Uff andingen Wilhelm von Moss säligen
wittwen und gebott h ratsrichters hatt
bezügt Marx Custer von Emmen uff
zinstag vor laurencii 1579
Namlich habe es sich begeben im delffinatischen
kriegs zug alls [Rand: er züg by dem
regiment der lendern zogen und] gan Liffron komen und
inen mancherley warnung zukomen haben ire
houptlüt inen versprochen nit hindersich sonder fürsich
in guter gwarsamer und sorg ze ziehen ouch inen
das eerlich geleist. Alls aber sy zu dem regiment
der stetten komen sige es ein anders worden das
man sölle hindersich ziehen in massen das under den
gmeinen knechten ein grosser unwill worden das
ettlich heim gwöllen und vast der meertheil
und sige gar ein grosse unordnung under inen
worden ie letstlich habe Wilhelm von Moss
selig houptman Heinrich Pfyffers und Niclaus
von Wyls seligen schryber sich ouch entschlossen
sampt Bastian Felixs seligen zum mind (?)
heimzeziehen, ime zügen dasselbig anzeigt ins
gheim, ouch us was ursach und namlich das
ime von siner hussfrowen widerwertigkeit zuogefallner
kranckheit geschriben worden das ime seer bekümbert
doch geredt er wölle zuo vor mit den knechten
und sinen houptlüten alle sachen luter abrechnen
und beschlossen daruff die knecht brüfft
mitt inen aller dingen harnast büchsen und
bsoldung halb in bysin houptman Niclausen
säligen abgerechnet, und alls er vertig worden
den rodel uff den tisch gelegt mit der
hand daruff geschlagen und geredt woan
ietz hab ich noch min rechnung mit minen
houptlüten ouch zu beschliessen, und glych
von stund an übergsassen und mit houptman
von Wyl säligen (dann houptman
(2)
Heinrich domalen zu Valantzen kranck gelegen)
angfangen rechnen, aber in der rechnung sy gegen
ein andern so vil stössig worden das sy die nit
beschliessen mögen, iedoch durch Baschi Felixen
seligen mittlung gar wol widerumb verein-
baret worden. Er züg wüsse ouch wol
und habe gesehen das die ersten 5 monat
wann der schryber sälig mit den knechten
abgerechnett allwegen beid houptlütt oder
doch zum wenigisten der ein darby gsin sige