Ich Johannes Wasser von Underwalden riter pannerherr unndt

alter landtamen dasälpst, houpttman in k Mt dienste

über dry hundertt eidtgnossische knächt, thun kundt hye

mytth disser passportten. Nach dem der Jörg Luttenschlacher

erscheiner diss brieffs oder passportten, mir obbenämpten

houpttman Wasser under minem fändli gedienet, unndt

min karer gwässen. Will danne der krieg zu

der endtschafft gratten, so hat bemälter Jörg Lutenschlacher

synes dinens halber angesprochen ime ein zügkhnus

der warheit gnädigklichen mit zu theillen, die will dan

ich die warheit zu befürdern woll gewägen so sagen ich

dz mir der obgmält Jörg Lutenschlächer eerlich und woll ge-

dienet hatt, dz ich einiche klag nit ab ime hab es sige mit

dem karen, zügen older wachten wie das namen hatt,

unnd wan der krieg länger gewärtt hette so hete er sinen erlichen

dienst by mier gehan, wie andere erliche kriegslüth, undt

wo ich inne in künfftigen könde befürden welte ich mich

nit sparen, derhalben thun ich iede personen wz wirden

oldt stands die sigent gantz fründtlichen biten gemältten

Jörgen Lutenschlacher in gutter bevelchnus zu haben,

das stat mir gägen mancklichen personen fründltichen zu

beschulden, und hiemit dise passportten mit minem eignen

püttschier bewärtt und gäben den 27 tag iänner ano 1587 iare

Johannes Wasser Riter