Zinstags vor Jacobi A 1590 ist Dorothea Kempff

Caspar Studers fraw die von MGH verwisen gsin,

umb und von wegen das sy ir tochter hin und wider

verkuplet in MGH gfangenschafftt kommen

und nach dem iren sölliches von h raathsrichter

fürgehalltten hatt sy volgend bscheid geben.

Sye nitt minder dann das sich ir tochtter mitt dem

herren Pompeio zum Crütz zuo Uri vergangen habe

sy habe es aber nitt gwüsst vil weniger darzu ge-

hollffen nach verkuplet und von desswegen sye ir

mann alls es sölliches vernommen, inmassen so zor-

nig worden das er im der tochter getrowt sy umbzuo-

bringen, und darumb herr Heinrich der Jesuiter

ime das heillig sacrament nitt geben wöllen, sonder

inn vermanet er sölle sy nitt höher dann

irem verdienen nach straffen es sye mitt schlachen oder

andern, wölliches er gethan, sidtharr habe sy nütt

böses von irer tochter nie gesähen nach vernommen, sy werde

aber ir bscheid wol selbs können geben. Das aber sich

ir tochter der gstalltt übersähen sye iren von hertzen

leyd, möchte lyden das sölliches nitt beschähen wäre,

wölle fürohin besser achtt uff sy haben, und sy zum

wercken halltten.

Das sy aber von MGH verwisen unnd nütt destominder

allein wone bittet sy MGH sy allhie zuo gedulden

wölle sich fürohin halltten unnd tragen, und redlich wercken

das man kein klag von iren hören müesse.

Ist nachmallen verwisen.

(2)

Uff vorgemelltten tag ist auch Margret Studer der

vorgenannten tochtter umb vorgehörtt sachen willen inn M

GH gfangenschafftt kommen hatt uff fürhalltten

h raatsrichters volgenden bscheid geben.

Namlich es sye nitt minder dann das sy sich selbs

mitt dem herren Pompeio vom Crütz zu Ury über-

sähen habe. Darzuo habe iren aber niemand anderst

geholffen dann irer muotter bruoder und sin tochter

zuo Ury die habent sy dahin verkuplet. Sy sye

aber nitt meer dann 2 nächt by ime gelägen, wölliches

iren von hertzen leyd, wölle sich fürohin söllicher sachen

gentzlich müessigen wie auch dess gassen uff und

ablauffens, und fürohin redlich wercken. Das

sy aber andere wellttsch allhie oder andere personen

söllttent umbher zogen haben, sye gentzlich nitt sonder

beschähe iren unnd inen kürtzlich unrechttm dann

wo dem allso wölltte sy sölliches glych so wol alls das

sy sich mitt dem herren Pompeio übersähen anzeigen.

Bittet MGH umb gnädige verzüchung müesse

nitt meer beschähen sonder sich fürohin dessen gentzlich

müessigen.

Ist uf ein gewonnt urfech ussgelassen, unnd hand

MGH iren anzeigen lassen das sy sich

fürohin züchtiger halltte, wercke, dann man uff

sy achtt haben wo man sölliches unzüchtigs wäsen

meer von iren sähen wurde, werdent MGH sy

irem verdienen nach straffen.