Uff hütt ist Basthian Knab und Astatt

Knab sin son burger zuo Lutzern, samt Verenna

Richarttin siner eelichen husfrowen vor offnem

gricht erschinen, mitt anzeigung diewill Astatt

Knab willens mitt andren erlichen eydtgnossen,

inn dienst küniglicher magistatt in Franckrich

zu reissen habe er siner eelichen hussfrouwen

Verena Richarttin sin hoff und guott das veech

unnd alles übergeben, dargegen sölle sy aber

sine gellts fordrer wie die in einem rodell verzeichnet

für gricht glegt, worden über sich nemen und

die unclagbar machen, darneben stuondt Basthian

Knab allda

(2)

vor offnem gricht und versprach vermög eins

rodels ettliche suman, denen Anstatt Knab

zetzundt und schuolldig uber sich zenemen und

zubezallen, vermög der uffzeichnung und

begertten inen söllichs, mitt gricht und urtheill,

zuo krefften zu erkennen, und zuo bestättigen.

Daruff MGH inen mitt urtheill

das allso bestätt und zu krefften erkendt,

allso das Verena Richarttin die gellten

uber sich nemen und mitt inen accurtieren

und bekamen mögi, wie moglich und dan

ir das wie Astatt iro gomen (?) allso blibi

doch das sy das, wie Astatt Knab iro anzeiget

und sy uber sich gemmen (?) erstatten sölle Astatt

hatt iro auch verordnett was er ietzundt

inn Franckrich fürschlache sölle iren auch

beliben und sy von ime in zitt des fals erben,

wie der vatter harin bewilligett doch das

dem Astatten die sumen so der vatter für

ine uber sich gneme zubezallen, an sinem

erbtheill abzogen werde.