1590

Monntags vor sannt thomas tag anno 1590, ist Mathys Fellman

von Münster inn M G H gefanngenschafft komen, umb unnd von

wegen das er ettliche knechtt, so inn verschinem zug inn Franck-

rych gsin, solltte diser tagen uffgewicklett haben, allhier inn der statt mitt

den hauptlütten ettwas uffrurs an zefahn.

Alls uff fürhallten h raathsrichertters zeigtt er an, er habe nitt anders

vermeintt, dann als er mitt samptt sinen mittgsellen mitt hauptman

Ratzenhoffer unnd hauptman von Wylls seligen erben allhie im rechtten

gsin, die anttwortt sye innen worden, sy söllentt ein mall iettlicher

angryffen, uff sollichs sye er unnd ettliche siner mittgspanen vorschinner

tagen allhar inn die statt komen, zu ettlichen miner herren gangen,

unnd ratth gesuchtt, wie sy die sach an die hand nemmen unnd wie sy

ime thun söllen, da innen von ettlichen zu bscheid worden, es sye nütt

vorhanden, sy müstentt noch ein wenig das best thun, unnd sonderlich herr

vogtt Keyser habe innen zu bescheid geben, es syentt ihren zu wenig

er könne innen nütt rathen, so habe innen am verschinen mittwochen

Martin Schwyzer auch anzeigtt, wann sy nitt all zesammen standentt, so

so werdent ir nütt schaffen, zu dem habe Hanns Jacob Ratzenhoffer

unnd Hans Ulrich Wällttin sich gegen innen auch erclärtt, wann sy all

zesamen standentt, so wöllentt sy innen auch bystan, und sonnderlich habe der

Ratzenhoffer geredtt, sy wöllent sinen bruder woll us der geissmatten

lüpffen, sy söllentt nur gwallttig zesamen stan, sonst habe er

(2)

gar dhein untruw anstiften noch machen wöllen, dann allein begärtt

wyb und kind, hunger unnd mangel tryben und nöttigen thutt,

sonst habe er von dem mandat so inn die emptter ussgangen,

erstlichen, bis das er brichtt worden, nütt gewüsstt, dann er

selbiger zytt im Ellsas gsin ./.

Bittet M GM H umb gnad

Zinstags darnach ist obgenannter Mathys

Fälman abermallen mitt allem ernst be-

fragt worden.

Blybtt gentzlich by voriger antwortt: das

er aber geredt sölle haben sy wöllent

sich 3 oder 400 samlen unnd in die

statt kommen sye gentzlich nitt sonder

beschäche im gwalltt z'kurtz unnd un-

recht, ettliche ander möchtent es wol ge-

redt haben sye aber im nitt in wüssen

wär die syent. Das sye wol waar das

[Randbemerkung: das under anderm alls sy lettstlich hie gsin]

Hanns Bachmann von Münster geredt

auch gelltt oder bluott haben.

Alls sy aber lettslich hie gsin und h

statthalltters Sägessers raath gehopt wie

(3)

sy doch der sach thuon söllent damit sy mögent

bezalltt werden habe er inen disen bscheid

geben, unnd sy fründtlich abgmanet geduldt

umb heissen allhar komen.

Sonst alls er unnd sine gspanen h vogtt

Keisers raath pflegt habe er inen nütt

anders enzeigtt dann das er inen nütt

raath nach hellffen könne syent iren zu

wenig, sy müessent mitt einandern kommen

sonst schaffents sy nütt.

Glych bscheid habe inen vogtt Schwytzer

auch geben, unnd iederman uff den gassen

den sy antroffen: unnd gange die gantze sag

uff der landtschafftt inen allen werde

nitt ein haller meer.

Mittwoch darnach ist obgenannter Mathys

Fällman abermallen mitt allem erst be-

fragtt worden. hatt er vollgenden besche-

id geben.

Namlich unnd erstlich es sye nitt minder dan

das herr vogtt Keyser sy fründtlich abge-

manet, er wüsse inen hierin weder zuo hellffen

unnd zuoraath, das möchte er aber wol miss-

(4)

verstanden haben, das er h vogtt Key-

ser geredt syent iren nitt genuog allso das

er möge anzeigt haben

es sye ietzung nitt gelltts genuog,

und sye sin meinung gantz und gar nitt

gsin das h vogtt Keyser imme sölltte

uffgewigklet haben, sonder erkenne imme

hieran gantz unschulldig.

Das er aber sölle geredt haben wann man

überkomen.

Der wortten halb das sy für gmeine eydt-

gnossen gan Baden wöllent kerren

zeigt er an er habe dieselbigen nitt

geredt sonder siner gsellen ettlich habend

die selbigen ussglassen, er möge aber nitt

wüssen wär die syent dann sy under

dem huffen geredt worden, sonsten beschäche

ime hieran gwalltt z'kurtz und unrecht.

(5)

Der andern wortten halb die hauptlütt habent

gsin.

Der wortten halb die Hanns Jacob Ratzenhoffer

unnd Hanns Ulrich Wälltti mitt im geredt

unnd Ratzenhoffer anzeigt sy wöllent sinem

bruoder hauptman die Geissmatten angryffen

sye bschächen zuovor ob sy den rechtshandel

vor M G H geüebtt habent da sy dann

zusamen gstanden unnd sy den haupt-

man Ratzenhoffer und hauptman vn Wyls

säligen erben nitt recht angenommen, unnd

allso sich gegen einandern erklärtt zuosamen

zuostan unnd zuosähen das sy mögent bezalltt

werden.

Lettslich was vogtt Martin Schwyzer antrifft

zeigt er an wölle inne siner antwortt

nitt hinder sich stellen er möge es der gstallt

wie er fürgeben geredt haben, dann er sonst

gar fründtlich mitt inen gsin und glachet er

wüsse auch wol und bekenne es das er sy eini-

chen gstalltt nitt uffgewicklet habe.

B M G H U gnad

(6)

Donstags darnach ist Mathyss Fäll-

man abermallen mitt allem ernst befragtt

worden.

Blybtt gentzlich by voriger antwortt so er

uff gestrigen tag geben: und verharret noch-

mallen daruff das er von h vogtt

Keyer möchte missverstanden haben ob er geredt

es syent iren nitt genuog, oder ob er geredt

es sye nitt gelltts genuog vorhanden, dann

er sonst gründtliche und usstrückenlich

inen anzeigt wüsse inen nütt zuo

raath nach zuo hellffen, söllent imme

rüewig lassen.

Demnach sye nitt minder dann das er

sin tand anzeigt habe.

Deren von Rickenbach halb unnd dess

Rissen zuo Pfeffickon sye nitt minder

(7)

dann sy auch gesinnet gsin allhar zuo-

kommen und den hauptlütten ire zallungen

zuvordern, das sy aber gsinnet gsin mitt

einandern allhar zuokomen und ettwas

thättlichs wider die hauptlütt fürzuonemen

sye gantz und gar nitt, vil weniger einan-

dern uffgewigklet.

Bittet M G H hiemit gantz underthänig

ime zuoverzychen dann er gwüsslich sich

fürohin rüewig halltten unnd geduldt haben

wölle.

Samstags darnach ist Mathys Fällman

abermallen mitt allem ernst befragtt

worden.

Blybtt gentzlich by vorigen antwortten, und

sye nitt minder dann das sy durchein-

das sy möchtent bezallt werden: wie dan

inen h hauptman Ratzenhoffer inen

uff ein zytt fürgeben sy ire h unnd obern

(8)

anrüoffen wöllent damit sy sy könnent

abvertigen: sonst sölle man ime noch-

mallen vertrüwen das sy ützit thättlichs

fürzuonemen gsinnet gsin dann wie

obstatt. Es habe sy auch gar nie-

mand anderer gstalltt uffgewisen noch

uffgewicklet dann wie er hievor

anzigt hatt.

Bittet M G H nochmalen umb

gnädige verzychung wölle sich rüewig

und still halltten das kein klag

meer komen werde.

(9)

Sontags vor Thoma A° 1590 ist Hanns

Bachman von Münster auch umb uffwigklens

willen der knechtten wider die hauptlütt

in M G H gefangenschafft kommen

uff uff fürhalltten h raatsrichters vol-

genden bscheid geben.

Namlich es sye nitt minder dann alls Ma-

thys Fällman mitt ettlichen am Mittwoch

darvor allhar gangen umb ire zallungen

anzuohalltten by den hauptlütten und wi-

derumb heimbd gan Münster kommen sye

er von inen angeredt worden warumb er nitt

mitt inen inhar gangen daruff er inen

geantwortt was er lang inher gan sye

doch nütt vorhanden. Lettslich sy inne

wölliches ime von hertzen leyd bitte M G H

umb gnad, dann inne auch der gross man-

gel mitt wyb und kinder darzuo triben,

unnd habe er für sin theill gar nütt böses

im sinn ghan dann allein sinen hauptman

mitt sinen mittgspanen umb sin besoldung

(10)

anzusprechen: es habe sy auch gar niemand

uffgwigklet ettwas thättlichs

wider die hauptlütt fürzuonemen wie

sy dann auch nitt gsinnet gsin.

Sonst sye nitt an dem das Mathys

Fällman allhie zum hirtzen habe inen

geheissen ein maal umb ein kronen uff

die hauptlütt hin geben, wölliches aber

der wirtt nitt thuon wöllen: das aber

einich daruff geredt sölle haben syent wol ful

lumpen hauptlütt das inen niemand

nütt meer uff borg geben wölle, wüsse

er gantz und gar nitt dann er sölliches

von keinem gehörtt.

Samstags danach ist obgenannter Hanns

Bachman abermallen mitt allem ernst

befragt worden.

Blybt gentzlich by voriger antwortt unnd

habe sy gantz und gar niemand uffge-

wisen, sy habent gar nütt thättlichs

fürzuonemmen im sinn ghan dann

allein wann inen aber iedem

ettwan i oder 2 kronen hette mögen

werden uff den winter wärent sy zuo-

friden gsin.