Zinstags vor martini

Uff hütt ist in MGH gefencknuss komen

Hans Böttschli von Büren, umb das er söllte

eine zur eegenomen haben, die noch ein man im

krieg habe.

Er zeigt an, es sige Anna Nättsch Bottschafftt

uss dem krieg khomen, das ir man tod sige,

und alls er söllichs vernomen, das ir man tod

sige, da sige die Anna zu ime khomen

und ime klagt wie sy mitt iren kinden so grossen

hunger und mangel habe, alls er gehörtt

das sy so grossen mangel mitt iren kinden habe,

heige er zuo iro geredt, wann sy ime das

best thuon welle, wie er iro so welle er

iro hellffen ire kind erziechen, dann er habe

kein frowen, das habe sy im verheissen

doch habend sy ein andern gar kein ee

verheissen, so aber der man nitt wider

heim khomen wäre, so hettend sy ein andern

genomen.

Mittwoch darnach

Hans Böttschli blybt by voriger antwort, habe iro nüt

verheissen, wann aber der man tod wär gsin hettend

sy villicht ein andern gnomen.

(2)

uff gemellten tag

Uff hütt ist ouch in MGH gefencknus komen Anna

Nätsch von Büren umb das sy 3 eeman

sölle genomen haben.

Sy zeigt an, alls ir man zum ersten in krieg zogen

und iro bottschafft khomen, er sig bis uff den

tod verwundt, und sige nitt möglich das er wider

heim khome, da sy söllichs gehörtt, habe sy

sich mitt einem schmidknecht vergangen, und

2 mal mitt ime zeschaffen gehept, doch habe

sy ein andern kein ee verheissen.

Zum andern alls ir man ietz letstlich in Franckrych

zogen, und iro abermals bottschafftt khomen,

ir man sige gwüsslich tod. Alls sy söllichs gehört

und so grossen hunger und mangel gehept, sige

sy mitt Hansen Böttschli über khomen, das

sy dess einen worden sigen, und dess halb

schwanger by ime worden, doch habend

sy einandern der ee gar nie gedacht

bis das sy grundtlich bericht werdent, das

ir man tod sige. Alls dann hetten sy, ein

andern nemen, und die ee verheissen wöllen.

Mittwoch darnach

Anna Nättsch blybt auch by vorigem bscheid ist gar

gichtig das sy weder dem Pötschli noch dem vorigen

die ee verheissen anders dann so der man gstorben wär.

Sy habe ouch kein gellt dem keller iren eeman nit

gnomen er thüye iren unrecht, was sy sonst

than darzu hat sy die arnmut und mangel bracht.

(3)

[Montag nach Martini wurde eine erneute Befragung notiert, aber keine

Antworten mehr aufgeschrieben]