Sampstag vor jubilate ist Hans Heini Acherman von Triengen

in M.G.H. gfenknus komen, von wegen dz er vom vogt ze

Büren 20 gl empfangen und nun 10 gl gichtig, auch dz er un-

ghorsam sich gegen vogt zBüren erzeigt, und anderen dingen.

Daruff er anzeigt wie dz der vogt ze Büren kurzer tagen nach ime

gschickt er aber sye domalen nit anheimsch glich gsin, doch sye

er noch ee dz der vogt abgscheiden, und mit ime abrechnen

wellen.

Zum anderen so sye er dem Torer von Baden etlichs gelt schuld

gsin, der nun ein botten zuo ime Acherman gschickt pfand ald

gelt zeforderen, da hab er nüt ghann dem botten darzschlachen

dann ein ross dz habe er dem botten gen zpfand, doch hab

er Torer ime dz ross erst nach etlichen wuchen wider

gschickt dz hab nun der Müller ime abgnon und das

gelt dem Torer erleit.

Zum dritten so wüsse er nit ob ime der vogt 10 gl

oder 20 gl geben doch so begere er verzug sich zuo

erinneren, dann ime dz eigenlich nit in wüssen.

Bekenne hieneben auch dz er etwan unghorsam gsin

bitt derhalben M.G.H. umb verzichung welle sich

fürer ghorsam erzeigen. Bit um gnad.