Unsern fründlichen...

...Anna Berner, zu Grenchen

in unser herrschaffte an dem Läberberg wonhafftt, hatt unns

zuerkennen geben, wie dann ir eeman Benndicht Kistler

selig, in vergangnem delphinatischen zug under üwerem

burger houptman Hasen seligen unnd sinem mittgsellen gedientt,

wölliche im noch ettwas usstendiger besolldungen schuldig

beliben, deren sy unnd ire kinder in grossem manngell

stannden. Mit underthäniger pitt an unns wir wöllten

sy gegen üch mitt unnserm schryben befürdern darmitte

sy selbigen usstanndt dester bass zuhannden bringen

moge, verhofftte sy dero wol zugeniessen. So nun wir

ir anbringen der billickeytt nitt ungmess befunden, unnd

dann wie sy alls unsere angeborne underthanin zefürdern

wol geneigt, da so langt an üch unser fründlich pitt, ir

wöllen mitt dem üwern obstatt so noch in leben, sampt

des abgestorbnen houptmans erben, verschaffen das sy

dise arme frowen, umb das sy iro von gemellts irs eemans

seligen usstendigen besoldungen, ouch irer rödlen, unnd

erbarer rechnunge schuldig sindt, gütlich bezalendt und sy

nitt in kosten verharren lassendt, darmitte sy ire kleine

kinder dester bas erziehen moge, dasselb umb üch, unnd

die uwern in meeren zubeschulden sind wir geneigtt, üch

heirmitte Got dem heren bevelchende. Datum frytage nach

omnium sanctorum 1575.

Schullts und rhatt

der statt Solothurn