Actum 2 martii A 1590

Abred zwüschen herrn schulltheissen Ludwigen Pfyffer 1

und h vogt Wilhelmen Balthasar 2.

Antreffend und von wegen verwalltung der halben

hauptmanschafft dess fendlins Eydgnossen [am Rand: von Lucern] zu Lyon,

wölche houptman Peter Pfyffer gesagts h schull-

theissen son mitt houptman Niclaus Bircher von Lucern

gmein ghept, wöllche halbe houptmanschafft h schull-

theiss ime vogt Ballthasarn zu regieren und verwallten

übergibt mitt volgenden gedingen.

Erstlich sobald vogt Ballthassar gan Lyon kompt sol man

mitt den knechten ordenlich abrechnen umb ire besoldung

so sy die nächsten vergangnen 9 monat verdient, dass

selbig in ein sonderbaren rodel verzeichnet und h schull-

theissen ein abschrifft darvon zugschickt werden.

Was ouch ietz fürhin für gellt erlegt würdt daruss sol

man voruss und ab die allten knecht iederzyt abzalen bis

das sy umb ire allte usstende bsoldung zallt werdent.

Es sol nochmals ouch h schulltheiss Pfyffer keinen andren

an syn vogt Ballthasars statt verordnen, dann allein

syner söne einen, und so dasselbig beschehe sollte sol

mans ime ein monat oder zwen zu vor abkünden

damitt er syne sachen und rechnungen ouch stellen konne.

Alls dann und im selben faal soll man abermalen

mitt den knechten luter und heitter abrechnen, sechen

und verfassen was ieder verdient und was man

ime noch schuldig sye, vom selben sol vogt Ball-

thasar h schulltheissen ordenliche rechnung geben,

und ime zeigen was fürgeschlagen oder was der fürschlag

sye, derselbig sol dann theilt werden, und vogt

Ballthassarn wie volgt sin theil ussgericht werden.

Namlich söllent ouch allsdann voruss und vordannen

die knecht so die zytt gedient under syn vogt

Ballthasars verwallgung, uss dem gellt so man

mitthin erlegen würde es sye zu Lyon oder anderst-

wo, bezallt werden.

(2)

Wann abver hauptman Bircher oder der so an vogt

Ballthasars statt naher verordnet wurde das

empfangen gellt anderst wohin verwenden wurde

dann zu bezalung der knechten, alls dann ist luter

und heitter beschlossen wann es sich befindt das

man so vil gellts empfangen alls die 9 ersten

monat antrifft, dessglychen die übrigen monat

so vogt Ballthasar dienet hatt, so sol h schulltheis

Pfyffer schuldig sin ime vogt Ballthasar umb

sinen halben theil dess fürschutzes wort und werck (?)

zegeben daran er kommen möge.

Und sol sich die theilung dess fürschlags von diser halben

hauptmanschafft so hauptman Peter Pfyffer zu vor

versehen allso verstan das sölcher fürschlag halb

heren schulltheissen Pfyffer und halb vogt Ball-

thassaren iedem zu glychem theil gehören sölle.

[gestrichen, mit Bemerkung am Rand: wellit in minem namen ein hand

gschriftt machen nach lut des ardickels so wird min

frouw siglen:

Über solches hatt ouch h schulltheis Pfyffer h vogt

Ballthasar versprochen noch wytter ime inne umb 100

kronen monatliche bsoldung in rodel ynzestellen lassen,

söllche monatliche bsoldung sol alls dann auch im

faal der theilung, wie vil und von wie vil

monaten es dann sich anlouffen würdt, zu dem

obedachten fürschlag yngerechnet werden und

h schulltheissen Pfyffer von dem selbigen ouch

sin halben theil glych wie in dem fürschlag ge-

volgt.]

Es sol auch alles das gellt so fürhin uff diss fendlin

erlegt würdt vogt Ballthasar zum halben theil

und glych wie houptman Bircher empfahen,

und h schulltheissen gutte rechnung iederzyt

darumb hallten. Und hauptman Bircher

ime vogt Ballthasar in sollche verwallung gantz

kein ynred thun.

(3)

Letslich sol ordenlich aberechnet werden was

h schulttheiss Pfyffer und houptman Bircher

in disem gewirb und uffrustung der houptman-

schafft yngschossen, findt sich dann das h schullths

meer dann houptman Bircher yngschossen das

sol h vogt Ballthasar von h schulltheissen wegen

empfahen zu sinen handen und erwarten was h

schullths ime desshalb bevelhe, und dasselbig

sol sich uss unvertheilltem gellt vordannen nemen.

[andere Hand:]

Ittem so es sach weri dass der dienst

ein ennd hetti die wil ich noch dienti

unnd so man sla dan nitt bezalt wurdi

so sol ich so man denn knechttenn noch etwas

schuldig weri wass sich min deil driftt

schuldig sin denn knechttenn rad und

antwort genn das si zu friden sigit und

helfen zolltt (?).

Letstlich ist ouch luter und heiter abret

so mier diser dienst nit me an nemlich

sölli ich herren schulthes Pfifer ouch einen

oder zwen monett dar vor ab künden

da mt er sich witter nach siner

glegenn heit wüss zu halten.

[wider die erste Hand:]

Was h schullths für gellt darschiesst sol Wilhelm zum

halben theil am mart geben dargegen volgt ime auch die halbe

nutzung darvon und alles zu ordenlicher rechnung stan