(6)

...

Zum sibenden das man unser kriegslütt alle monat

mustern und zalen wölle, allwegen innerhalb den

ersten acht tagen eines ieden monats, sonst nach den

acht tagen söllen sy dann nitt meer sich zu mustern

lassen schuldig sin, mal sol aber nütt destoweiniger

unser kriegslüt vor ussgang des monats bezalen, da-

mitt sy ein gutt gehorsam regiment behallten mögent.

[am Rand: Zum achtenden das die fürsten und ständ diser catholischen

regligeion den unsern proviand halb gutte fürsech-

ung thuyent damitt sy iederzytt im selbigen nach

nottdurfft und umb ein zimlichen lydenlichen

schlag und pfennig versehen und darinnen kein mangel sye]

Zum nünden wöllen wir ouch das die obersten

und houptlütt ee das sy uss dem feld zühent umb ire

bezalung allenklichen ussbezallt werden, damitt sy ire kriegs-

lütt ouch zalen könnent, ouch sonderlich damitt die

oberkeiten wann sy wider anheimsch werden von irentwegen

nitt so vil übelruoff und unruowen haben müssen, wie

aber vormalen und bishar umb der französischen kriegszügen

willen beschehen. Und zum beschluss wo sich dann

fügen das bemellte unser kriegslütt nitt in söllicher

massen und nach dem innhallt diser gegenwirtigen

articklen und vorbehalltung gehallten wurden, so söllen

alls dann die obersten und houptlütt urloub begären,

oder aber den nächsten uns alls ire ordenliche oberkeytten

der sachen berichten darin gebürdend und nottwendig yn-

sehen zethundt, wie dann man vermeint möcht den

sachen am füglichisten und komlichisten zu begenen syn möchte...