Fryttags war sanct luxen des heilligen evange-

listen tag a 1591. Ist Hanns Ulrich Schänck ge-

wäsner würt zum sternen alhie vo synes so grusamen

tobens unnd wütens wägen abermallen in mgh

gfangenschafft khommen.

Und also nach ernstlichem fürhalten m herren der

verordneten sonderlichen der reden unnd wäsens halben

so er alhie zum wyssen windt glych mit geistlichen

unnd wältlichen personnen, alles nach sag unnd

ynhalt der über ime Schencken gegebnen

khundtschafft getriben. Allso auch dess handels halben

den er mit herren Obersten Rudolffen Pfyffer

getriben, wie dann sölliches alles in der ergangnen

khundtschafften gnugsamlich vergriffen.

Daruff Hanns Ulrich Schänck geantwortet, erstlichen der

handlungen halben so sich zu wyssen windt zugetragen haben

sollendt. Dz nit weniger wann alls er zum wyssen wind

khommen sin schuldt von imme zum windt zu bezüchen

habe er herren Huwyller alda funden haber er mit

ime Huwiller von sachen hin und wider geredt

unnder anderem habendt sy vom krieg sonderlichen

aber herr Huwyller inne befraget was für geschrey

zu Zug vom krieg sye habe er Schenck geanttwort,

houptmann Stockers sohn habe geschriben dz sy yetz zu

thundt genug haben werden habe er Schenck darzu

geredt ia ich achten wol sy werdent zethundt

genug haben dann ich vernimmen es syendt ihren

wenig. Habe der herr Huwyler geredt ey es sindt

ihren wol 25 burger alhie zu Lucern enwäg zogen.

Habe er Schänck geantwortett ya es sindt wenig der alten

enwäg zogen, sonsten habe er nütt anders geredt,

möchtend villichter doruff gevallen sin und villichten

dis einen anderen wäg verstanden haben.

Was die handlung den von Hohnrain belangende anträffe

sye nit minder wann dz die sachen also erganngen

der buwer aber habe ime erstlichen anlass darzu

gäben, so ye dz gläslin clein und gar dhein wyn

(2)

dorinnen gsin habe er vermeint es sye alles

schimpff. Mornders alls er widerumb zum

wind gangen unnd herren Huwyller ouch den

von Honrein noch alda funden habendt sy glich

woll widerumb angefangen von dem ver-

gangnen zureden habend aber under einandern

abgeredt, was geredt sye sölle dheiner anderst

dann ein besten verstan, was aber nun die

khundtschafften belangende so so starck wider

ime rede, wölle er niemandt hindersich stellen

wüsse aber sich nit zuerinneren dz die sachen

anderst ergangen. Unnd was er geredt

nur allein schimpfflichen gemeint habe.

Was nun herren obersten Rudolffen Pfyffer

belangende sye nit weniger wann alls er

mitt sampt dem Ziegler von Zug uff die

Sprüwerbrugken khommen sye er zu

ime herren obersten gangen unnd mit

ime von eines brieffs wägen der imme

von herren obersten von des letsten

kriegs wägen verarrestiert fründtlichen

reden unnd synes rhaats pflägen wöllen

habe herr oberster geredt ia es sye zu Geersouw

darvon gehandlet worden. Habe er Schänck

sich derselbigen handlung halben gägen ime

der noturfft nach entschuldiget, doruff herr

oberster unwillig worden ime ruch ange-

fallen, habe er ime immeder umb ver-

zychung und rhaat gebäten aber herre obrist

nach langem gägen ime nüt begüttigen

wollen sonder synen mantel under die arm

geschwungen unnd uff sin weer gegriffen.

(3)

Da er Schänck nun solliches gesächen habe er ouch nit

fliechen wöllen, sonder syn weer ouch zu handen

genommen. Dz er aber herren obrist

anfangs mit der ellenbogen trutzet oder anfangs

zuckt noch weniger sich so greber ungebürlicher

worten gägen ime vermässen wüsse er sich

gar nit zuerinneren, ouch dessen nit dz er

hernach zum sternen unnd sonsten geredt

so man nit gefridet dz er inne herren obersten

ussgemacht haben wolte, mann werde aber

durch synen mitgspanen den Ziegler von Zug

befinden dz herre oberster uff inne und

er Schänck nit uff herren obersten gachet

habe dessen sye er Ziegler noch am nachtmall

zum sternen by einem gsässnen tisch anräd

gewäsen. Doch wolle er dess orts wie

obgemeldet weder umb disers noch anders gar

niemandt hinder sich stellen.

Dz er ouch sy alls mann inne gfangen gnommen so

grusam gestelt habe er vermeint mann solte ime

nur vergonnen sich gägen herren Schultheissen

Pfyffer zu verantworten unnd nit ynleggen

er wölte sich umb dis gägen myner gnädigen

herren straff unn gnaden herinn neigen und

nit nit grüssert haben. bitte mgh

wöllendt ime in gnaden scheiden.

Diser handel...