Unser gantz underthänig früntlich willig dienst...

... üwere gnaden söllen

bericht werden, wie dann ietz vast by dry iaren ist, dass

unser gwardi houptman und wir mit ime habenn by

fürstlicher durchleüchtigkeit unserm gnedigen herren

angehalltten, vonn wegenn erbuwung und erbesserung

unserer behusungen unsers cathiers, doruff uns vil

unnd mermalen versprochen diselbige erbesserung oder

erbuwung zethund, insonderheytt aber alls der herr

statt fendrich Kloss sälig sampt dem herrn stattschryber

lettstlich hie (welliches ietz verschinen iulio zwey iar

gsin ist beschächen welliches ime innamen der gantzen gwardi

versprochen nach lutt unnd vermög. des contrats, wie

ir unser gnedig heren obern und vättern durch denn

hern stattschryber wyttloüffige bericht empfangenn

wardenn. Zum andernn so konnten wir ouch

nit fürgkomen üch zuberichten dass diewyll man

uns iarlich uff ufgenden meyen ein kleidung

versprochen hatt, dessen zyll ietz uff letsterschiner

(2)

meyenn abermaln gfallenn do man unss aber nüt dan

gutten bescheydt gibtt und guotte wortt daran wir uns

kum behelffen könnden noch mögen, derwäg ist fürkomen,

uch alls unsere gnädigen heren und vätter sollichs zu zeschribenn,

harinnen uwers vätterlichen rathes, und hilff begärende,

dann es uns zuschwär sein wurd in söllicher gestalltt zedienen

derhalben so langt unser gantz trungenlich unnd underthänigs

pitt (als obstatt) uffs unveruogenlichest zeantwortten, damit

wir wüssen, zehalltten, unnd uwer vätterlichen bevelch

harin zewilfaren, mit hilff des allmächtigen ouch

siner werden muoter Marya, die wellend uch

unsere gnädigen heren unnd vätter in langwirig

gsuntheit und läben erhalltten. Uss Thuryn den 26

julli nach dem nüwen callender 1583.

uwer unser gnädig heren obern

und vattern underthenig burger

und diener, in deer gwardi

zu Thuryn.

Heinrich Pfiffer, sampt den

kriegslütten und gwardiknächten

des ortts Lucern