Ich Albrächt Schmid, burger, unnd der zitt oberster

weybel zug, thun kund mencklich und beken

offenlich mitt dissem brieff, dass ich uff

sin datum zug uff dem ratthus offenlich zu

gericht gesessen bin, imnamen, und anstatt

dess fromen fürsichttigen wisen Oswald Cossen

der zitt amman zug, mines gnädigen lieben herren,

und kam da für mich, in offnem gericht

der edel vest, iunckherr Ludygary

von Herttenstein, zu Lucern dess cleinen rats

und offnett durch sinen erloupten fürsprächer

dem rechten vor, unnd also, wie dass er

ettlich kuntschafften der warheitt nottdürfftig

deren er sich züchen were, an die ersamen

Hansen Schüwig, Ülly Buoller, Jacob Schonbrunner,

und Hanss Mertzen, dennen er allen darum

rechttlich fürbietten lassen hette, und begertte

im die nach form unsers rechten zu verhören,

satzt die sach damitt hin zuo recht, daruff

fragtt ich ob genantter richtter umb rechtt im

gericht, uff den eidt, ward im nach miner

umbfrag mitt urttel erkandt, unnd

also nach bekantter urttel, diewyl kuntsch(t)

der warheitt, dem begerenden nitt zu versagen

sunder mencklich zuo hillff, und fürderung

sins rechten zu geben ist, so hab ich genantter

richtter, und gricht, die bemelten zügen

uff des bemelten iunckherr Ludygaris von

Herttenstein, anziechung, so er inen vor

offnen, und on sy zügen wass rechttlich vor-

hörtt, die hand geseitt, in was als

harnach statt, namlich dess ersten

(2)

hatt Hanss Schüwig geseitt, dass er gann

Hitzkilch komen, und mitt den huoptlütten

von Lucern wellen machen, unnd alls

man im nachtmal gsin were, hette iunckher

Wendel Sunenbergs lüttiner, unnd

fendrich, under anderm anzogen, unnd

grett, dass inenn iunckherr Ludygary

von Herttenstein, ein koch nachhin brächte,

der rette er (der züg) ich gloub ich sigs

aber iunckher Ludygary wird nitt nachhin

komen, dan er ist noch nitt dess sins

gsin zu züchen. Daruff retten sy, er

wurde mitt imme züchen, und nachhin

komen, dan sy hetten mitt im gemacht,

und abkomen, dass sy wol wüsten das er

nachhin keme, und nitt dahinden blibe,

da anttwurte er, dass er widerum zu

im, und mitt im züchen welte, da stünde

der lüttiner uff, und schribe ein brieff,

und hette im den geben, und enpfollen

er sölt in der nach uffstan, und morndes

am tag by iunckher Ludygary sin, umb

im den brieff über anttwurten, so wurd er darin

wol vernemen, dass er nitt da hinden bliben

wurd, hetten ouch witter munttlich mitt

im grett, er sölte iunckher Ludygary sagen

das er sölte nachhin züchen, und umb keins

saltz und geltz wyllen dahinden bliben, unnd

ob er mitt ettlichen knächten umb den sold zer-

(3)

schlagen hette, mitt dennen sölt er machen und

sy annemen, woher sy werind, und durch

geltz wyllen nitt mitt innen zeschlachen.

Dem nach hatt Ülly Buoller geseitt, als der

lüttiner, und fendrich, dem Hans Schüwig

söllichs befollen, iunckher Ludygary von

Herttenstein zuo sagen, hette er söllichs von

ime ghörtt, und wiess bemelter Hans

Schüwig gseitt herre, darby liesse ers ouch

beliben, were also er gangen anderst im

nitt zuo wüssen were. Demnach

hatt Jacob Schonbruner geseitt, inmass alls

Ülly Buoller. Witter so hatt Hans

mertz geseitt, das iunckher Ludygary

von Herttenstein, mitt dem huoptman, iunckher

Wendel Sunenberg zuo wienna uff dem muster-

platz in ein span komen, der massen, das

iunckher Ludygar, mitt den knächten so er

angnomen, an ein ort gestanden, in die kylchen,

und innen den span anzeigtt, so er mitt dem

huoptman habe, und als sy also gestanden,

were iunckher Wendels lüttiner komen, unnd

iunckher Ludygary erfordert, er hette mitt

im zuo reden, da were iunckher Ludygary

gangen, und ime darnach geseitt, dass

bemelter lüttiner in geben, er sölte in die

musterig gan, hette er geantwurt, er wurde

nitt gan, ess were dan sach das in der

huoptmans halten welt nach sin verheissen,

(4)

so er im, und er den knächten than hette, und er

der lüttiner im zuo geschriben habe, daruff

im gesagtter lüttiner geanttwurt, er sölltte

nun gan, dan es wurde kein mangel han,

er hette aber gerett, er geinge nitt, der

lüttiner söltz aber dem huoptman

sagen, welt er in haltten nach sein verhisen,

so welt er dan in die musterig gan. Also

wer der lüttiner gangen, ob er aber bim

huoptman gsin were, oder nitt, wer im

nitt zu wüssen, sig aber danach wider

komen, und zu im dem iunckher Ludygary

gseitt, er sölle numen komen, es habe kein

mangel, daruff were er in die

musterig gangen, und zum knächten gseitt

sy sölten ouch darin gan. Dem

allem nach habe iunckher Ludygary

den lüttiner, disser bemelten worten

und handels, in sin des zügen bywässen

anzogen, dess were der vylbemelt lüttiner

iunckher Ludygary gichttig gsin, unnd

grett, es hette siner psoldung halb, kein

nott, noch mangel, dass were im harum

zuo wüssen. Dem nach hatt

Hans Schürig, uff witter andingen desshalb

an in beschechen geseitt, in mas, als Hans

mertz. Und das dis ir aller sagen

war, und also sig, so hand sy die bahlten

mitt dem eid, so sy harum liblich, zuo gott,

und den hellgen mitt uffgehepten fingeren, und

(5)

gelerten wortten, geschworen hand, niemand zu lieb

noch leid, dan durch der blossen warheit wyllen,

also das urttel geben hatt, des alles

begertt. Vylgedachter iunckher Ludygary

von Herttenstein im brieff, und urkundt

zu geben, sich des zuo siner nottdurfft zuo

gebruchen, ward im ouch hiemitt

under dess obbemelten, Oswald Cossen, der

zitt amman zug, uff gethruckten insigel

zuo geben erkantt, von des gerichtz

wägen. Doch im und sinen erben

in alwäg one schaden. Datum an santt

Andreas abend, anno im xxxvi

iar, hieby, und mitt was Kaspar

Stocker, dess ratz, und Wernny Bronden-

berg, burger zug, von Egery vogtt

Zigerly des ratz, und von Bar Harttman

in Uttigen, all dess geschwornen grichtz,

und ander erber lütt.

(6: neues Dokument)

Mentag vor ein sitonun anno xxxvi,

uff andingen i Leodegari von Hertensteins,

und gebotte hern ratsrichters, hat bezüget

Diebollt Wenck von Offenberg zu Basell gesässen

es sye nit an das i Leodegari zu im gezug

komen sye und im ein quitantz xxx kronen

beträffend geben hab die sölt er i Wendel

geben und im die xxv kronen von

i Wendell bringen. Ouch so bevalch

i Leodegari inn gezug darby

er söllt i Wendell annordnen ob er im

sin bezalung fur zwen sölld [am Rand: oder das so

i Wendel i Leodegarin schulldig sin möcht] uff sin

lyb geben wölt, das so er das

nit thuon söllt er im das ouch zuwussen thuon.

Do gieng er gezug vor dem nachtmal

zu i. Wendel und zöigt im

den handell und die

quitantz an. Aber i Wendell alls er

die quitantz gesach ward er zornig

und warff si wider von im

Allso das er gezug desshalb so i.

Leodegari im bevolchen hat mit i. Wendell

zereden nüt mit im redte, dann Wendell

häte gesagt er wöllt i. Leodegari

nit gen. Allso schied er gezug dannen.