Unser früntlich willig dienst...

[Hauptman Wolfgang Henzli habe in Frankreich Dienst angenommen]

...aber der gemelt houptman Hentzly

besorgtt er habe zu wenig gelt vom heren entpfangen das er

die knecht nit wol von huss und uff die ersten musterung bringe,

habe allso begert gelt wo er das finden uff zubrechen alls ime

nun von ettlichen erenlütten anzeigt das der üwer Hans

Schwertzy ettwas gelts habe alls er inne darum begrutztt und an

gesucht habe er ime bewylliget dry hundert kronen gelichen und

ime die selbigen ouch inzelt und alls inen begebnet so habe

der gemelt houptman ime dem Schwertzy sin hand geschryfft geben

darin vergryffen das er ime dem Schwertzy alle manott von

iedem hundert zwo kronen zins geben und weren ane sin costen

und schaden und ouch witter darin vergryffen das er das geltt

ein gantz iar um ein solchen zins bruchen und nit ablösen

sölle es were dan sach das sy vom künig for dem iar geurlobett.

Es sige ouch noch andem nit gnuog gesin Jacob Wyssling habe

noch dem Schwertzy zu pfant geben müssen für den houptman

ein gült brieff von thusent guldin wysende ouch begegne inen

das sich der edel fest Jost Pfyffer ouch sin handgeschrift dar lege

müssen nitt mogen sy wüssen was die wyse. Nun alls der

(2)

ersam aman Hentzly alls bruder des gemelten houptmans und

schaffner sovil des kriegssachen betryft der sach nerung (?) geben

so erst ime moglich gesin das er dem gemelthen Hans Schwertzy

sin houptgutt erleitt alls ein iar und dry manott verlüffen

und by 30 kronen uff rechnung des gemelten zins geben ouch mitt

früntlicher pitt an ime langen lassen das er ein mittliden mit

den armen kinden habe und isch doch des halben theils des zinss

benügen were vom hundert zwölff eins iars das er ime abgeschlagen

er welle bezalt sin nach lut der gemelten hand geschryfftt.

Die wil sy nun sin hertykeit und forhabens verstanden haben

sy uss höschender nott nitt für mogen sunders unss alls ire

günstigen herren und fätter hiemit zu benügen und langen

derhalben ir gantz underthänig und früntlich pitt an

uns das wier innen ein früntliche fürgeschryft an üch alls unsere

günstige getrüwen l u e gan lassen hiemitt ier mitt dem

üwern ettlicer gstalt handeln das den gutten kinden geholfen

so iren fatter verloren und nieman wüssen mag wie sy und

ander bezalt so aber der fatter uffrecht belyben hette nieman

darmit bekümret müsen werden.

[Luzern soll mit dem Schwerzi reden und ihn bitten, den Zins

teilweise zu erlassen]

...