Anno domini xv(c) unnd xxv iar hannd her Felix Keller killch

zu Art, uff sin priesterlich ampt bezügett, alls houptman

Kalltschmid uss dem lannd gän Art komen, unnd allda mit

erlichen knechten so mit im komen indes Rittlis huss, gezect (?), sye er

her Felix zu inen komen, unnd under anderm gerett wie hannd

ier than das ier so schantlich ghandellt, an nott das doch von

theinem vollck uff eewich nie ghört, dan ich hör ier habind

kein sorg noch auch kein anschlag ghan, noch söllten sich han

mögen etwa zwey drey oder vyer hundert knecht an ein

ort gethan und sich understanden haben sich etlichen weg

darvon zu bringen. Uff semliche rette Kalltschmid

wier houptlüt sind schulldig unnd wenn man

unns tät das wier herren verdienett so hüw man unns

allen die köpf ab, uff semlich red, begeben sich witter

reden, das da der Kalltschmid wyter redtt, man söllt

unns all an die est hencken, so tät man unns recht.

Bastian Schürpf hatt bezügett uff den eyd den er hierum

zu Gott unnd den hellgen geschworen hatt, das er ghörtt

hab das Kalltschmid gerett hab man sollt unns allen

die köpf abhöwen, unnd wen man unns täth alls

wier hetten verdientt so henckt man unns an die est.

Allso hatt auch einer mit namen Marx ein armer gsell

gseit wie obstadt, woruff aber er das gseit habe er nit ghört.

(2)

Hanns Kunkler wont zu Brunnen hatt uff den eyd so

er sinen herren unnd oberen geschworen hatt, das der

Kalltschmid in huss gerett under andern wortten, man

sollt unns allen die köpf abhewen, aber daby nieman

insunders genempt.

Lienhard Grus hatt by sinem eyd den er sinen heren und oberen

gschworen hatt geredt, das Kalltschmid alls er ussdem land

gan Brunen ins Lentzen oder Kunkcklers huss under andren worten

alhier anzogen wurde, des zugs halb, geredt habe, wir hend uns

gehallten dz wir wurdig wern dz man uns allen köpff abhüwe

aber daby nieman insonders genempt.