Uff andingen herren hauptman Caspar Ratzenhoffers
unnd gebott herren raathsrichters I. Niclaus von Hertten-
steins ist nachvolgende kundtschafftt gegen und wider
Bürgin Hügi von Nebikon uss der graffschafft
Willisau uff unnd ingenommen worden uff frytag nach
crucis erfindung a° 1590
Hanns Wagner von Reyden bezügtt alls er züge unnd andere uff den
oster ziestag by hauptman Caspar Ratzenhoffer gsin
unnd ire zallungen gevordert es wäre an gelltt oder thuoch
gsin, sye ihnen gar schlechten bscheid worden unnd habe
er der hauptman gar nützit thuon wollen sonder von inen
ab der rüssbrugck gangen, daruff habe Bürgi
Hüge von Nebikon geredt wann man ime sin recht
an thätte so hüwe man im den grind ab, unnd
glych darnach abermallen gesagte wortt widerumb
eröffnet unnd noch wytter er sye auch wider eyd unnd
eer von Parys zogen das habe hauptman
Ratzenhoffer schwöster unnd andere die darby gstanden
gehörtt.