Item es ist angsechen, das Lucern, Uri Schwitz Underwalden
Zug, söllend über den Gotthard züchen gen Bellentz
die von Glaris Appenzell, Schaffhüssen, h von Sant
Gallen, statt Sannt Gallen, Thurgöwer, Thoggenburger,
Emtaler, Sarganser, die söllendt den nächsten
gen Bellenntz ouch zu ziechen [gen Chur zu]. Und eidtge von Bernn
Basell Freiburg Solloturnn, Biel, Gretzl unnd Sanen Pud
wall, söllend über den Simpeler ouch den nächsten
gen Bellentz zuo ziechen, da selb sol sich der ganntz zug
samlen, unnd da rättig werden, wo unnd an welches
ortt, oder wo die vyent ligent, man ine engegen ziechen,
oder wo der annder zug dess kungs, zuo unns komen
werd.
Item so sind si dess willens den langen see in zuo haben
mitt hilff heren graff von Arone, unnd graff Friderich
unnd andern [mitt viii gerüsten schiffen mitt geschütz wol gerüst]
zyent guott hoffnung die vyend werden unns
nitt wartten, darum wan man hin in kumpt, ob dann
die notturfft höchst, sich mitt allem zug zu samen zu
verfugen, werde dann guott da von zu rattschlagen, ob ab
dan nitt notturfftig, das man zuo samen kom, alls
dann nach gstalltt unnd gelgenheitt der sach, werde
man witer rattschlagen, wo iederman hinzüchen, unnd
wie man narung haben möge.
Demnach wan man von Bellentz züchen wird, ist der heren
anschlag ob die vyend nitt abziechent, werde man, den
nächsten züchen, wie man da innen rättig werd,
wan man zuo samen kumpt.
(2)
Und sol der uffbruch von allen ortten beschechen,
uff donstag
vor unns frowen tag zuo der liechtmess, doch nach gelegen-
heitt iedes ortts, unnd sol die bezallung dero so
uss ziechent, anfachen uff zinstag vor unns frowen tag
]zuo der liechtmess] ist sant karolus magnus tag, und son ein manott
xxx tag sin, tut xii monett für ein iar zuo
rechnen.
Der mustrung und bezalung halb söllend uns eidtge von Lucern zu ir
statt gemustertt unnd bezallt werden, und Uri Schwitz
Underwalden, und Zug söllend zuo Uri gemustertt und
bezallt werden, für den ersten manot, Glaris Schaffhusen
Appenzell unnd die so den obern weg nemen werden,
söllend gen Chur zuo ziechen, da gemustertt und bezallt
werden, ouch für den ersten manot.
Es ist auch mitt den heren geredt, diewil doch eren lutt
ietz in dise zug ziechen werden, das sy die selben wöllent
ansechen unnd bedencken, das si erlich gehalltten, dan man
ie nach eren kriegen werd, und nitt wie bishar
etwan beschechen, habent die heren geantwurtt,
nützig anders begerent si ouch, und wöllendt sich mitt inen
halltten guott hoffnung si werden sich wol bemügen, ob aber inen
etwas witer anglegen, mogen si für heren grant maistre
keren der selb dan gwälltt hab unnd si mitt
(3)
Antreffend geschütz, begerent die heren, inen dz gschutz so enet
dem gebirg mitt sampt stein und bulfer zu lichen, wöllend
si stein und bulfer bezallen, unnd in irem kosten widerantwurtten
sol, an gmein pott komen, ob man inen dz lichen,
unnd ob man dz thuon sol.
Item und ist angsechen, den amptslütten enet dem gebirg zeschriben
das si um spiss und tranck gnuogsam lugent, werde
man si erlichen darum wol ussrichten und bezallen.
Die heren begerent ouch dz man verseche dz niemant über
die xvim so uss zogen sind, hinzüche, denen
ob iemant also hin zuge, wöllend si den selben ganntz unnd
gar nütt schuldig, harum sol iederman söllichs versechen
und die sinen warnen.
Es ist ouch ir beger dz man verseche dz die hoptlütt dhein
ander knächt an nement dann so der unns, unnd unnser
underthanen sin, uss der eidtgnosch(t) sind, und insunders
so sy ir beger dz unns eidtgnon so ir landtschafft enet
dem gebirt hand, dz si der selben nitt vil nement, dan
si zuo Churen und andern ortten sich nitt als fründ sunders
als vyend erzögt habent.
Witer ist ir beger das man denen von Chur
schriben, niemant kein pass noch durch zug so dem
kung unnd unns widerwerttig zuo geben, als man witer
zuo sagen wechd.
So ist ouch der heren meinung das die von Punden söllend
vi hoptman ordnen, uff die zal so inen uff geleitt, unnd
ob si dz nitt thuon wöllendt, werden die heren inen die
hoptlütt setzen, ob aber die undern pund mitt wölltten
hoptlütt ordnen, so sol der gräw pundt die hoptlütt
setzen.
(4)
Item ist zuo letst ir beger das iettlichs ortt inen ein
rittenden potten oder löffer zuo ross zuo gebe, die selben wöllend si erlichen
unnd wol besolden.
[Gestrichener Absatz: Unnd ist der eid also so die knächt schwerren söllend
wider mengklich, doch nitt anders wie dz die vereinung
zuo gibt.]
Unnd ist der eid so die hoptlüt unnd knächt schweren
werden, dem kung erlichen und wol ze dienen, wider
mengklichen, nach innhalltt der vereinung, die gmacht ist
zwüschen inen und dem kung.
Item den buchsenschützen wöllend si nitt mer geben dan
ein halben gulden, habent min heren die potten von eidtge
inen gefordertt ein gulden, den selben wöllendt si nitt
geben.
Item man sol ouch dar an sin dz der kung die
fennli bezale [am Rand: ist nitt anzogen]