Uff andingen Anna Wyss von Grüningen
uss zürcher herrschafft und gebott J Caspar
Pfyffers vogts zu Mallters und Littow
hand bezügt nachvolgend personen uff
montag nach der herren fassnacht
A° 1579 belangend genanter frowen
eeman Clausen Bilder oder Thuner genant
zu Littow erzogen.
Anthoni Brunnenstein von Littow
Uli Wyder von Malters
Caspar Haffner zuo Littow
Anthoni Brunnenstein von Littow bezügt das
genannter Claus Bilger in sinen iungen tagen
gan Littow komen allda syner verwandthen einer
ime erzüchen müssen sige er allzyt [Rand: mitt worten, spilen
und anderen zimlich muottwillig und] fräflen gsin letst-
lich alls er erwachsen [Rand: ettwan x iar lang] den kriegen nachzogen,
volgends alls er wider ze land komen ungefarlich
by 8 iaren habe er sich daselbs ze Littow dess
tawnens [als Taglöhner arbeiten] beholffen und uff ein nacht sinen meister
Lingkheini genant eins sattel und zoum dem
andern nachpuren aber ein ross entfrömdet
und damit von land gfaren, sidhar habe er
nie nützit meer von ime vernomen.
Caspar Haffner ouch von Littow bezügt alls
er vor iaren sin brutloff gehalten und
domalen Claus Bilger sin zugen schwöster zur
ee gehept, der dess morgens zu ime in die
kammer komen, habe sin gemahel ein ducaten
sampt ettlichen andern muntzpfenningen uss dem
seckel verloren, da er züg söllichs niemand
andren dann ime Bilger zyhen können
und darumb sin schwöster angeredt mit ime
zu reden und das verruckt gelt wider zu
(2)
erstatten, habe sin schwöster ettlich tag darnach
inne gebetten sölle nun schwygen und nüt
daruss machen, er wöll ims eerlich wider erstatten
wöllichs nun by 2 iaren angstanden da sige
die schwöster gsorben und er der Bilder glych
darnach von land zogen, ime aber nie nützig
wider worden.
Ulrich Wyder von Mallters bezüget ich (?) hab
begeben ungfarlich vor 15 iaren das Claus
Bilger mitt Casparn Haffner zu Malters den
man Clein Casparn genannt daselbs ze Malters
im wirtshuss ze unfriden worden habe Caspar
ime fürzogen wie er einem puren zu Horw
ein kalb uss dem stal gstolen und in der metzig
verkoufft, das hab Bilger nit widerredt
noch sich dessen nie entschlagen.
Ich Caspar Pfyffer thue kund mencklichen mit disem
brieff das uff dem tag sines datumbs für mich
komen ist die erbar Anna Wyss von Gräningen
züricher herrschafft und eroffnet wie iro kundschaft
der warheit von ires eemanns Claussen Bilger
meergenant Thuners wegen ze haben von nöten
darumb dann disen harnachgenant eeren personen
uss genannter miner ampts und vogty ver-
walltung, und die sy ouch gegenwirtig
rechtlicher form für mich gestellt und betaget
zewüssen sin sollen, mit flyssiger pitt die selbigen rechtlicher
wyss zu verhören und irer ussag alls dann iro
schyn und urkund mitzetheilen, und so nun
kundtschafft der warheit niemanden [...]