Uff andingen Leodegari Schürmans und gebot

herren richters hatt zügt gegen und wider

Casparen Hindtschwiller donstag vor thome

anno 1578

Hanns Werlinger von Münster zügt, das er züg

darbi gsin alls ein frouw khomen und dem

Casparen Hindtschwiller xxx gl bracht, da

Luodi Schürman den Casparen angredt er solle ime

die lienen, daruff Caspar ime geantthwurt

ja ich will dirs lienen wandt mirs uffs hus

schlachen willdt und wider geben wan mine

kindt zu iren tagen khömendt, da Luodi

Schürman nitt anders begert dan wan

das kriegsgellt kome wölle ers ime wider-

legen daruff Hindtschwiller nitt erwinden wöllen

sonnder begert sols ime uffs hus schlachen biss

sine khindt zu iren tagen komen, das sis dan

wider habendt, und dem kriegsgellt nütt

bewilligen wöllen, allso sigendts allso alls ime

zügen nitt anders inn wissen ddes einen worden.

(2)

Zwüschen Casparen Hindtschwiller

eines so dan Luodigari Schürman 2.

Ist uff verhör der verschribung im grichtsbuoch

unnd kundtschafft inn geschrifft unnd

nach allem handell erkenndt, diewill von

beiden theillen gfällt namlich von Casparen

das er mitt worten dem Schürman vill verheissen

unnd inngangen, glicher gstallt Schürman das er

inn der verschribung im grichtsbuoch selbigs nitt

äfferen lassen, darumb soll Leodigari

Schürman, den Hindtschwiller biss nächst

mitter fasten umb die xxx gl samptt dem

zins ussrichten und zallen und dan alle gricht

und rächt darüber gangen sin.