Ich Marx Russiger geschworner richter der statt Rapperschwil, bekenn und vergich offenlich mitt disem Brieff das ich uff den tag nach

datum diss brieffs da ich zuo Rapperschwil an gewonlicher richt statt offenlich zuo gricht sass do komend für mich in offen verbannen gericht die

ersamen bescheidnen Peter Zebnet von Ury und auch Bartlime Mor von Underwalden, und offnettend da durch iren erloupten fürsprechenn

das es sich gefüegt hette als sy in verruchten tagen im welsch land syend gsin id des babsts dienst, habe sich etwes handel erlouffen das sy mitt

Jörgen uff der Fluo vonn Wallis zuo handlen habind das sy kuntschafft der warheit notturftig syend, und lieffend da an ein recht

wie sy die söltind innemen das es krafft hette, also nach semlichem tar thuon, sitmal und kuntschafft der warheit nieman soll verhalten

werden, ward inen mitt einheilger urteil kuntschafft erkent, also nach dem selben hand sy der gestelt Heinrich Wydler von Rapperschwil

in offenn verbannen gricht, der hett geschworen ein eyd liplich zuo gott und zu heilgen da zuo sagen was sy an inn zügindt ein war-

heit so vil im der von zuo wyssen sy nieman zu lieb noch zuo leid denn allein durch der warheit und dess rechten willenn also hand

sy an inn züget, und hett gseit Heinrich Wydler by dem geschwornen eyd als, wie das man Jörgen uff der Fluo von Wallis zuo Rüwenen zum

obersten hauptman gemachet habe, zum andren seit er do sy zur porten sisienen sigind komen habe man in da bestet, zum dritten wie sy siend gritten

gan Rümolen zum cardinal, sye er hin weg gritten habind sy wyter rat gehan, also sind sy zuo rat worden das sy dry houptlüt gan Rom wellind

schicken zum Bapst und inen in bevelch geben etwz sachen mitt dem Bapst zu handlen, sid und wen die stett die sy gewunnen hand sich ergeben habend, dz man

unss früntlich zaly aber witer dienst zuo sagi uff das gab man Jörgen uff der Fluo dar zuo als unsern oberster houptman, iuncker Bilgeri von der hochen Lan-

denberg und Abrechten Gugelberg dz sy zum Bapst ritind sölichs zu enden, uff das selb gab Jörg uff der Fluo als oberster houptman, Oswald von Rotz von

Underwalden an sin statt das er oberster lütiner wery, nach dem selben zog man gen Castell Sant Peter do lag man biss die houptlüt komen, wurdent

die knecht unrüöwig und woltend zalig haben oder wyter dienst also giengen etlich zum Jörgen uff der Fluo als obersten houptman batend inn das

er in die kilchen käm und inen siny was er und sine gsellen zu Rom habind geschaffet, uff das selbs gient er in die kilchen zuo denen die in

beschickt hattend also segtend sy in was er für ein antwurt vom Bapst brechty, also seit inen Jörg, der Bapst hatt unss zu antwurt gen, man

sölli uns ietz zuo Castell Sant Peter zalen ein manot sold, und welcher dann heim ziechen welli, mögi das thuon, und was knechten me dienen welly

die habind dienst, und welle man unss zalen wie bisshar von manot zuo manot, ouch welli der Bapst unss halten wie der küng von Franckrich

sine knecht halt bass und nütt wirs, und welle man uns legen gen Bolonien in ein garnison da müessind wir dess Bapsts warten und

auch siner zukunfft freüwen, wyter seyt Heinrich Wydler do sy gan Bolonien kämind und also da lägind fiengend die heren an zuo mustren

und werdent im selben die heren und die houptlüt uneins, ia die heren woltend iedem knecht nitt me gen dan iii francken, das woltend sy

nitt nemen do fragt der her, syder und sy sölich zalig nitt weltind nemen, söltind sy im den bestell brieff bringen und in lassen lesen dz wolten die

houptlüt thuon und schicktend also zum Jörgen uff der Fluo als zu irem obersten houptman umb den bestall brieff, do was der selb Jörg uff der Fluo hin weg

geritten an urloub der knechten und der houptlütten das (?) also nieman kein gwalt noch kein versächen geben, ouch hatt man im den tross uff brochen

und hand den besellt brieff gesucht, aber nüt funden, ursach man versach sich er hett inn mitt im hin weg, also nach semlicher kuntschafft battend

die zwen obgemelten diser kuntschafft ein brieff also nach semliche darthuon fragt (?) ich obgemelter richter umb, und ward inen erkent ein

brieff mitt einheiliger urteil, dess zu waren urkund han ich obgemelter richter Marx Russinger min eygen insigel getruckt an disen

brieff, mir und minen erben unschädlich, der geben ist uff mentag nach (?) Sant Niclaus tag do man zelt nach der geburt unser heren

tusent fünffhundert und nün iar