Hochgeacht gestreng edel vest, from fürsichtig und wysse, sonders

hocherende gebietende hn und vättern, ich habe ein schryben innamen

der fünff alten orten unser hochloblichen oberen, empfangen, in

welchem gemeldt, wie das etlich klegten für euch mine g hn

komen sy, wie dass unss unser fürst, so schlechtlich bezale, unnd

mir harin üssers trostliche hilff anerbietende, welches so

ich meer st e w zum aller höchsten dancken, wie ich mich den zwar,

wo mir etwas zuofiele, keiner anderen sach, höcher, dan eures

väterlichen rats und dero hilff trösten noch verstehen würde.

Sonst sovil dise klag betrifft, nimpt mich zwar wunder das

man euch miner g hn solches fürgibt, und aber sich in alwegen das

widerspyl befindt, dan Got lob, so hab ich, doch nit mit geringer

mue, die sachen dohin gericht, das wir durch mitel einer asignation

von einem kouffman monatlich bezalt werden, und ob die vergangnen

monat, etwan zuozyten, durch versume uns den koufflüten, die zalung

sich etwan syben oder 8 tag verzächent, so hab ich doch den knechten

us gutem willen, und uss dem minen, die zalung erlegt, und ich am

kouffman gnomen, dergstalt dass wir unseren fürsten als umb

dass wenig mer zuobekümmern, also das sich dass ortts keiner

mit rechtmessiger ursachen nit klagen kan, hat sich ouch noch bishar

keiner nit gegen mir nie klagt, wie sy aber sonst schuldig weren

ir nott und anligen, mir als irem verordnetten hoptman anzuzallen.

Wen sich aber einer klagen thette, were gwüss das er one alle ursach

unseren fürsten zuo verleumbden begerte, und desswegen sin brodt

zuo essen nit mer würdig sin wurde, bitten derwegen

euch mine g hn unnd oberen das ewer st e w welle so wol thuon

unnd nitt einem ieden, so billicht one passaport, oder wol als baldt zuo

vollendt vor einem erbaren gricht verschickt unnd cassiert, liechtlich

glouben geben, sonder desse bericht vor mir als irem gantz

underthanigste, und gehorsamiste diener, begerren, mit höchster und

gantz demuetigster pitt man welle mich in irem vatterlichen schutz

und schirm, und gandigem befelch haben, und uff erste gelegenheit, dise

mine antwort, den übrigen 4 orten eröffnen, Gott der almechtige

welle euwer st e w alle glückselige regierung verlychen.

Den 1 7ber zuo Turyn dis 1592 iars

u st e w

gantz undertänigst

H. Büntiner Ritter gwardy ...