Wir.
Nach dem dann wir duch den anwalten der catholischen pundtsfürsten
und stenden inn Franckrych geistlichs, und weltlichs stands so sich uss
trungend nott, und uss rechtem wahren yffer zuosamen verpflicht
unnd vereint den gottlosen anschlägen der iänigen, so zuo samen geschworen
unnd sonsten entschlossen sy unnd alle fromme catholische unnd unsern
wahren catholischen glauben inn Franckrych (unnd wovern sy ver-
möchtend nach wytter) und zetrucken, und us zerütten mit
kriegsgwahlt sich zuo widersetzen, unnd alles dass so ihnen gott
verlihen lyb guott und bluot daran zuowenden, diseren unsern
wahren catholischen glouben zuerhalten, und zeschirmen ersuocht
und ervordert worden ihnen ouch für unseren theill mitt unser hilff
und bystandt, unserer kriegsknechten zuosetzen, wie dann sollich begären
so wol an unns alls die übrigen catholischen ort der Eidtgnoschafft
beschehen. Da so haben wir für ougen gnommen und zehertzen
gfüert, die iamerliche gstalltsamme die stach inn Franckrych unnd
die gottlosen bösen anschläg so nun lange zytt her wider den stand
der catholischen kilchen und religion durch derselbeigen vyendt
unnd widerwertige angricht und aber diser zytt nur zuo vyl
offenbahr inn werck sich erzeigent, unnd dass diss ein sach
so nitt allein dise catholischen ständ inn Franckrych, sonder ouch
der eere gottes, syn heillige kilchen, unsere wahre catholische
religion. Unnd letstliche ouch gmeine christenheit, unnd daby
unser vatterlandt, unnd unsere stend ouch selbs betrifft.
Derhalben inn ansechen und betrachtnus unser gewüsser unnd
schuldiger pflicht, dero wir alls catholische lütt gegen gott
unser seelen heill ehr und reputation, und dem
vatterlandt auch unser wahren catholischen religion unns schuldig
wüssendt. Und wie schwärlich unns wurde zuoverant-
wurten sahn gegen Gott unnd unserem vatterlandt, wo wir
ein sollich göttlich billig christlich begären abschlagen wurden.
Die viendt unsers wahren gloubens, unnser selbs hiemit hellffen
desto behärtzter machen zuo denen wir unns anders nützitt zuoversahen
haben, dann wo ihnen inn irem gottlosen vohrhaben gelingen
sollt (das gott eewig wenden welle) das sy ouch sich nitt
enthalten wurden wytter fort zetrucken iren gottlosen ihrtumb
(2)
ynzepflantzen, unnd unsern wahren catholischen glouben
allenthalben unnd so wyt sy vermöchtend uszurütten
ia ouch nach ihrem gewonten hoch- und übermuot
nützitt mehr sparen noch unsre verschonen sonder dem nechsten
ihr heill ouch an unns versuochen wurden solliches glychergstalt
an unns ouch allso zuo vollbringen so wytt sy immer
vermöchtendt, wie dann vor zytten von frommen
gottsäligen lütten gewyssaget unnd an ihre throwungen
ihr vohrhaben wol vermerckt würdt, derohalben uss oberzehlten
unnd andern guotten gründen, und ursachen die billich alle
fromme christen herzuo bewigen sollendt, so haben
wir inn dem Namen und anrüeffung Gottes
demselbigen ouch der hochgelopten himelkönigin Maria
und allem himlischen heer zuo lob und eer zuo wohl-
fahrt trost schirm und erhaltung unsers wahren
catholischen gloubens, und unser selbst eigen vatterlandt
inn diser begärten hillff, unnd ervordten christlichen
uffbruch mitt guotter vohrbetrachtung für unsern
theill bewilliget, ungezwyffleter zuoversicht
es werde solliches der göttlichen mayestat sonderlich
angenäm, unnd wol gefellig, unns aber zuo grosser
reputation, unnd verdienst by siner allmechtygkheit
und unserm vatterland zuo guoter wollfart
ruow frid und einigkheit dienen Amen.