Uff andingen Jörgi Fleyschlis unnd gebott h richters
handt zügt gegen und wider Hans Heini Acherman
uff donnstag nach ostertag a 1577.
Hanns Bullman von Reiden zügt wie sich begeben letst
vergangnen kriegs zugs inn Franckrich, beschechen dz
er züg sampt ettlich anndren und Hans Heini Acherman
inn einer purst by einandren gsin, das im inn han
faren Hanns Heini ein knecht gehept den man den
Keigell Uolli genampt, derselbig aber ime nitt
dermassen gediennett das ime gfallen anderst wan
das der knecht nitt mer bliben wöllen und urlob
ghäuschen, und zu Schallung, habe Hans Heini ime zügen
gebotten er sölle luogen wo er den Fleischli finde ob
er inne dingen können, unnd darneben anzeigett
im drijärigen Krieg habe er dem Ruodi Stürmli
trossett unnd sige er sin purst gsell gsin habe er
gseen das er so woll mitt dem tross käme sige geschwindt
uff der fuotteri eee dan einandre sich umb seeche (?) dz sin geschafft.
Allso dz zu Kleinen Dschallung habe er inne zügen zum Fleischli
geschickt unnd anzeigen lassen wan er ime dienen
wölle so flissig wie vor wölle er inne dingen unnd
inne hallten wie den andren knecht, guott essen unnd
drincken geben wie ers habe unnd habe er 4 kronen
vom hauptmann bsolldung, wölle er ime alle manott
i kronen unnd bekleidung was ime abgangen dartzu
geben daruff sige Fleischli zum Acherman gangen wie (?)
angestanden, er züg habe ime ouch wöllen dienen nun
umb spis er habe ime aber nit wöllen sonder den Fleischli
(2)
han wöllen dan er züg ime gern umb die
spis dienott nun das er züg ettwas hetti
mogen darvon bringen dan er sonst 4 kr
zu solldt gehept, aber er habe lieber den Fleischli han wollen
dis ime zuo wissen.
Melchior Lenng von Triengen zügt glicher gestallt,
wie Hanns Bullman das Hans Heini mitt sinem
diener Keigell Uolli genant uneins worden von wägen wan er
gern ghept das er ime dientte das er sich allwäg
gfüllt und nitt fur inn gsin allso dz er mitt
für inn wäri derhalben das derselbig ime urlob
gehöuschen. Allso das waar wie Hans Bullman
zügt das Hans Heini inne den Bullman zum
Fleischli geschickt lassen anzeigen wan er
ime dienen wölle wie dem Stürmli wölle
er inne anstellen und allso sige Fleischli ange-
standen umb die versprächung wie Hans Bull-
man zügt, was er ime dem verheissen zegen wie obstat
sige allso ergangen witter imb nitt inn wüssen.
Hanns Ball von Münster zügt er sige darbi gsin das
Hans Heini Acherman an einem abendt zu inen komen
zu Monteröll do sy den rossen ghüttet und zu inen
gsagtt ir knaben ir handt da gutt zehutten den
ir müssendt nun luogen das die ross nitt
inns läger louffendt, dan ir sindt woll
sicher das die nitt inns wasser gandt, ds inne
sonst nütt von der sach zu wüssen.
(3)
Zwüschen dem jungen Jörgi Fleischli 1
So dan Hanns Heini Acherman 2.
Ist uff verhörr der kundtschafft mundtlicher und
geschrifftlicher, unnd nach allem handell erkenndt,
minen g h zuvertruwen und alls sy nitt verthruwen
wöllen, und der ussstandt erkenndt, das das ross
so verwarlost worden dartzu dan Fleischli sorg tragen
han sollt, wie woll Hans Heini zu inen gredt sy sölendt
nun luogen und hutten das die ross nitt ins leger louffen
und nütt vom wasser gredt daran er desglichen Fleischli
das er ouch nitt sörger gehept, ouch schulldt trehtt, derhalben
so sölle die annsprach so Hans Heini Acherman dem Fleischli
versprochen, zum lon zegeben dargegen das ross so verwar-
lost gegen einandren uffgehept und darumb keiner dem
andren nützitt zu anttwurtten schulldig sin. Was aber dz
glichen gellt antrifft was Fleischli den Acherman zu-
berächnen weis das er ime usshin schulldig darumb
soll Acherman inne ussrichten und bezallen, inne ouch
den harnist so er ime usshin gfürtt wider geben onne
enntgelltnus, unnd will dan Hans Heini Acherman
vordrigen rächtstag die sachen woll hette mögen lassen abgan
unnd nitt beschächen sölle er dem Fleischli sinen hüttigen erlit-
nen kosten abtragen, und hiemitt das arest und
verbott der bsolldung halb hinder h Jost Krepsinger
sover Acherman der appenlatzion nitt nachgandt
ouch uffglöst sin.