Uff andingen MGH unnd gepott herren raathsrichtters Rudolff

Mören, hannd betzügtt nachvollgennde personen gegen und wider

Vytt Cäppeli den pfister unnd sinem sohn uff mittwoch vor s verenentag

anno 1589.

Namlich und erstlich so betzügtt Heinrich Rychener der schumacher,

alls er verschinnen sambstags Mellcher Rungk den stattknechtt, gsähen

vor Vytt Pfisters laden stan, sye er zuher gangen den Mellcher uff

die achslen gschlagen unnd gfragtt was er da thuye, habe er geantt-

worttet, ich zelen gälltt, im selben habe der alltt Cäppeli ihme das

gälltt mitt der hannd dargstossen unnd geredtt, y ich wett das es ett-

wan einem uff der seel verbrunne, doch niemands genamsett, daruff

sye er züg von innen ganngen.

Demnach so betzügtt Hans Gassman der müller, er habe verschinnen samb-

stags dem Cäppeli mäll brachtt, und wie er allso vor dem laden ge-

stannden, sye Melcher dahar komen und zum iungen Cäppeli gsäytt,

wir hand gfälltt, es ist nitt 15 ss es ist 5 lib, min herren hands besserett,

daruff habe der iung Cäppeli geanttworttet, was fünff pfundtt?

hands MGH bessertt? Gott der danck innen das ist die pension so man

uns schicktt, doch habe er ietz das gälltt nitt, wann er ander geben so wölle

ers auch geben, do habe Melcher ihme mitt dem thurm dröwtt, inn dem

sye er züg von innen ganngen, unnd über ein wyl wider komen syentt

by noch byeinanderen gsin, was sy aber geredt, möge er nitt wüssen.

(2)

Demanch so betzügtt Mellcher von Rungk der stattknechtt, namlich alls er

zum Cäppeli komen unnd ihme die buss abgefordertt, habe er ihme zu

annttwortt geben wann es die ander gebentt so wölle er es auch geben, nach

dem er nun am abentt wider zu ihme komen habe er ihme ein pfundtt

geben, unnd alls er züg bis zu Wollff Pfister huss komen unnd inn

zädel gelugtt habe er funden das es fünff, gsin habe er wider umb kertt

wider zu imme ganngen und imen anzeigtt sy müssentt ihme 5 lib

geben dann es sye fünff pfundtt und nitt eins pfundtt, daruff habe der Simon

geanttworttett, das sye die pension so man innen zum huss bringe, wann

man ettwas usstheile brinnge man innen nütt, er müsse das syn mitt

surer arbeit gewünnen, ein annderer gewünne es mitt dem gytt, der

tüffel werde bald aber einem gnug geben, er gäbe mitt desshin einem

gnug, und alls der alltt das gälltt zelltt habe er es mitt der hannd davon

gstossen unnd geredt, er wölltt das es ettwan einem uff der seell ver-

brunne.