[andere Hand: Protestatz der hauptleuten von uri

des dumainschen zugs ansprachen halb]

Herr Pompeo vom Crütz zu üwer warnung und unser

endtschuldigung darmit weder ir üch harnach der

unwüssenheit ussreden wöllten, noch uns zefreffenheit

gemessen werde, was wir glich wider üch wurden für-

nemen. So thuond wir üch hiemit zewüssen, und verma-

nen üch mit allem höchstem üffer und erst, das ir

üch gentzlichen wellen müssigen und vor diser durch

uns ver arrestierten herrn Caietanen wegen, welche

uns von hohen gwällten zepfand und gissel unser zalungen

verwilliget und zuogestellt sindt, by dem wenigisten

nützit fürnemmen, reden, handlen, thuon nach pratick

füren so uns an unsern bäpstlichen zalungen sum-

nuss schaden oder nachtheil bringen mag, weder yn

noch ussert landts, dann ob wir anderst von üch oder

andren frömbd ider heimbsch grundtlich erfuren, die

sich dieser sachen wider unser wüssen und willen

wenig oder vil uns zeschaden beladen und annemen

wurden, so wellen wir mit sampt unsern fründen

und günnern die sich zu uns der sachen halben

verpflicht, solliches an iren lyb und guott tödtlich

oder in all ander weg wie wir khönnen und mögen

zu khomen. Dess wellendt von uns gewarnet sin

und üch uff khein endtschuldigung nit vertrösten

vermeinen ouch hiemit üwers habenden gleits

uns endtschlagen han, und gefryet sin, wann ir

wurden unsern schaden fürdern, und nutz ver-

hindern, welches gleit wir sonst in all ander

wäg zehallten urbüttig, das verstand von

uns guotter meinung beschechen und eröffnet

frytags den letsten tag ienner im 1592.