Actu donstags vor dem sonntag
jubilate a° 1590 vor minen g herren
den rhäten der statt Luocern.
Von wegen der herren obersten und houptlütten
der zweyen regimenten catholischer eydtgnossen
so iüngst der heiligen pundtsvereinung in Franck-
rych gedient hand, zalung halb irer knechten darumb
uff gestigen tag vor den herren gsandten der fünff
catholischen orten gehandlet und verabscheidet worden
sind uff hütt vor minen g herren den rhäten
bemellter statt Lucern erschinen h oberster Rudolff
Pfyffer ritter sampt den übrigen minen herren synen
mitthouptlütten von Lucern, und haben ir
hochbeschwärlich anligen und not glych wie uff gest-
riger tagleistung fürbracht, und umb hillff
und rhat gebetten. Daruff was gester ge-
handlet abgehört, und erkennt worden, das
in ansähen der leidigen gstalltsame der sachen und
dess grossen mangels an gellt so allenthalben vor-
handen, sy die herren obersten und houptlüt
(die unsern) den knechten todt und lebend
einem ieden der noch kein gellt für dz hin man
uss dem feld zogen, empfangen, damitt sy destwilliger
syent uff das übrig zewarten, dry kronen ussrichten
und zalen söllent und iedem sin restzedel geben
hette ouch einer gellt, aber minder dann dry
kronen empfangen, sol ime daruff geben werden
das er dry kronen bringe, die frömbden so
usserhalb miner g herren gepiett wonhafft
(2)
sind, sond sy umb sollche dry kronen den nächsten
und one verzug, abvertigen, di heimschen aber
so im land daheim innerhalb vierzehen tagen
den nächsten ussrichten. Demnach was die
knecht in den herbrigen allhie verzeret söllen
die houptlütt mitt den wirten abrechnen und
dasselbig über sich nemen, und mitt inen über-
kommen wie sy mögent, dasselbig sol dann
an den zalungen abgan. Was dannet-
hin den übrigen anstehnden rest diser kriegs
zalung belangt, söllen die houptlüt uss
dem ersten gellt das da kompt, die knecht ab-
zalen, alls wytt es glangen mag, käme aber
kein gellt irer zalung halb bis uff nächstkünff-
tig martini, so sölle es alls dann zu der
oberkeit guttem beduncken stan was oder wie
vil sy alls dann zalen söllent, wo aber sy
di houptlüt mitt dem andern in der gütte
anderst überkommen und pactieren mögent,
das lassent min g herren ouch beschehen.
Stattschryber zu
Lucern Cysat