Ich Annthony adackers des rats zu Under-

walden Nid dem wald, unnd der zitt der edlen

strengen vesten frommen fursichtigen und

wysen, der acht alten ordten gemeiner

eydtgnoschafft miner gnedigen lieben herren

landtvogt zu Baden in Argew, bekenn und

thun kund menngklichen mit disem brieff,

als dann stös und spenn gewesen sind,

zwüschent den erbern Ulrich Haffner von

Clingnow als einem erben wylennt (?),

Grosshans Wegelin von Clingnow sines

schwächers seligen, mitsampt Hannsen Rellis (?)

von Clingnow sinem verordneten bystand

an einem unnd dem erbern Heini Locher

von Spriettenbach, dem andernteil. Von

desswegen und antreffent zechen sunnen

kronen so der vorgemelt Grosshans

Wägely selig dem vorgemelten Heini Locher

geben, unnd im bevolchen houptman Hanns

Überlinger knecht zu bestellen, unnd hin in in das

land zeverttigen, desshalb si von sölicher

zechen kronen wegen, den obgemelten Heini

Locher vor dem gericht zu Spreittenbach,

iechlichen ersucht, und fürgenomen, unnd

des ersten, an den gedachten Heini Locher

durch iren erloupten fürsprechen eroffnet

die meinung wie dann er vorgemelt

Grosshans Wägely vor etwans iaren ver-

gangen, vom houptman Hans Überlinger

(2)

mit einer sum kronen heruss uff dem land

geschickt, unnd in bevelch gehept, im knecht zu

bestellen, unnd die hinin in lampartten zu verttigen

von der selben sum kronen er viertzig kronen,

dem vorgenanten Heini Locher geben, unnd im

bevolchen habe, knecht zu bestellen, unnd als

nun bemelter Grosshans Wägeli selig wegferttig

gewesen, sye er unnd bemelter Heini Locher

zu Baden zu samenkumen, habe der selb Heini

Locher im dem genanten Grosshannssen Wägeli

selig zwe kronen widergeben, unnd daby gesagt,

es syent noch zechen kronen, da sölli er dem

houptman sagen, er sye im und er im schuldig

unnd er welle wol eins mit im werden, als aber

der bemelt Grosshanns Wägely selig in das land

komen, unnd dem houptman Hannsen Überlinger

davon gesagt, habe er sich nützit daran wollen

keren, sunder im sölich vorgemelt zechen

kronen an sinem sold abgerechnet und abgezogen

deshalb er an den megenanten Heine Locher begerte,

im sölich vilgemelt zechen kronen als einem erben

des berürtten Grosshanns Wägelin sines schwächers

seligen widerumb häruss zegeben, dann wo er

söliches sines furträge nit anred noch ge-

kundtlich sin so begerte er erber lut darumb,

zu verhergen. Daruff der vorgemelt

Heini Locher durch sinen fursprecher reden

(3)

unnd antworten liess, er hette die anvord-

rung des bemelten Üli Haffners gehördt und

wol verstanden, unnd neme im etwas

frömbd, unnd unbillich, er sye aber nit

minder dann der vorgemelt Grosshanns

Wegely selig hetti im vor etwans vergangner

iaren ein sum kronen geben, unnd im be-

volchen, dem vorgenanten Houptman Hannsen

Überlinger knecht zu bestellen, unnd als der

vorgemelt Grosshans Wegely selig

wegferttig gewesen, habe er im zwen

kronen wider geben, unnd zechen kronen

behalten, dem selben nach so hette er

Casparn Widmer von Spriettenbach, unnd

fridlin von wyl, siben kronen unnd zweyen

von Baden zwe kronen geben unnd im selbe

ein kronen für sin müy und zerung

behalten, deshalb er getruwe inen nützit

zeanntwurtten haben, noch zegeben, schuldig

sin sölle, unnd ouch begert erber lüt dar mit

zu verhören unnd damit beid partheyen

ir sach mitt vil me und lengern wortten,

nit not alle zu beschriben, zu recht gesetzt und

beschlossen, also nach clag antwurt red und

widerred und beider teilen fürwennden da sye

ein gemeiner einhelliger urteil erkenndt,

diewyl unnd beid teil begerent kundschafft

zu verhören, das die verhördt werden unnd

(4)

dem nach wytter beschechen und ergan sölle

so vil unnd recht sye uff sölich ergangen,

urteil so hett des ersten Thoman Zimbermann

von Clingnöw, uff andingen der bemelten

Üly Haffners, gezuget und gesagt, das er mit dem

vorgemelten Grosshanns Wägely selig in das

land gezogen, unnd als si gen Baden komen, da

keme Heini Locher zu inen und rechnetten mit ein

anndern, da gebe Heini Locher dem genanten Gross-

hanns Wägely zwen kronen unnd seitte er,

hette noch zechen kronen unnd er sölte dem

houptman Überlinger sagen, si beid werent ein

anndern schuldig unnd wann sie zu samen

kement, so welten si wol mit ein anndern einn

werden, unnd als si aber in das land kement

unnd Grosshanns Wägely selig, dem houptman

Überlinger davon sagte, da wolte er sich nützit

daran keren, sunder so schlüge er die genanten

zechen kronen dem vorgemelten Grosshanns Wägely

selig an sinem sold ab. So hat Caspar Widmer

von Spriettenbach uff andingen des vorgenanten

Heini Lochers, bezüget und geseit, das vor etwas

verganngnen iaren Heini Locher im unnd Fridlin

von Wyl siben kronen geben, und inn bevolchen

in das land zu houptman Hannsen Überlinger

zu züchen, das selb si beid ouch also gethan, unnd

als si hinin kement da hette inen bemelter houpt-

man Überlinger die selben siben kronen so inen

Heini Locher geben an iren sölden abgerechnet

(5)

unnd abgeschlagen, unnd habent sich

daruff beid erbetten, sölich ir sagen was dann

ir ieder bezüget unnd gesagt das die war und

also erganngen sye zu bevestnen mit iren eyden,

das wurden sie von beiden parthyen güttlich

erlassen, dann si sus ir sagen gloubten, dem

nach so ist mit der merern urteil erkundt unnd

uff den eyd erteilt, diewyl unnd dem genanten

Heini Locher sölich sum kronen in deheiner

anndern gestalt geben, dann darumb kriege-

lütt zu bestellen, unnd houptman Überlinger,

in das land zu verttigen, das er ouch gethan

habe, das er von dem gemelten Üly Haffner

sölicher siner anvordrung halb ledig, unnd

im sini recht an den vorgemelten houptman

Hannsen Überlinger vorbehalten sin sölli, so

hat die minder urteil erteilt, sider und der bemelt

Üly Haffner durch einen gezugen darbracht

habe, als bemelter Grosshanns Wägely unnd

Heini Locher zu Baden von ein anndern

gescheiden, das Heini Locher domals bekanndtlich

gewesen, das er noch zechen kronen hinder im

habe, da sölle er dem houptman sagen, wann

sie zu samen koment, so wellent si dero halb

wol mit ein anndern eins werden unnd aber

der bemelt houptman Hanns Überlinger

die selben zechen kronen dem gedachten Gross-

hannsen Wägely selig an sinem sold ab-

(6)

gerechnet unnd abgeschlagen, sölich sage der

vorgemelt Heini Locher gloubt habe, das Heini

Locher den vilgenanten Ülin Haffner als einen

erben des vilgemelten Grosshannsen Wägelins

umb sölich zechen kronen vermügen unnd

uffrichten, unnd im sin recht gegen houptman

Hannsen Überlinger vorbehalten sin sölle,

welicher der merern urteil hat sich der vilgemelt

Üli Haffner als dero beschwärtt berüfft unnd die

für mich als einen kundtvogt geappelliert, unnd

so ich nun si zu beiden teilen in sölichem irem

span und beschwärden gegen unnd wider ein

anndern, nach aller noturfft gehördt unnd ver-

standen, so hab ich die merer urteil von dem

gericht zu Spriettenbach uffganngen für die besser

unnd in krafft erkenndt, doch mit sölicher lüttrung

unnd dem anhanng, wem der vilgemelt Heini

Locher einen eyd liblich zu gott unnd den

heiligen schweren und reden moge, das er die

nün kronen, wie er angezöigt hat uffgeben habe,

das er als dann von dem gemelten Üly Haffner

sölicher zechen kronen halb ledig sin, unnd im

sin recht gegen dem genanten houptman Hannsen

Überlinger vorbehalten sin sölle, sölichen eyde,

der vorgedächt Heini Locher angennde vor mir

nach innhalt miner urteil dett und schwür, des

begert der vilgemelt Üly Haffner eins brieffs

der der zu warem urkund mit min des vor-

(7)

genanten landtvogts zu Baden Annthony

Adackers von Underwalden imgedruckten insigel

besiglet unnd geben ist uff sambstag

vor sannt Thomans des heiligen zwölfbetten

tags nach der gepurt christi unsers lieben

herren gezelt tusendt fünffhundert und

drissig iare.