Uff hütt sind vor MGH räten und hundert erschinen min herren die

houplüt iezt in disem zug in Franckrych in bäpt ht dienst

zezühen wegfertig und habent MGH abgnadet und ir urlob

gnomen demüttig bittende sy iederzytt in vätterlichen gnaden und

gunst wie bisshar für bevolchen zuhaben wöllen sy ouch mitt hillff

göttlicher gnaden iren theil thun alls eerlich und redlich kriegslüten

gebürt und zu stat. Im faal ouch ettwan in irem abwäsen

klagreden oder verböserung von inen usgespreit, sy iderzytt

zu verantwortung kommen zelassen. Und sonderlich

(2)

wo sich ettwas sollt zutragen das die navarrischen (wie

dann die sag das vil practicierens darumb glych

in catholischen alls lutrischen orten sye) einen gegen uffbruch

wider sy und die catholische armada dem calvinischen

könig von Navarra zu dienst und gunst zu wege bringen

sollten, inen dasselbig und was vonnott iederzytt ze-

wüssen zethund, sy sich ouch darnach zehalten haben mögen.

Daruff hand MGH inen widerumb fründtlich nach-

volgender massen geantwort.

Erstlich wünschen sy inen zu sollicher irer reiss von Gott vil

glücks und heils und ein glückliche widerkunfft ins vatter-

land mit gsundheit, fröwd und eere.

By gethaner abredungen, abscheid und ordinantz lasst mans

blyben, das söllen sy alles mitt nemen und by handen haben,

man verneme sy, das sy in allen sachen fürsichtig, und gottsfürchtig

syen, ire knecht zu dem selben und in gutter ordnung und re-

giment hallten.

Das sy ouch wol dess einen syen, sich mitt dem obersten und

sonst sy durcheinandern sich wol mitt einandern verglychen,

wo man sy füren und bruchen wil söllen sy gehorsam sin doch

das es den artickel und capitulationen gemass sye, wo man

aber inen nitt hiellte, söllen sy dasselbig und sonst was

inen begegnet und fürfallt MGH iederzytt berichten

das werde man gegen inen ouch thun, und nach iren be-

gären sy lassen zu verantworten komen.

Der Navarrisch practick halb

So vil dann belangt den angezognen Navarrisch handel

haben MGH das ansähen so desswegen verndrigs iars

mittwoch nach galli lut des 157 blats hievor beschehen

widerumb verhöft und dasselbig nochmalen wider be-

stättet und mitt erst uff sich genommen die ungehorsa-

men wöllche sich dises calvinschen kätzerischen fürsten und syner

sachen und practicken die uns zu grossen gfaaren und zwyspallt-

und ouch zu höchster verkleinerung, und gegen Gott

und die wellt unverantwortlich sin wurd, bringen

möchte (da aber MGH endtlich will und entschluss isch

diss kätzerischen fürsten nach siner gschefft gar nützit zu beladen)

anzerinnern (?), underfingen, ernstlich nach lutt desselbigen

ansehens zestraffen.

Harneben ist dem herren von Sillery dem navarrischen am-

bassador zu Solothurn ernstlich gschriben das er uns hie

mit synem practiciren rüwig lasse, sonst würde man

ime das geleit abkunden und sehen wess man gegen ime

befugt wäre.