Antreffend zalung der kriegslüten so uss iüngstem zug uss Franckrych heimkomen

darubm dann unsre g h kurtz hievor ein lütterung geben wie die h obersten

und hauptlütt sich in dem selbigen hallten söllen, und denn verschinens frytags

ettliche amptlslütt ettliche hauptlüt dess wegen auch vor ingehen (?) in recht gefasset

und nit vermeint by den geordneten iii kronen dem gmeinen knecht gesprochen

zeblyben uss für gewendten ursachen, domalen mgh sy zusamen gwisen, sich in

der gutte zu verglychen, mitt dem anhang das sich die ordnung der 3 kr

in ansehen gstalltsame der sachen nit uff die amptslüt sonder allein uff die

gmeinen knecht verstan sölle, daruff die amptslüt sich yngelassen den dritten

theil bar zenemen und umb das übrig uff zil und tag und versicherung

zebergen, da aber die h obersten und houptlüt gmeinlich uff hütt vor

mgh erschinen und ir beschwärd fürgewandt und gebetten harinn ettwas

millterung zethund, dann sy gethan was möglich, unnd meer vermögen sy dissmals

nitt. Hand mgh inen den obersten und hauptlütten geraten nachmalen sich

zusammenzethund, mitt dem klaghafft sich güttlich zu verglychen, im faal aber

dasselbig nitt beschehen möchte sölle der handel diewyl er wichtig und

im rhat ein so grossen usstand gibt, allso das denen minen heren so noch in der

stuben blybent beschwärlich fallen wil einzig allso darumb zesprechen,

an mgh rat und hundert langen und by eyden dazu gebotten

hieneben was hauptman Jacob Allmenders säligen erbe belangt inen

nachmalen warnung gethan und gebotten werden sölle, das sy sich gefasst

machen und iren theil der zalung damitt es sich ouch so vil alls houptman

Kündig bezallt, betreffe, wo nitt sol den ansprechern erloupt sin, ir hab

und gut anzegreyffen.