1585

Ittem so hatt Balthaser Blaum von Briseck in der gefangenschafft

anzeigtt, namlich das er mitt dem hauptman Stocker under des

obersten Redigs regiment von Schwitz hin weg zogen syge,

dar zu er auch nitt allein sunder andere mitt ihm, nemlich

uss der statt von Willisauw Hans Spriss, Dürig Metzger und

Hanss Marti und ab der landtschafft einer von Schötz heisse

Marti den zuname sige im nitt zu wüssen, witter 2 von

Gettnauw Büri Gassler Kristen Hessliger, witter so sigent

fier oder fünff von Edtisswill aber er wüssy nitt wie sy

zum zunamen heissen aber sine gesellen wüssent es woll.

Witters so zeiget er an dass sige die ursach dass er hinweg sige

zogen, namlich dass er dem Schwerzi will [viel] sige zethun

gesin und ihm lassen zu legen und pfenden, dar zuo

heige ihm die grosse düre dar zu bracht so sin folck gelitten

hatt und dem Schwerzi den kosten abtragen und zallen

welcher er ihm der husshab sötte brucht han, den er an

sin wib und kinder den gelligen hunger müssen liden

das er kein fröntt hatt gehan zu bliben, hie by so habe er

dem schwaer empfollen er sölle verkauffen und die lütt zefriden

stellen damit niemer kein klag habe. Im selbigen so sige

schin schwäer auch hin weg zogen mitt miner gnädigen

herren hei mitt sint alle sachen nider geleitt gsin und

still gestanden

Näben dem zeigett er an das er sy krieges heige müssen

beholffen habe sunst anders nüt zu gewirben gehan

bitt üch min genädig herren umb genadt, er heige zechen

kleine kinder.