Wir Schulths und ratt der statt Lucern thund kund allermengklichen mitt disem brieff das uff

hütt alls wir in rätts wise by ein ander versampt gewesen, vor uns erschinen sind der frommen

ersamen unser (?) besunders hohen und getrüwen, dess gmeinen ampts von Russwil ersam pottschafft

erklagt, nach dem unnd dann in vergangnen kriegen in Meiland, sy iren weibell Hanns Uli Bechler

alls für ein hoptman dero von Russwil hin in geschickt, unnd dem selben sechzig guldin iii seckell geben,

nach dem aber der selb an der letsten schlacht umbkomen, demnach der friden gemacht, und die erst

bezallung von dem küng von franckreich beschechen, syend die rödell unnd gelltt Jörgen Bucher in sin hannd

komen, unnd iederman zuo vergutten befolchen, da habe er der ersten bezallung, gemeinen ampt fürgeben

er habe nitt so vil gelltts, dar uff im ein ampt drissig kronen furgsetzt und gelichen, unnd zuo der anndren

bezallung, sye er uff die rödell, wie zuo der ersten bezalltt worden, uss genomen das im das domalen

nützit geben hab der drissig kronen, zuo der dritten und letsten bezallung, alls ein gmein ampt mitt im

der usachen halb ein span, und ein ampt wie vor uff die rödell bezalltt, habendt sy ampts lütt

darzuo verordnet, die iederman bezallten und dar uff sechs sölld furstend erfunden, darum sy vermeinent

das söllichs sechs sölld in beden vordrigen bezallungen, ouch verstend sin söllend, da by der sechtzig guldin

halb, die Hanns Ulin Bechler worden, die habe Jörg Bucher den knächten von Russwil an iren sölden

abzogen, so vil und iettlichen worden, unnd das ein ampt ouch Huber halltten, begerendt also unns

alls der oberkeitt, der vorstenden söllden halb, und nie um die drissig kronen und sechtzig gulden ersatzung

zethunde, darwider und gegen aber Jörg Bucher antwurtt, dess ersten, der drissig kronen halb, da sige

ein ampt abzogen von minen heren ettlich glichen gelltt uff der ersten bezallung, da her der mangell und

bresten komen, das er nitt hab mogen bezallen, und die drissig kronen von ampt genomen, der sechtzig

guldin halb, die sigendt villicht by Hanns Uli Bechler und dem schriber beliben alss sy um komen sigent

zum dritten der vorstenden söllden halb, wüsse er nitt wie das zuo gangen, dann im der selben

nütt worden, noch ingehept habe dann allein ungefarlich sechs oder acht kronen, die er behallten hab

an sin kosten und arbeit, und vermeint da by nütt übells gehandelltt han, ouch denen von Russwil

nitt were schuldig sin wyter antwurtt zuo geben. Also uff beder parthyen klag antwurtt red und widerred

und verhörung der kunttschafft, an dero sich funden das er die drissig kronen ingenomen, und müttdestowider

den knächten die sechtzig guldin an den bezallungen abzogen, zuo dem uff der letsten bezallung vorstend gsin,

habent wir unns erkenntt, und erkendt unns in krafft diss brieffs, dess ersten das Jörg Bucher

die zwöllff sölld, so an den zweyen ersten bezallungen vorstend gsin, einen ampt von Russwil widerum

überantwurtten und hin uss gebe, unnd die sechst sölld, so die von Russwil einhabendt, unnd an der

letsten bezallung vorstend gewesen, söllend die selben sechs söld, unns überantwurtt unnd geben, das

die selben von Russwil ouch gethan, demnach so sol Jörg Bucher denen von Russwil die drissig kronen

so sy im geben ouch wider geben, dessglichen alls dann obgemelltter Jörg Bucher sechtzig guldin den

knächten, so der Bechler selig uff letsten zug den knächten fürgesetzt und gelichen, unnd alls vil, als sich finden

mag, und das der selb Bucher den Knächten abzogen, sol er denen von Russwil ouch wider geben,

unnd zum letsten so sol vilgemelltter Jörg Bucher, denen von Russwil iren kosten, so sy nächt unnd

hütt gehept abtragen und bezallen, in krafft diess brieffs den wir zu urkunden mitt unnser

statt hier uff getrucktem serrtt behalltt geben habendt uff fritag vor dem sunnentag iudica

nach cristi unnss heren gepurtt gezallt fünffzechen hundert und achtzechen iare.