Abscheyd

Im iar des herren funffzechen hundert i uff donnstag dem sechsten tag hornung

zu Sitten, uff vesper zyt, ander grossen brugk vor der furnämen

burg Meyer houptman in Wallis, am ofnen gericht erschinen

sind, dy ersamen Marti Echsen, Hannes Dietzung, Wurt Zbeyg, Thomas

Burdo von Lois, Hilprand Schmuer, Peter Biger, Andres in der Kumben, Peter

und Bilig Kerser, Peter Welschen, mitt sampt, etzlichen andern ir gsellen

liessen dartun, wie dänn in dem nechst verruckten iare, im ougstmanad

oder deby, sy weren gsyn reyss knecht und soldiner zu Alexandren, doselbs

schwurent sy truwlich zu dienen och gehorsam zesyn wie zimlich ist, Peter

Umbrecht, iren reyss houptman, derselbig och inen dargegent ein eyd tet

wie zimpt, ein fromer truwer houptman zesyn, so nun dy selbigen reyssknecht

ir zyl und manod ussdient hatten, und daruber hatt der selb Humbrecht

ir höptman, von dem gemeinen sold usswysen, ir sold ann gold und silber

ingenomen, als denn er och doselbs bekantlich was hierumb (?), satztent

sy im zu recht, und erhieschent ir usständen sold, ir ieder den sinen, inen

durch obedachten Peter Humbrecht usszewysen, und zu bezalen, mitt

vorenthaltnus oder protestierung, umb dy smach schaden und

kosten, erlitten oder kunftig, in betrachtung, das er sym getanen eyd nitt

gelebt, sunders von den selben knechten in ir grossen nöten, an alles ir wissen

und willen gewichen und abgeschieden ist, und trostent darumb zrecht mitt

den wysen Hans Rynen alt höptman in Wallis der zu gegen was, och bürgen

und trostung sich gab fur dy selben knecht, dn inen von schaden zu sysen gelobt

hant, by ir eyden und zwangnus aller ir guter, dabey erforderten sy och an

Humbrecht, er sölt och, wie sy bemuglich trostung geben, in massen damitt

sy und zrecht, verschert sygen, und satztreit das im zu recht, ansprucher

ann ein, dargegent erschinen ist der selb Umbrecht, liess dartun, er

hett solich sold ingenomen, ieden tugkaten für fier dick pfening und fur

krutzer, nun syge er gsyn in em sal, so hab er mitt den knechten

geredt, wie er den sold hette ingenomen, also welt er sy bezalen, und

usssysen, do haben sich dy knecht nitt so tur wellen lassen bzalen, dem

Hans Dietzung und Hans Koufman, dy meyntent, man sölt sich also lassen

(2)

bezalen, in den begab sich das iderman, floch, uss forcht den vyenden

sy imb dy stat warent, als och er selbes uss herschender nott floch vermeint

das tun im beser, so er doch gsach das all syn obren sich hinweg gemacht

hatten uss forcht zuo verlieren lyb und guot, alls sölichs mengklichen

kuntbar ist, so syg er wie och syn obren abzogen, dadurch

er vermeint, er habe sich ann syn eren nitt verschult, und ob syn

widerpart reden well, er heyg den eren nitt gnuot tan, so erhaschet

er darumb vom widerteil rechtliche trostung, denn er och urbutig was

alles zetuon, was recht erheist, es syg aber war als er zuo Capal

kam, wurde er von ettlichen lamparter beroubt bis am xxxii duckaten

und ob im des syn widerpart wett abred syn, erbot er das gloublich

sinezebringen, uff solichs angsechen, das sy sich der bzalnuss gewidert

hatten, do er der selben urbutig was, und dozwischent beroubt

worden ist, so habe er inen umb dn verlornen sold nut zeantworten

besunders soll er von aller ir vordrung ledig erkant werden, wyter

als umb syner widerpart anzug des eyds halb, redt er und

vermeint nütz gefält haben, denn vill ander höptlüt och geflochen

werind, dadurch hab er sich an sym eyd nitt verschult, dann er syg

ein biderbman, damitt hatt er trostung geben syn eyd und all syn

guot, vermeynt solich trostung genuogsam syn, satzt solichs hin zuo recht

widersacher am andren, uff sölichs dy selben ansprucher vermeinte,

er sölt trostung geben, mitt ein biderbman oder zwegn, domitt sy

und zrecht verschert syen, und syge syn erbotne trostung nitt gnuogsam

begerten daruff rechtlicher ordnung, dargegent, Humbrecht

syn nachred (?) tet, im soll nachgelassen werden furgebrungen, syn

erlittne beroubnus, und syn erbeten zgelts, ann dy knecht getan

das sy nitt empfachen wolten, so nun solich parthien also verhört

sind, hatt Petter der obberurt herr houptman, anred widerred nachred

und schlos red beid parthien in disen geschrifftlichen abscheid zuo

beschliessen, und damitt beid parthien vor im zu erschinen bescheiden

uff moren zuo prym zyt, zuo verhören ordnung des beroupten

(3)

herren hoptmans, ob Humbrecht bevuglich (?) trostung

geben hat oder nitt und furbass nen recht neyst

furzefaren datum als hundenstatt

istes runsthen (????)

Wir Georg Meyer von Visp höptman in Wallis durch den

hochwurdigsten fursten und heren, herren Mathieun Schanz

von gottes und des römschen stuls gnaden bischofen zu siten graff

und pfet (?) in Wallis, unssren all gnedigsten heren, tund

kunt aler mengklich, so dass unser brieff ansechen lesen oder

hören werdent, als dem vor uns zuo siten uff der grossen

brugk, zweytracht und teding (?) erwachsen (?) sind, zwuschent

den wolbescheidnen, Marty Egser, Hans Dietzung wurt zuo bryg

Thomen Burden von Lins (?), Hilprand Schiner, Peter Byger Andres

inder Kumben, Peter und Gilg Keser, Peter Welschen mit sampt

etzlichen andren ir gsellen, Ansprucher ann ein, och

Peter Humbrecht ir wyss höptman, am andren, uff

solichs als dy selben ansprucher in ir vordrung liessen

dartuon, wie sy im nechst veruckthen iar, im ougst

manod oder darumb, soldner wärind in Alexandren, do

sy schwürend truwlich zu dienen och gehorsam sin wie zimpt

dem benemen (?) Peter Humbrecht, als dotzemal iren hoptman

dersilb och inen dargegent ein eyd thett, als zimlich ist, ein

frond truwer hoptman zesyn, so nun dy selben reissknecht

ir zyt und manot ussdient hattent und druf, hatt der

selb Humbrecht, ir hoptman, von den gmeinen sold usswisen

(4)

ir sold an gold und silber ingenommen, als er denn och doselbs

bekantlich was, herumb erhieschent sy ir usständen sold

ieklicher den synen, inen durch obgedachten Peter Umbrecht

uss zewisen und bezalen, mitt vorenthaltnus oder ptestierung (??)

umb ir schmach, schaden und kosten erlitten oder kunftig, in

betrachtung das er syn getane eyd nitt gelebt, sonders

von den selben knechten in ir grossen nöten, an ir wissen und

willen abgewichen ist, trostent darumb zum rechten mitt

dem furnämen Hans Ryner alt hoptman in Wallis so

zuo gegent was, burg und trostung sich ingeb, fur dy selben

knecht, dy inen von schaden zuo wysen gelobt hant, by

ir eyden und zwungnus aller ir güter, damitt erforderten

sy och an Humbrecht, es sölt och wie sy, bemüglich trostung

geben, in massen das sy und zrecht versichert syent satztent

solichs hin zuo recht ansprucher ann frynn (?), dawider

sich satzt, der selb Umbrecht so dem wider siner widerpart

vordrung sich zu beraten, in meynung tedug (?) frzenemen, redt

war wär, er hett solich sold ingenomen, ieden tugkaten fur fier

dick pfenig, und fier krützer, nun sig er gsyn in ein sal

do habe er mitt den knechten geredt, wie er den sold hett

ingenomen, also welt er sy bzalen und usswysen, do haben sich

dy knecht nitt so tür wellen lassen bzalen, dem Hans Dietzung

und Hans Koufman, dy meintent, man sölt sich also lassen bzalen

in dem begab sich, das iderman floch us der vyenden

so umb dy stat werent, als och er selber uss herschender not

floch, vemeint das tun im besten, so er doch gsach das all

syn obren abzogen warent, uss vorcht zuo verlieren lyb und guot

als solichs mengklichen kuntbar ist, do syg er wie och sin obren

dannen gescheiden, dadurch er vemeynt er habe sich an

synen eren nitt verschult, und ob syn wider part reden wel

er hab den eren nitt genuog tan, so erheist er darumb vom

(5)

widerteil, rechtliche trostung dem er och urbutig was alles

das zetuon was recht erhöist, es sy aber war, als er zuo

Capal kam, wurde er von etzlichen lampter beroubt

bis ann xxxii duckaten, und ob im der syn widerpart wett

abred syn erbott er sich das gloublich furzubringen

uff solichs angesechen das sy sich der bzalnus gewidertt

hattent, do er der selben urbutig was, und dozwischent

beroubet worden ist, so habe er inen umb dy verlornen söld

nit zu antworten, besonders söl er von aller ir vordrung

ledig erkant werden, wyter als umb siner wider part

anzug, des eyds halb, redt er, vermeynend, nütz gefelt

haben, denn vil ander höptlut och abzogen und geflochen

wärend, dadurch hab er sich ann sym eyd nitt verschult denn

er syg ein biderbman, damitt hatt er trostung geben syn eyd

und all syn guot, vermeint sölich trostung genuogsam syn nutzemal

und ob darwider geredt wurde, satzt er solichs hin zuo recht

widersacher ann andren, uff solichs dy selben ansprucher,

vermeinten er sölt trostung geben, mitt ein biderbman oder zweyn

domitt sy und zrecht verscheit syen, und sige syn erbottne

trostung nitt gnuogsam, begerten daruff rechtlich ordnung uff das

Umbrecht syn nachred thett, inn soll nachgelassen werden

furzebringen syn erlittne beroubnus, und syn erbietn zgelts

ann dy knecht getan, das sy nitt empfachen wolten, begert

och darumb rechtliche ordnung, zuo letzt, als beyd parthyen

erschinen, und mitt erenstiger ermanung, uns angefallen sind,

umb ureil, uff sölich ir red und widerred, hierumb wir

höptman obgedacht angsechen vordrung und höisch der anspruchen

angsechen och antwurt und abred der widerpart daruff getan,

dadurch Umbrecht begert sich zu zelassen, zuo rechtfertigung

und erlutrung siner sach, nach zubrungen syn obietn (?) zyelts (?)

halb, ann dy knecht getan, das sy nitt empfachen wolten

(6)

och syn erlittne beroubnus als ermeint desselben gelts nen (?) vorstat, angsechen

och gehelnus der selben ansprucher wie sy uff erbietung des

selben Umbrechts ir hoptmans zoelt (?) nitt empfachen wolten, och angsechen

und wol betrachtet, ander red und wider red zu beyden syten prucht

und ander sach so hiersu (?) zuo betachten was. hant wir ratt

schlegen der wysen fransess inn wuncheried (?), caplans von Siten

Jacob zer Zuben unsers stathalters tschan prensengs hernach

warnyer, Peter Walden Gili von der Matten, seckelmeysters

Gerig Nanser Niclas im obren dorff, offner schribren, Anthony

in der homatten, tschan tschappotta und diss nach under zerthunden

schribers, burgern zu Sitten, so mitt uns gsyn und einhellig gewesen

sind, synd gesessen zuo gericht nach übung unser obren, hand

prucht dy wagen der gerechtikeyt, angerufft den namen

gottes von dem alles gerechtes urteil entspringt erkennen

erlitern ordnen und urteilen wie mitt diser unser urteyl: das

dem selben Peter Umbrecht ist nach nach gelassen, und gommen, zuo

hilff erlutrung und furdernus siner sach, furzebringen, alles das

er ansich genomen hatt kuntlich machen, doch mitt sölchem bscheyd

das er des ersten siner widerpart söll ingeben, artikel, waruff

er an eyn kuntschafft lassen uffnemen, wider dy selben ansprucher

des glych dy ansprucher sind zuo gelassen, ob sy zuo hilff und

furdernus ir sach, utzit meinent furzuobringen, oder wysen

dasselb mögen sy tuon, und ists inen nachgelassen, der trostung

halb, ir verordnet und erkant, das Peter Humbrecht

by syn eyd all syn gut in geschrifft söll lassen setzen, und uff all tag

als vill er berüfft wurt sich antz recht antworten, und ob

sölches nitt beschäch, soll er selbig Peter Umbrecht den selbigen

anspruchern verbunden syn umb ir höptsach, nach usswysung

des lantrechts hie lands, und dofur geschetzt werden, und

bekomend ietwedren teyl umb den halb teyl alles kostens

[auf dem Kopf von anderer Hand:

der von wallis kuntschaft

von Peter Humprecht wegen

]

(7)

desselben kostens schatzung wir unssern uffrich zuo kunft [...]

vorbehalten geben, und erlutert ist disse unssrn urteil oder (?)

ordnung ze sitten uff der grossen brugk uff dem sibenden tag

hornung im iar xv in bywesen der ersamen Hans Koufman

von Bryg Peter Meyer von Visp, unser dieneren fur zugen

berufft und erbetten, zuo warem urkunt aller dieser

?ungen, hant wir unser eigen sigel d? in solichen üplich,

uff dise unser ordnung lassen uffdrucken mitt sampt dem

hant signet diss [...] unsers schribers

duch den selb...

herrn hoptm...