Frytags war der 10000 ritters tag A° 1590, ist Hanns Fry

Burger zuo Lucern, umb unnd von wegen dass er uff gestrigen tag ettliche

uss m g h statt und landtschaftt hinderrugs m g h gan Wolhusen

fueren wellen inn m g h gfangenschafft khomen, hatt allso uff

fürhalten herren raathsrichters volgenden bescheidt gäben.

Namlichen unnd erstlichen ungefahr vor einem monat sye Hanns Im Bach

zuo ihme khommen, unnd inn angeredt: Hanns ich wüsste ein sach

die für dich wäre. Es sind ettlich Müllhuser, die weltend gern ihr alte

fryheitt unnd gerechtigkeitt widerumb erkriegen, begärendt alls 36 oder 50

redlicher gsellen, unnd weltend dich gern zuo ihrem houptman haben,

dass du dieselbigen abhin fuortest.

Daruff er ihm geantwort, er dörffe ein solliche sach nitt wol ohne vor-

wüssen, und erlouptnuss m g h bestan, unnd für nemmen, unnd glych

hiemit zuo dem veninger (?) von Müllhusen selbs gangen, unnd

ihne umb solliche sach angeredt, wie er mit solliche sach ohn bewilligung

einer oberkheit überstan dörffe, daruber ihme der veninger

geantwort, er solle ihm nur inn der sach willfahren, wass er sy

zuoschaden khomme oder entgelten müsse, welle er ihne schadlos

halten, unnd her schuldtheis Pfyffer werde ihme nit darwider sin

solle ihne nur gan gan fragen, uff solliches sye er zuo h

schuldtheiss Pfyffer gangen, unnd ihme anzeigt, wie dieser sach

an ihne khommen, da habe ihme ermelter h schuldtheiss sollichs

geweret, er solle der sachen müssig gan. Dass aber er h

schuldtheiss ihme anzeigt solt haben solle der sachen müssig gan

dörffe wol machen dass man ihm dass houpt von achslen hüwe

sye ihm nitt mehr zuo wüssen, möge sy vergessen haben doch welle er

ime dess orts nit hindersich stellen nach widerred.

Uff solliches er widerumb zum Hanns Im Bach gangen unnd ihme

anzeigt solle es dem vyringer abschlagen, welle sich diser sach nützit

beladen dann h schultheis Pfyffer ihme solliches geweret.

(2)

Nach disem habe es sich ettwan 14 tag lang verzogen disere

zytt habe der veniger h schuldtheis Pfyffer nachgeworben

der ihme zur andtwort gäben solle zuovohr zuo den andern

orten gan, unnd lossen was die selbigen darzuo sagendt,

daruff sye er gan Uri, unnd Schwytz gangen, daselbs ouch

angehalten, sye ihm daselbs khein ander bscheid worden, dann

was herr schuldtheiss Pfyffer macht syer ihnen wol gmacht

unnd haber sonderlich by her landtaman Reding zuo Schwytz

unnd by herrn landtamman und statthalter zuo Uri gar

guotten bscheidt funden, sonderlichen habe ihme landtaman

Reding versprochen umb 7 oder 8 eerlicher gsellen zuo luegen

desglychen ouch zuo Uri herr landtamman unnd statthalter

diss alss hab ihm der veniger alls er uss den landen

widerumb harkhommen alls für gäben.

Verschinen mittwochen morgens sye der veniger mitt

brieffen uss den landen khommen, die habe er herren schuldtheiss

Pfyffer überantwort, unnd des bscheidts darüber

gewartett. Am selbigen morgen sye er Hanns Fry zuo

Gabriell Heiserlin khommen, unnd ihm disen handell

anzeigt, daruff ihne ouch dingen wellen, und wytters

ouch anzeigt, der vüniger werde glych nach dem raath

vor herren schuldtheis Pfyffer bscheidt über die brieff

so er ihme uss den landern bracht empfahen, alls er disen

artickell dem Heiserlin anzeigt, sonders er thüege im unrecht

dass er ihm fürgäben habe m g h werdendts erlouben.

Verschinen montag znacht sye der bott von Mullhusen

khommen, unnd uff den veniger gwartett, alls er nun uff

mittwochen khommen haber er im anzeigt er müesse

(3)

verschaffen und ordnung gäben dass sy uff sambstag znacht

daunder syendt dann die burger gerüstett, und wellend allsdann

den handell angryffen.

Uff mittwochen am morgen habe er sich mitt dem viniger vereinbaret

zum beschluss wie volgt. Namlichen er solle sich mit 30 knechten und

redlichen männern gerüstet machen, unnd gestrigs tags am morgen früe

mitt ihnen, unnd so vyl er nach uff der strass ankhommen iette mögen

fort züchen, alls dass sy uff samstag znacht, daunden z Millhusen

gsin wärendt, daselbs habe man sy sollen, durch ein heimlich yngang inn die

statt füeren lassen sobald sy darin der statt gsin wärendt, hand

die burger wellen hand anlegen, unnd ettlich wellen gfagen

annemmen, vermeintt wann sy 6 oder 7 hetend gfencklichen

ynzogen wurde sich alls dann niemand mehr gwerer han. Unnd er Hanns

Fry nütt anders thuon, dann mitt sinen knechten, Lucern Uri Schwytz

hie schryen es wer dann sach gsin, das die

burger ubergweltigett wärrendt worden, und underglägen, alls dann

hand sy sollen ihnen helffen hand anleggen.

Dass er aber den knechten, unnd sinen mitgspanen anzeigt solte

haben, m g h habend sollichs erloupt, und bewilligett, die

sach müesse inn geheimb zuogan, will er gentzlich nitt gichtig noch

gstandig sin, sonder sy thüryendt im gwalt zkurz unnd unrecht

ann er ihnen allen gmeinlich anzeigt wie der handell beschaffen,

das welle er durch den panermeister Hildtprandt von Roottenburg

bezügen, das er ihnen allen gemeincklich anzeigt, ich will es

üch allen gesagt han, dass ich dessen khein nachtheill haben will

gang es wie es welle darnach ziechendt nitt mir oder nitt.

Dass aber ihme anding gsin wyb und kind zuoerwürgen

inn den bettinen sye gentzlich nitt sonder man thüege dem

viniger gwalt zkurz, unnd unrecht, unnd wider solliches

(4)

mitt der warheitt niemandt an tag bringen sye derhalben

sin höchstes begären man ihme solliche lüt umb die augen

stelle.

Sonst zeigt er an und verhoffe dass garniemandt abhin sin

werde wiewol uss den anderen orten ouch syendt bestelt

gsin, dann der vüniger ihme anzigt landtamman

Reding ihme erliche und redliche lütt verheisen habe.

Letstlich bittet er m g h umb günstigs unnd

gnädigs verzychen, habe solliches allso in einem widermuott

fürgnommen, sye ietzundt inn manchem krieg gsin unnd nie

welliche er verlieren müesse.

Diser handel ist ussgmachtt lütt dess raatsbuchs fol.

(5)

[Es folgt die Einvernahme vom Viniger von Müllhausen. Dieser wird des Landes verwiesen]