Uff frytag nach Maria Himelfartt A 1589 ist Hanns

Thamman von Sempach umb das er an passportten

uss dem krieg und on sines houptmans erloubtnus widerumb

heimbkommen und ettliche unwarhafftte reden ussgossen

in m g h gfangenschafft kommen, Hatt allso uff

herren rathsrichters fürhalltten volgenden bscheid kommen.

Namblich und erstlich habe ime der Haas houptman Fleckensteins

Laquoi so allhie gsin habe ime den brieff von siner frowen

brachtt darin sy ime gschriben das sin muotter gestorben

da habe er den obersten sinen houptman umb urlaub

und die passportten gebetten. Das habe er im versagt

daruff sye er hinweg zogen dann es ime meer dann

400 gl geschadet wo er nit heimb kommen. Uff sölliches

sye er gan Digion kommen und allda ettlich tag by ettlichen

sinen bekannten verharret. Daruff syent Gladi im

Russpässlin und Hanns Roott der louffer nachim

gan Digion kommen und fortzogen. Am sontag

darnach [am Rand: so verschinen sontag dry wochen gsin]

syent sy widerumb gan Digion kommen unnd

anzeigt sy syent dry myl wytt von der statt usszogen

worden und inen brieff und gelltt (dessen sy by

1000 kronen by inen gehept) sampt den rossen gnommen

worden, da dennen habent sy solliches dem regiment

geschriben, und syent inen die louffers büchsen ouch

gnommen worden. Nach dem sye er uff zinstag den 8.

tag augstmonats von Digion dannen gangen und

verschinen samstag gan Sempach kommen.

Der houptman der Gwardi zu Digion habe auch zween

trummenschlaher nach selbigem gan S Joan de Laune geschicket

unnd alles was man inen gnommen, gevordert, da habent

sy nützit wöllen widergeben dann allein die louffer büchsen.

(2)

Uff samstag darnach hand sich m g h über disen handel erkennt

das er ussgelassen werden sölle, und redlich wer kon. Demnach soll

der schuldtheis Thutt zu Sempach ime umb einen vogt sähen, dem

all sin guott inventiert und vor m g h den vogtkinderrechnern

überantwortt werdent.