Ich Hanns Stölli schults, zuo Solotorn,

tün künd und bekenn offenlich mitt

diserm brieff, das hütt sines datümbs,

vor minen herren den rätten ingerichttes wyse

versammett, unnd mir erschinen sind, Adam

Fäsler von Bern an einem, unnd Hanns Mänly

dem anderen teylen, unnd liess der gedacht

Adam Fäsler, durch sinen erloupten für-

sprächen offnen, unnd darthun, wie dan im

von ettwas gelltes wegen, so durch ein frown

Angehin genampt, die zu Lucern todes abgangen

verlassen, unnder iro, vor Pary uber antwürtt,

durch mine herrn von Lucern, kuntschafft

der warheyt uff zenammen, unnd zulegen

erkant, unnd zügelassen wäre, darumb dem

obberürtten Hanns Manly zu wüssen sin möchtte

mitt begäre, im den selben rechtlichen zuver-

hörn, unnd siner sag, geloubwürdigen schyn

zu geben, ouch dess zireröllg (?) der billigkeyt

zubehelffen, allso nach dem kuntschafft der

warheyt mencklichen billichen mitt geseylt

würdt, hab ich, nach erkandtnuss miner

herren, dem oberürtten Hanns Mänly, ge-

botten, harumb zureden, wie dan nach form,

und harkommen des rechtten bruchs, und

gewon ist, und hatt allso der vermelldt

Hanns Mänly, by sinem geschwornen

eyde harumb offenlich gethan, geredt unnd

bezügett das war syg, in letstvergangnem

zug vor Pavy, alls man an die schlacht lüffe,

gebe im der obberürtt Adam Fäsler sin seckell,

und spräche, louff bring das angendts

Ängelin, das thätte er, und beatte si, das

(2)

si im den selben behieltte, antwurtte si, wie

si söllichs gern thun wöltte wie es, dem iren

ergienge, allso sölte es diserm ouch gan, wytter

sye im harumb nitt zu wüssen, unnd alls nun

sölliche kuntschafft, geredt hatt, liess der

obberürtt Adam Sasler, wytter zu rechtte

setzen, ob man im dero dag, nitt billichen schyn

geben söllte, ward daruff durch die obberürtten

min herren, gesprochen, unnd geurtteylet, nach

dem im, durch min herren von Lucern sölliche

kuntschafft verwilligett, unnd erkandt worden,

das im desshalb zu fürdrung des rechtten,

urkund, under minem alls des richtters uffge-

trucktem sigell geben söllte werden doch mir

und miner erben ane schaden beschechen den

pfingst zinstag alls man zalt von der geburtt

christi dess unsers lieben herren tüsend

fünffhundert zwentzig und fünff iare