Uff andingen Wedell Hoffachers und

Burckhart Steiners hatt bezügt, Verena

Wagenmannin, uff gebott heren raths-

richtes uff zinstag vor ascens di 1572

Namlich alls Hans Wagenman ir bruoder

sälig ungefarlich vor dryen wuchen hie vor

zum kopff kranck glegen, syge sy ettlich tag by

im gsin, und uff ein zytt wäre ein andrer

kriegsman ouch in der camer, den sy nit kennt

habe der redte, O Hans wie hast du so

übell than das du zu dim volk gangen hinus bist

dann du bist an din Tod gangen, sy habend

dirs zuo essen gen und dir vergeben, er aber

schwige darzu, als er nun hinweg wäre

fragte sy zügein inne das ers doch

sagen söllte ob er vermeinte das es ime zu

essen geben wäre (Er habe ouch schon dz hochwürdig

sacrament empfangen ghan) redte er ach

nein es ist Gotts gwallt Gott sucht mich allso

heim dz wil ich gedultig lyden, sol ich dann

sterben, wil ich aber willig sin, es hatt

mir da gar niemant nütt zu essen geben,

diser kriegsman weisst nit was er redt ist

gar ein böser mensch, ein falscher spiler ich

hab in im krieg wol glert bekennen

und sin volck habe ime dz best und alles

guotts gethan.