Frytags nach Valentini A° 1591 hand bezügtt
nachvolgende personen wider Hanns Ulrich
Schencken.
Namlich [am Rand: und erstlich Petter Mattman
der deck (?)] verschinen nüwen iarstag alls er
züg auch uff der stuben zum frittschi
gsin habe sich zuotragen alls sy am abent die
so den gantzen zuo tisch dienet auch znacht
essen wollen sye Hanns Ullrich Schenck
auch zu inen komen und mitt inen
zu tisch gesessen, habe er Schenck under
anderm geredt M G H hettend inne
ietzund lange zytt gnuog thürnt werde
es nitt meer thuon noch lyden mitt gunst
zumelden er thätte in sy allsamen da-
ruff der stubenknechtt ime gestöuckt
unnd inne angeredt sich söllichen wortten
zuomüessigen und sähen was er rede
er sölle gan sölliche wortt zu h
Schuldtheis Pfyffer sagen daruff
Schenck wytter geredt was er ime auch
nachfrage er selbst wüsse nitt wo harr
sin gschlecht komme mitt gunst zuomelden
er thätte auch in inne, was anlass
aber ime zuo söllichen wortten gsin sye
ime zügen nitt in wüssen.
Petter Leeman der haffner bezügtt
glych gstallt unnd umb so vil wytter
alls er zuo inen zum tisch komen
(2)
habe er gar übel geschworen und geredt
er habe auch noch wol zuoher zusetzen
alls ein anderen man habe inne offtt
thürnt mitt gunst zuomelden er thätte
in sy allsamen und h Schuldtheis
Pfyffer habe inne offtt ein lecker
und buoben gescholltten er sye selbs
ein lecker er heisse Hanns
Uollrich Schenck von Costelen er
h Schuldtheis Pfyffer wüsse nitt
von wannen er weder die synen syent.
Jörg Brändli der stubenknechtt be-
zügt glyher gstalltt und umb so vil
wytter habe Schenck inne angeredt
ob er wüsse warumb er so wenig
gästen habe man schüche die Frantzosen
die man anzeige er sy haben sölle.
Daruff er züg ime gantwortt h
oberster Ruodolff Pfyffer und h
Schuldtheis Pfyffers 2 sön die mitt
ime by dem doctor zu Münster gsin
wüssent was er für ein kranckheitt
habe ob es die Frantzosen syent oder nitt.
Daruff glych Schenck sich tobent und
wüest erzeigtt mitt reden was er h
schuldtheis Pfyffers sönen nachfrage
er sye dennocht vollen Frantzosen und
noch wytter h schuldtheis Pfyffer
habe inne offt one ursach gethürnt und
inne umb das syn brachtt er habe
(3)
brieff und sigel von wannen er sye h
schuldtheis wüsse aber nitt wär und
von wannen er [Rand: und die synen syent sölle
luogen wo sine gräber syent
er sye ein anderer leckers
buob] sye mitt gunst zu melden
er thätte uff inne was er ime nachfrage
wölliches er lan getriben was ioch (?)
er züg ime abbrochen und gestöuckt
habe.
Margret Hug sin fraw bezügtt glycher
gstallt anders sye ime nütt in wüssen.