Ich Johannes von Columbier herr daselbs und castellan zuo Iverdon

tue kund aller mencklichen, das uff heut erschynen vor dem ersamen

Betrand Lachery (?) statthalter der gewelben (?) castlanye, Petter Umbrecht

von Wallis an einen, und Anthony vom Stein, Costentz bistums anders

teils, hatt der gemellt Petter durch sinen redner Nicoletten Iayod fur

tragen und reden lassen, wie wan sye by zweyen iaren ungefarlich

vergangen, do er ein gesellschafft gefürt dero houptman er were, indem

krieg zu Alexandrien, und als sy andem end wurden sy von iren

vigenden getrengt, das sy die statt rummen, und abzuchen müsten gen

cassal, da selbst sye er der genant Petter beroubt worden, um sin ross

und all sin gellt kommen, das beschähe im von lampartern, und

mochte also sin gesellen die er under imm hette nit bezallen und

zu rechtvertigung ouch kuntschafft der warheitt sölchs obgeschribnen

dingen rufft er an den obgemellten statthalter, das er imm wöllte

hören zu kuntschafft den obgemelten Anthony vom Stein, und imm

demm nach siner sag glouplich urkund brieffe geben, hatt also der

genant statthalter uff anrüffen des vermellten Petter Umbrechts, den

genanten Anthony verhört und gefragt by sime eyde, den er vor

umm dz er die warheit sagen, zu gott und all helgen uff dem heligen

evangelio gesworen, der als by sinem eyde geredth und bezüger

hatt, wie Petter an imm gedingt, däby und mit sye er gesin do

Petter von Lampartern beroubt, um sin ross und gellt kommen, und

sye das die ursach sins wüssens, dann er der gemellt zug sye

do maln ouch indem kriegn nit under Pettern oder siner gesellschafft

sunder under einem andern houptman gewesen, doch sye imm nit wüssend

wie fil der summ gewesen die imm genommen, sölchs hatt der obgenant

zug durch den obgenanten Nicollet Iayod reden lassen in welscher

zungen, und begertte Petter Umbrecht inn sölch sag gloublich urkund

zegeben sye.

(2)