daz lachen begoz
Der rein von den ougen
Daz ist ane lougen
Sie chusten irer tochter munt
Michel me wan dristunt
Ouch enpfiengen in die swaben
Mit herlicher gaben
Iz waz ein williclicher gruz
Ein ieslich man des jehen muz
Daz grozer vreude nie wart
Swie ez an iren heim vart
vurbaz ergienge
Oder wie sie in enpfiengen
was mag ich da von gesprechen me
her wart richer vil dan e
Des gutes und der eren
Daz begonde er allez keren
williclichen hin zu got
und leiste gerne me sin gebot
Baz dan er etete
Des beliben sie in irre stete
Der meier und die meierin
Die hatten wol umbe in
verdienet ere unde gut
Er hatte nie so swachen mut
Izn were rechte wol bewant
zu eigene gab er in alzehant
Die erde und die leute
Daz breite gereute
Do er siecher ufe lac
Siner genaden er do pflac
als einer vrowen und baz
Daz recht gebot im daz
ouch sin tugenthafter mut
Er was getrewe und gut
Da begonden im die wisen
Raten und prisen
umb elich vriat
ungesament was der rat
Er sait in allen sinen mut
Er sprachduncket iz si gut
Er wolde sich besenden
und die rede vol enden
wie schire er da gewan
vreuntmagedinstman
und tet iz in allentsamt kunt
Do sprach ein gemeiner munt
Iz were gut und zit
Do hub sich ein michel strit
zwisschen dem rate unnder in
Der eine reit herder ander hin
als die leute taten
Do man solde raten
Ir ratder was mislich
Do sprach der herre Heinrich
Nu ist euch allen wol kunt
Daz ich waz in kurtzer stunt
harte ungeneme
und der werlde wider zeme
Nu han ich einen gesunden lip
Nu schewet mich weder man noch wip
von unsers herren gebot
Nu ratet mir alle durch got
von dem ich die genade han
Die got zu mir hat getan
wie ich iz verschulde wider in
Sie sprachennemet euch einen sin
Daz euh lip und gut
Dar zu ewer steter mut
Immer undertan si
Sin gemale stunt da bi
Die er vil liplich ane sach
Er umbe viench sie und sprach
Nu ist euch allen vol gesait
Daz ich von dirre schonen mait
Minen lip gesunden han
Die ir vor euh hie sehet stan
Nu ist si vri als ich da bin
Nu retet mir aller min sin
Daz ich sie zu einer vrowen neme
Got gebedaz iz euh wol gezeme
Mag aber des niht ergan
So sult ir merken sunder wan
So wil ich bliben ane wip
wan ich han ere und lip
Nicht wan von iren schulden
Durch unsers herren hulden
So bit ich euh alle
Daz iz euch wol gevalle
Daz dauchte sie ein fuge
Da was pfaffen genuge
Die gaben sie im zu einer elichen kone
Nach wertlicher wone
wolden sie beide niht
zweier engel zuversicht
Schein an in beiden
Do sie sich musten scheiden
Er hette sie wol beslafen
nach wertlichem schafen
vor gote er sich ez getroste
Er tet sich in ein kloster
und bevalch sich der vrien
Gotes muter sente marien 
Da bi in einen tum
wie mocht er immer baz getun
Da verdienten sie beide geliche
Daz vrone himelriche
Daz lon müz uns allen
zu jungest gevallen
Daz sie da genamen
Des helfe uns gotamen
Durch siner martir ere
Nu enist der rede niht mere