Uff freitag nach galli anno xxv

Jost Bader von Ruswyll, dingtt kuntschafft an Marti

Ariger, und Clewy Hasler auch von Ruswill, gegen

und wider dem tüffer zu wolhusen zuo gepruchen

Und nach dem eyd, rett Marti Ariger, der Uly Hebler

von Ruswyl, habe im, geseit, das Jost Bader, und

er der Hebler ouch Uly Stechbüller, söllen hin weg

ziechen zu den püren, der tüffer habe sy das

geheissen, und sy bestellt, und inen den bescheid

gan Zoffingen geben, da werden sy ein ander marten

dan der tüffer habe gesagtt, im syend brieff kon, von

den püren old iren hoptlüten

So rett Clewy Hasler, Uly, Stechbüller sye ouch

hinweg zogen, und sye sin knecht, und alls

der selb, umharkon sye, habe er der züg, zuo

im gerett, wie tarffstü kan, oder hie sin, da

rette Stechbüller, warum wollt ich nit kon,

der tüffer hat uns uffgewisen und hinweg gfürt