Uff andingen mgh und gebott id (?) habend
bezügt volgend personen uff osterzinstag
A° 1575, von wegen Anni Sigrist h houptman
Cloossen iungkfrowen so in gfengknus ist.
Hans Wart von Budtisholtz, bezügt
ungfarlich by 3 wochen habe es sich begeben,
das er züg und Anni Sigrist dess abends
by ein andern in der stuben gsessen habe Anna
Sigrist angfangen reden herrgott bhütt
wie ist dannocht unser iungkherr (meinte
h houptman Cloosen) ein mechtig rych man,
ich hab ime offt ein gross gellt in die kammer
uffhin tragen, grosse lange secklin voll, das
sy gnuog daran zu tragen ghept, in massen das
es iro am hertzen wee than habe das iro
nütt darvon werden mögen, und er lege
in iedes secklin ein zedelin was oder wie
vil gellts dinen sige. Item so habe sy ouch
der frow ein hembd gnomen aber das
allso verantworten wöllen, sy habend
holtztragen ghept, da habe sy ein hembd
uff dem estrich verloren und ein anders
von der frowen hembden and statt gnomen.
Anna Carli, bezügt, alls sy zügin sich uff ein zytt
klagt wie sy so übelmögend und kranck habe
Anna Sigrist daruff gredt ach nun bin ich
doch ouch kranck und schier lam in henden
und füssen, und sit mir nit anderst dann alls
hette ich ein kallten stein am hertzen, und
wöllt nie lieber gstorben sin dann uff
dz hürig iar, wär ich nun gstorben.
(2)
Fragte sy zügin was iro dann anglegen wäre redte
sy ia wann ich schon lang läben so wird
ich doch dess tüffels und ich bin sin, dann
ich hab stäts so bös anfechtungen, und alls sy
zügin diser worten gestöuckt redte sy ia ich habs
gredt und es ist schon usshin.
Anna Temperli bezügt, alls sy zügin der
Anna Sigrist gholffen die kammer fägen, stunde
vil silber gschirrs uff dem kasten, redte Anna
Sigrist herrgott bhütt wie ist es mir so
ungwon das es alles so voll silbergschirr und
rychthumb ist in disem hus, gegen dem da ich
vorhin gsin bin, das ist glych alls ein schwynstal,
dagegen, sich da stand 2 kisten in der einen
ist ouch noch vil silbergschirr, und kleinot, ouch
gelltt, müntz und Franckrychen dicken gar
vil, und grosse secklin voll, in der andern
ist dann ouch gelltt, darnach zeigte sy
iro der frowen kisten, redte ouch darinn ist ouch
vil kostlichs, ouch gelltt, aber nit so gar vil
darnach den grossen kasten, der wäre voll
kostlichs gwands, und darnach redte
sy, ich kan schier nütt rechts meer thuon
syd liechtmess har, der iungkherr hatt mit
mir kriegt, redte ouch von dem hembd wie
es ergangen und Hans Wart anzeigtt hatt,
und spräche ich wil mich bald selbs verlouffen
das mich kein mensch weist ich wird
oder bin doch dess tüffels.