Min underthenig wyllig dienst...

...Ich han die tag vernomen

wie dass ir min gnedig hern von meinett thwegen handtt

kundschafft lassen auffnemen betreffentt ettlicher reden die

ein bott von Sollothurnn auff sambstag nach dem nüwen iarss

tag beschechen hatt sich also zu tragen auff dato ist der bot konn

und hatt hern schuldhess Pfyffer brieff bracht dornach zum

rosly komen herberg begertt. Doruff in houptman Ieger

so by mir am disch sass fragt wass guts nüws zu

Sollothurnn wery antwortt der bott ess wery auff dem

nüwen iars tag ein bott von den iro komen und brieff

bracht und darby anzeigt wie dass die iro geschlagen mitt

dess von Dumenen wol und gezigett und inen biss in

die 15000 man erlegt und die iro feldt behalten hetindt

und aber deren von Solothurn bis in die 40 man ver-

loren hettindt dermalen (?) 8 uss der statt sigent die

er ettliche mit dem namen genempt hatt. Doruff

mir in gfragt ob die unsseren auch der by gsin

er nein geantworttett uff sontag dornach hatt

in der altt württ auch gfragt hatt er glich inbysin unser

3 auch genatwortt wie vor am selbigen tag hat der

altt württ den Ieger zum früschy zum win gfürtt da hat

der Ieger die sach wie er von botten ghörtt allenklich erzelltt

darby sindtt vyl erlicher lühten gsin und auch anzeigt die

unssere sigent nitt darby gsin. In 3 oder 4 tagen

darnach hentt mich der Issenkrämer Hanss Keller auch

Jacob Wissig gfragt so han ich innen glich wie der Ieger

anzeigt das züg ich an Gott und an eren lüht dass

mier nie insin komen dass ich grett hab die unsern

sigen geschlagen oder habentt fendly ferloren ist aber (???)

ein mall ob d glady ein gossen geschrey gsin dass man

gseyt es kom von Ury mag aber nitt wüssen von wem

ess kompt so der bot von Sollothurnn hetty anzeigt dass

die unsser auch darby gsin wärentt weldtt ich dass üch

minen gnedigen hern und vätter wol anzeigt haben.

Dan wass für ein freüdtt soldtt ich doch ghan han wan

die unssere soldttentt undenglegen und die hugenotten

gsigentt dass wery mir by miner selbseligkeit

imer leidtt han auch so baldtt glady heimkomen

(2)

Jacob Wyssig anzeigt ess sig nitt war wass der bott

von Sollothurn grett hatt was dan glady für nüwy

zittung anzeigt hat und ich die auch grett han darby ist

gsin Hans Keller Heynrich Schauberger. Was dan betryfft

von Schwitzs und Underwalden dass setz ich her Dohter (?) Rösly

von Schwitzs heim sampt min bricht (?) der khan ich min

gnedig hern und vätter wol brichten dass da khein schmächlich

wortt nitt beschechen hienebentt wyl ich üch mine gnedigen

heren bätten han ir wellents mit nitt ver ubel aufnemen (?)

das ich nitt auff dato erschine nbin ist allein die ursach

wo ich und min fraw sampt mine dienst auff der

gassen der verschiner tag für gangen sindtt hat ieder

man auff mich zeigt ess werdy mir biss mentig

ein mall der lon wärden dass ich fortherin schwigen

wärdy hatt mich die sach so hochlich bedurtt, dass

ich mit der zytt wartten wellen dan ess hette fyll

sachen auf mich in ill komen mögen die mir gar

beschwörlich so in ill veranttworten könen derhalben

lang min demutig bitt uch min gnedigen

hern und vätteren ir wellentt so wis thun und mir

so ettwass wider uch mine g h und vetter grett worden

gnedenklich verzichen ess muss auff Gott wyl niemer

mer beschechen hiemitt settz ich üwer gnaden

in gottlicher schutz und schirm und maria. Datum den

20 jenner 1590

Ewer gnaden allzitt wylliger

diener und burger Caspar Pfyffer

(3)

[Kundschaften]

Uff andingen und gebott MGH ist nach volgende

kundtschafftt gegen und wider Casparn Pfyffer dem

wirtt zum Rösslin von wegen ettwas unwarhafftter

ussgossnen reden uff unnd ingenommen worden uff

donstag nach Antony A 1590.

Unnd namlich so bezügtt Jacob Wising das uff mon-

tag alls die nachburen in der Kraamgassen by einandern

gsin, habe Hanns Jacob Montbraatt und Heinrich

Schonbinger der ysenkrämer und er züg mitt inen

zum gerweren gewollen gan rechnen, sye Caspar Pfy-

ffer zu inen kommen und zu ime zügen geredt

botz element es ist ein bott kommen, der hatt anzeigtt

es syent 14000 umbkommen da zubesorgen sye

es werde der unsern auch vil kostet haben. Daruff er

züg ime sölliches widerret und gsprochen wie sölliches

möglich sye die unsern ligent zu Parys und der

fyend zu Tours unden, es werde aber ein unwarhafftte

sach syn er sölle nütt davon sagen. Donstags dar

nach habendt sy beid abermallen mitt einandern gespatz-

iertt uff der Sprüwerbrugken, da habe er Caspar

Pfyffer aber von oberzelltter sach und zyttung geredt

das habe er züg ime sölliches abermallen widersprochen

daruff er ime wytter anzeigt er werde wol waar syn

dann dise bottschafft eben der bott so herren

schuldtheissen Pfyffer brieff brachtt, anzeigt habe.

(4)

Heinrich Schonbinger der ysenkrämer bezügtt, das uff

vorgemelltten tag am morgen Caspar Pfyffer zum Rösslin

uff der Rüssbrugken zu ime kommen sye und ime anzeigt

wir uff sontag den gestrigen tag ein bott in siner herberg

gsin sye der anzeigtt wie bose zyttung vorhanden sye

namlich ess syent 14000 oder 15000 uff dem platz bliben

das habe er widersprochen und geredt, dise zyttung werde

nitt waar syn dann der glychen unwaarhafftte reden vor-

mallen auch von Solothurn har komen syent. Daruff

er ime geantwortt er habe es nitt allein gehörtt es syent

vier oder fünff ouch noch by im un der stuben gsin alls

der bott inen sölliches anzeigtt habe. Und sy die

von Solothurn wüssent schon wie mancher der iren umbkon

man sye daby wol anzunemmen, das es waar werde

syn was diser bott anzeigt habe es werde aber in dry

oder vier tagen gwüssere bottschafft kommen. Sonst habe

er damallen nit wöllen anzeigen, wölliche parthy oberhand

gnommen habe wie offtt sy in ouch gfragt habent.

Hanns Keller bezügtt das uff zinstagdarnach sye er

züg zu dem ysenkrämer by sinem laden kommen da

habe er ysenkrämer ime zügen die obgemelltt zyttung

wie er sy von Casparn Pfyffer gehörtt, anzeigtt. Uff

sölliches sye er züg zun Casparn Pfyffer uff die

Rüssbrugken kommen, und ime gefragtt ob doch sölliche

zyttung waar sye. Da habe er im anzeigtt der

(5)

bott von Solothurn Tours genannt, so herren schuldt-

heissen Pfyffer von J Balthasars son brieff brachtt

habe sölliches in siner herberg anzeigtt. Und sy die

von Solothurn wüssent schon wär der iren umbkom-

men sye da habe er inn usstruckenlich gefragtt

ob die unsern auch daby gsin syent. Daruff er

geantwortt der bott habe es nitt gwüsslich

können anzeigen es werde aber nitt lange zytt

fürkommen es werde gwüsse bottschafftt kommen

es sye aber wol zubedencken sy werdent ouch da-

by gsin syn der bott habe es inen nitt wöllen anzeigen.