Uff andingen Meister Urban Bürgin und Martin Bellingers

zügt gegen und wider Hannsen Schärer von Willisouw

uff mittwochen vor Michaelli Anno 1576.

Hanns An der Madt von Khärns Ob dem Walld zügt,

wie er inn dem unnfall vordrigen franckenhischer zugs

geschossen worden das er schärers mangelbar gsin,

hab ime einer Barttli Felix genampt die schärer zeigtt,

und ime dahin gewisen, da hab ime meister Urban

geartznett unnd alls aber sy da danen von der statt usshin

gan Raman komen hab man fendtli theillt und hab

inne meister Urban nach nitt gar ussgeartznet ghept,

und wie sy aber uffhin inn ein statt komen so

man genempt Ding, sige er woll 8 tag daselbst glegen,

das man gmeindt kame nit mitt dem läben darvon,

habe der von Willisouw inne anfan artznen unnd

sovill angewendt das er inne wider uff das besser

bracht, inmass das er geheillett worden unnd

uff ein tag mit dem von Willisouw übers wasser

inn dieselbig statt komen daselbst mitt dem von

Willisouw übergsessen unnd ein markt sins lons halb

getroffen da der von Willisouw inn gefragt was

er ime gen wolle er züg anzeigtt wölle ime 5 kronen

gen

(2)

unnd ein parhossen dartzu, do danen sigendts do

gan Lion komen, unnd wie man gan Lion

kamen [und abbezallt], hab der schärer von Willisouw inne zügen

angesprochen umb das par hossen sig er züg des zuo

friden gsin alls aber der von Willisouw den felldt-

richtern iren zweien dero vogtt er züg und noch einer

gsin 6 dicken schulldig hab er ime zügen angemuottet

dieselbige über sich zenemen und gegen den richtern

guott zemachen, wan er das thug, welle er der

schärer meister Urbans halb woll mitt ime verglichen.

Allso hab er züg, den von Willisouw uff die 6 dicken

umb die fünff kronen bsallt und der von Willisouw

ime die hossen geschenckt, unnd allso ime niemandt

nüt mer abgefordrett wie sy sich er unnd meister

Urban verglichen oder einandern bsallt mog er nit wüssen,

beschlüse sin sag.