Hochgeachtte, streng...

Es möcht üwer wisheitt villichtter wunder nemen

von weggen das wier üch denn leüffer nit vor ettlicher zitt

zu üch heim geschicktt habent, das aber allein harum beschechen das

wier kein antwortt vom hoff empfangen, desglichen kein gelltt

zu dem iuncker Balttasar von Sollothurn zuo uns komen ist den

15 tag iulli, by welchem wier üch ietzunder schribentt, welcher

üch auch berichttnus wirtt geben unser armutt halber, dan die

knechtt werden wellen gelltt habenn den iren heim zu schicken, so

so ist es nitt müglich, diewill wier nit bezaltt werdentt, demnach

g lieben herren und gettrüwe veter, so habent wir zuo Gronen

andere houptlütt, lüttinamptt, und obreste richtter, ann den

abgangnen statt gesetztt, alls namlichen an haupttman Sonnenbergs

und houpttman Hasen selligen statt, sind houptlütt worden Kaspar

Has, und Hans Kryenbüell, und an houpttman Spenglers selligenn

statt und houptman Jost Lusis selligen, Ludwig Seggisser und

lüttinamptt Wasser, inen an heren obrister seligen statt, An der

Haldenn, sindt houptlüt worden fendrich Schlegell und lüttinampt

Caspar Ziebig von Schwitz, an statt houpttman Büeller selligen ist

houpttman worden sin bruoder, und lüttinanmpt Pfill von Schwitz

an statt houptman Henslis selligen ist keiner gesetzt, sunders

den iungen Lusy allein die houpttmanschafftt bliben, und

an Hans Kunnholtzen selligen des obristen richters statt ist

dargebenn iuncker Phillip Plater, es sindt ouch alle emptter

widerum besetztt, unnd alls die emptter besetzt worden, handt

die herrenn die fendlin inn dry stett, neuerlich gan Wallantzen

acht fendlin, gan Teng drü vendli, gann S. Marellin dry

fendlin, von Goman danen, das es innen zu beschwerlich

gwessen, zwey regimentt alda zu erhaltten, theillen wellen

(2)

da dann gutte pletz und zimlich thür, handtt unsere knechtt nitt

gann Wallantzen gwellen, dan es nitt mer dan dry mill wegs,

und die klein sindt ist, sindt die knechtt zu samen glouffen

handt versamlungen gmacht und zu samen inn eydtspflichtt

sich verbunden si wellentt platt nit gan Wallantzen, handtt

allso ein sämlich, rumor und wessenn gheptt, das nitt darvon

zu sagenn, inn dem der her von Conde, mit samptt dem Munbrung (?)

den 26 tag zu Roman ankomen hatt er die fendlin, anderist

hin bescheiden, namlich von stetten sindt gan Wallantzen zoggen

fünffe fendlin, die übrigen, sindt zu Roman bliben

demnach ist herrenn obristen Danners fendlin, houpttman Batt

Jacob Feeren fendlin, ouch das glarner fendlin und houpttman

büellers fendlin gan Wyenen zogen den 28 tag iully, und houptman

Heinrich Pfiffers fendli, houptman Schlegells, houpttman Lusis fendli

die ligentt zuo uns nebentt Thurmung, und sindt des Letters und

houptman Meyenbergs fendlin, ouch houptman Hasen fendlin gann

S. Marcellin gezoffenn, alda wie bescheidts, und gelts vom hoff

erwarttendtt, und ist der her von Condenn den 27 tag mit dem

Munbrung hinweg gfaren gan Garnoble, wier habent ime ouch umb

geltt und bescheidtt angredtt, aber wenig gutts bescheids von ime

empfangen, dan er uns geanttwurtt er wüsse kein gelltt, es

kumptt uns ouch stetz kein antwortt vom hoff, das uns hechlich

bedurett, derhalben bittenn wir üwer wisheitt zum aller

höchstenn, ier wellent uns inn üwerem vetterlichen schirm all zitt

lassen befolchen sin, und uns üweren früntlichen ratt mitth-

eillenn, ouch inn üwerem schriben, gegen kün Mt früntlich

ingedenck sin, damit wier mögen bezallt werden, wier bittendt

¨wer weisheitt ouch gantz früttlichen, und zum höchsten so ettwan

knechtt heim koment un uns gegen üch verlössteren oder verung-

limpffen weltten so wellent ir uns allzitt zu unser früntlichenn

verantworttung komen lassen. Hiemitt hochgeachte, ...

(3)

...Datum

zu Romann, denn 27 tag iullyett anno

1575

üwere allezitt gettrüwe, underthenige willig

dyenner, und trüwe sönn iederzitt

houptmann Batt Jacob Feer, houpttmann Heinrich Pfiffer

und houpttman Ludwig Segisser