Min unterthenig willig dienst zuvor frommen erenbesten furnemen

und wysen insonders gnedig herren und vätter uwer miner gnedigen

herren schryben wendel sonnenberg und mir gethan han ich inhalltt so

verstanden unnd darob warlich befrömdung unnd truren empfangen

dann ich nitt vermeint das ir min gnedig herren min hinfartt zu argeu (?)

so hoch gemessen bin ouch nye willens gsin besunders dwyl es doch so

gennzlich wider uch mine gnedige herren gsin die uweren weder in

uwer statt unnd landtschafft hinweg zeferttigen unnd zu unghorrsame

bewegen dann allein so ich gesechen hab das die frömbden houptlutt uwer

miner gnedige herren lutt uber alle verbott uffgwiglett unnd hinweg

gfürtt haben mich ettlich uwer burger in der statt sampt andren eren

ampthlutt in uwer landtschafft angerufft mit inen uff unnd hinweg

zuzuchen da ich inen in dem selben willgfaren hette nitt vermeintt

uch minen gnedigen herren daran so groblich missgdient han angestechen

ds ich die uweren nitt angenommen unnd mitt mir gefergget werend sy

doch durch ander frömbd houptlutt hinweg geferttigett desshalb ich gutter

hoffnung den knechten so ich angenommen söll und muss von mir gutts

beschechen mer dann von den frömbden darum an uch min herren

min demuttig frunttlich bitt ob ich doch in so grossen uwer miner herren

ungnaden stünde min hussgsind nitt engeltten lassen ouch den

uweren unnd min uwer vätterlich Pfleg nitt so gar abgstruben unnd abgschlagt

haben begeren ich umm uwer gnaden frunttliche zun erdienen datum

uff donstag vor verene anno mdcccvi

uwer gnaden williger

diener

hanns bircher